Iopu 37:1-24
37 KO e mena nai foki kua vivivivi ai haku loto, kua hopo foki haku ate mai he mena ha ha i ai.
2 Kia fanogonogo fakamitaki atu a ke he tomumu he hana leo, mo e gugulu atu nai he fofoga hana.
3 Kua fakafano atu ai e ia ki lalo he lagi oti, mo e hana tau uhila foki ke hoko ke he motuaga he lalolagi.
4 Kua mole ia ti tomumu ai e leo; kua pakulagi mai a ia mo e hana leo mua ue atu; ti nakai taofi ai foki e ia ka logona ai hana leo.
5 Kua fakapakū mai he Atua mo e pakulagi ne mua ue atu he hana leo; kua eke e ia e tau mena lalahi nakai iloa ai e tautolu.
6 Ha kua pehe age a ia ke he kiona, Kia to a a koe ke he kelekele; kua pihia foki ke he uha, mo e hana tau uha lalahi.
7 Kua taofi e ia e tau lima he tau tagata oti; kia iloa a ia he tau tagata oti ne eke e ia.
8 Ti o ai e tau manu he vao ke he tau mena ne ofaga ai a lautolu, mo e nonofo ai ke he tau ana ha lautolu.
9 Kua hau e hiohio mai he faahi toga, mo e makalili mai he faahi tokelau.
10 Ko e fafagu he Atua ne ta mai ai e vai tuli; ti fakalautote ai foki e laulahi he tau vai.
11 Ko e moli kua fakamamafa ai e ia e aolagi uli ke he uha; kua fakamavehevehe ai e ia e aolu ke he hana uhila.
12 Kua uta fano tafeliuaki ai ke he hana pule, kia eke ai e ia e tau mena oti kua finagalo a ia ki ai i luga he kelekele kakai oti kana.
13 Po ke fakahoko mai e ia ke akonaki ai, po ke fakahoko mai ke lata mo e hana kelekele, po ke fakaalofa noa ne fakahoko mai ai.
14 Iopu na e, kia fanogonogo mai a ke he tau mena nai; kia tu mai a, mo e manamanatu a ke he tau mana he Atua.
15 Kua iloa nakai e koe, po ke tuku age fefe he Atua hana poaki ke he tau mena ia, mo e fakakapa mai fefe e ia e uhila he hana tau aolagi?
16 Kua iloa nakai e fafati po ke heinoa e mamafa he tau aolagi uli, ko e tau mana ne eke a Ia hana e iloilo katoatoa.
17 Kua iloa nakai e koe po ke mafana he ha e tau tapulu hau he fakanono ai e ia e lalolagi ke he matagi mai he faahi toga?
18 Kua maeke kia a mua fakalataha mo ia ke fofola ai e lagi, kua malolo tuga ne fakaata apa kula?
19 Kia fakailoa mai a kia mautolu po ke heigoa e tau kupu ke vagahau atu ai a mautolu kia ia; nakai maeke kia mautolu ke taute atu ai ha mautolu a tau kupu ki mua hana ha ko e pouli.
20 To tala age kia kia ia kua vagahau e au? Kaeke ke vagahau age e taha ti malaia ai a ia.
21 Hanai, nakai kitekite e tau tagata ke he maama kikila ha ha he tau aolagi; ka e agi mai e matagi, ti havilia kehe ai.
22 Kua hau ai e kikila po ke auro mai he faahi tokelau; ha ha he Atua e lilifu ke matakutaku ai.
23 Ka ko Ia hana e malolo oti kana, nakai ni maeke kia tautolu ke iloa a ia; kua mua ue atu hana malolo; kua pihia foki a ia he fakafili mena, kua homo atu foki hana tututonu, to nakai fakamamahi ai e ia.
24 Ko e mena ia kua matakutaku ai e tau tagata kia ia; nakai kitekite a ia ke he taha ia lautolu ne iloilo ai e tau loto.