Iopu 38:1-41
38 TI tali mai ai a Iehova mai he afa kia Iopu, kua pehe mai,
2 Ko hai kia hanai kua fakapouli ai haku a pule ke he tau kupu nakai toka ai e iloilo?
3 Kia pipi a a koe hau a tokupu po ke tagata malolo; to huhu atu foki e au kia koe, ti talahau mai a e koe kia au.
4 Ko fe kia a koe he fakavē ai e au e lalolagi? Kia talahau mai la, kaeke kua iloa e koe ke manamanatu.
5 Ko hai kia ne fafati ai, po ke iloa nakai e koe? Ko hai foki ne toho ai e afo ke fafati aki ki luga hana?
6 Ne tuku ai ki luga heinoa kia hana tau fakalago? Ko hai foki ne fakatoka hifo ai hana maka he malokuaga;
7 He lologo fakalataha e tau fetu he pogipogi, mo e kalaga fiafia ai e tau tama tane oti he Atua?
8 Ko hai foki ne puipui ai e tahi ke he tau gutuhala he oho mai a ia tuga he hau ai he manava?
9 He eke e au e tau aolagi mo tau tapulu hana, ko e pouli kikio foki mo mena ke vakavakai a ia.
10 He tuku atu ai foki e au hana tau katofia mo e tuku atu ki ai e au e tau akau fakalava, mo e tau gutuhala;
11 Mo e pehe age au ki ai, to hoko mai a koe ki hinei, ka e nakai laka atu a koe; to liliu atu ai he mena nai hāu a tau peau fakatokoluga.
12 Kua pule kia a koe ke he pogipogi tali mai he kamataaga he hāu a tau aho? Ne fakakite age kia e koe ke he matafatafa ata he aho e mena ke kitia mai ai,
13 Kia toto atu e ia e tau kala he lalolagi, mo e lulululu kehe ai e ia a lautolu ne mahani kelea?
14 Kua liliu kehe a ia tuga ne kelekele ki lalo he fakamau fakamailoga, ti tutu mai ai e tau mena oti tuga ne tapulu.
15 Kua uta kehe foki mai he tau tagata mahani kelea ha lautolu a maama, kua fati foki e lima hana ne fakatokoluga.
16 Ne hoko atu kia a koe ke he tau vaipuna he tahi? po ke faifano kia a koe ke he tau mena hokulo he moana?
17 Na fakakite kia kia koe e tau gutuhala he mate? po ke kitia kia e koe e tau gutuhala he ata he mate?
18 Ne manamanatu nakai a koe ke he laulahi he lalolagi? Kia fakakite mai a kaeke kua iloa e koe e tau mena oti ia.
19 Ko fe kia e puhala ke he mena kua nofo ai e maama? Ko e pouli foki ko fe kia e mena ne toka ai a ia;
20 Kia uta e koe a ia ke he hana tau katofia, kia iloa foki e koe e tau puhala ke he fale hana?
21 Na kua iloa e koe e tau mena na he fanau ai a koe he vaha ia, kua lahi foki e katoatoa he tau aho hau he totou!
22 Ne hu atu nakai a koe ke he tau mena ne tatanaki ai e kiona, ne kitia nakai e koe e tau mena ne tatanaki ai e uha tuli,
23 Ko e tau mena ia kua toka e au ke lata ai mo e vaha matematekelea, mo e aho foki ke tau ai ke he tau?
24 Ko fe kia e puhala ke he mena ne vevehe ai e maama, po ke mena ne fakamavehevehe ai e matagi mai he faahi uta i luga he lalolagi.
25 Ko hai ne ihiihi e tau halavai mo e uha, ko e puhala foki ma e uhila he pakulagi?
26 Kia to ai e uha ke he kelekele nakai ha ha i ai ha tagata, mo e tutakale nakai nofo ai ha tagata,
27 Kia makona ai e kelekele ke he mena kua tagitagimoke mo e vao kua tiaki; kia fakatupu ai foki e vao mui.
28 Kua fai matua tane nakai e uha? ko hai foki ne fanau ai e tau tulutā he hahau?
29 Ne hau ai e vai tuli he manava a hai kia? Ko e hahau tuli foki mai he lagi, ko hai kia ne fanau ai a ia?
30 Kua ufia e vai tuga ne ufiufi ai he maka, kua tuli foki e kili tahi.
31 Kua maeke kia kia koe ke fakamau e tau liliaga a Kima? Po ke vevete kia e koe e tau pipi a Kisila?
32 Kua maeke kia ke fakahoko mai e koe e tau Masarota ke he ha lautolu a vaha? Po ke maeke kia koe ke takitaki a Aisa fakalataha mo e hana ni a fanau?
33 Kua iloa nakai e koe e tau fakatufono he lagi? po ke tuku atu kia e koe hana pule ke he lalolagi?
34 Kua maeke kia kia koe ke fakahoko hake e leo hau ke he tau aolagi, kia lofia ai a koe he tau vai loga?
35 Kua maeke kia kia koe ke fakafano atu e tau uhila, ti o ai a lautolu, mo e pehe atu a lautolu, kia koe, Ko mautolu hanai?
36 Ko hai kia ne tuku mai e iloilo ki loto he tagata? Po ko hai foki kua foaki mai e manamanatu ke he loto?
37 Kua maeke kia hai he hana iloilo ke totou ai e tau aolagi? Po ke maeke foki kia hai ke liligi hifo e tau lupo he lagi?
38 Ka kua liu pelapela ai e efuefu, mo e pipiki fakalataha ai e kelekele?
39 Kua maeke kia kia koe ke tutuli e tau manu ke hēhē ai ma e leona fifine? po ke fagai e koe ke makona e tau punua leona,
40 He fakamumuli a lautolu ke he tau ana ha lautolu, mo e nonofo a lautolu mo e lamalamati ai ke he tau mena ne ofaga ai a lautolu?
41 Ko hai kia kua taute ma e oreva hana tau mena kai, he tagi atu hana tau punua ke he Atua, mo e hehe ai a lautolu he nakai fai mena kai.