Iopu 39:1-30
39 KUA iloa kia e koe e vaha kua fanau ai he tau koti he vao ha ha he tau kaumaka? Po ke mailoga nakai e koe ka fanau ai he tau aila?
2 Kua maeke kia ke totou e koe e katoatoa he tau mahina ne fatu ai a lautolu? po ke iloa kia e koe e vaha ne fanau ai e lautolu?
3 Kua fakatokotui a lautolu, kua fanau ai e lautolu ha lautolu a tau punua, mo e fakahiku ai e lautolu ha lautolu a tau mamahi.
4 Kua malolo ha lautolu a tau punua, kua tutupu a lautolu ke he vao; kua o kehe a lautolu ti nakai liliu mai kia lautolu.
5 Ko hai kia ne fakafano atu e asini vao kia toka noa a ia? Ko hai ne vetevete e tau mena ne fakave aki e asini vao?
6 Ko ia kua tuku atu e au ki ai e tutakale ke eke mo fale hana, mo e vao taluē ke totolo ai.
7 Ne va a ia ke he go he motu o tagata he maga; nakai fanogonogo a ia ke he kalaga he takitaki asini.
8 Ko e tau mena ne moua ai ke he tau mouga, ko e hana tau mena kai haia; kua kumi foki e ia e tau laukou mui oti kana.
9 To mafai kia e rema ke fekafekau kia koe? po ke mohe kia a ia he tau po ke he hau a fale povi?
10 Kua maeke kia ke fakave e koe e rema ke he hana tau toua ke he fakatapuke? Po ke mui atu kia a ia kia koe ke fakamolemole aki e kelekele he tau pahua?
11 Kua tua kia a koe kia ia he lahi hana malolo? po ke toka atu kia kia ia hau a tau gahua?
12 Kua manatu kia e koe kia ia ke ta mai hau a tau fua saito, mo e fakapotopoto ai ke he hāu a mena ke haha ai e saito?
13 Kua kapakapa e tau tapakau he renani, ka ko e tau tapakau kia mo e tau fulu he kasita?
14 Kua toka e ia hana tau fufua ke he kelekele, mo e fakamafana ai ke he efuefu.
15 Ka e nimo ia ia mena holi ai he hui, po ke taholi ai he tau manu he vao.
16 Ne favale a ia ke he hana tau punua tuga he nakai ko e hana; Pete he nakai aoga hana gahua, ka e noa a ia mo e fakaatukehe.
17 Ha kua nakai foaki age he Atua kia ia e iloilo; nakai tufa age foki e ia e loto manamanatu kia ia.
18 Ka lelelele hake ki luga hana tau tapakau, kua kata a ia ke he solofanua mo ia ne heke ai.
19 Ne age kia e koe e malolo ke he solofanua? Ne fakatapulu kia e koe hana tua kakia ke he tau fulu talolo?
20 Ne fakahopo kia e koe a ia tuga ne hē akerise? ko e homo atu he hana fagu ko e mena matakutakuina haia.
21 Kua aku e ia e kelekele ke he pahua, kua fiafia foki a ia ke he hana malolo; kua fina atu a ia ke feleveia mo e tau kanavaakau.
22 Kua kata a ia ke he matakutaku, nakai ni fakahahaku a ia; nakai liu kehe foki a ia he pelu.
23 Ne gahaha ki luga hana e taga fana, ko e tao kikila foki, mo e tao.
24 Ko e vivivivi mo e ita, ne folo ai e ia e kelekele; nakai tuai tu fakatekiteki a ia he logona e ia e leo he pu ne ulo.
25 Ka ulo e pu kua pehe age a ia, Aha! kua hohogi mamao atu foki e ia e tau, mo e go he tau takitaki kau ne tauhea, mo e kalaga.
26 Ko e lotomatala mai ia koe kia, ne lele hake e nesa mo e fofola atu ai hana tau tapakau ke he faahi toga?
27 Ko e kupu hāu kia kua lele hake ki luga e aeto mo e eke ai hana fata ke he mena tokoluga.
28 Kua nofo a ia mo e tumau ai ke he kaumaka ki luga he tapunu maka, mo e tapunu mouga he mouga.
29 Kua takahao atu a ia mai he mena ia ke he tau mena kai, kua kitia mamao atu ni he tau mata hana.
30 Kua inu toto foki e tau punua hana; ko e mena foki he ha i ai e tau tino he tau mena kua tamate ha ha i ai foki a ia.