Iopu 42:1-17
42 TI tali atu e Iopu kia Iehova, kua pehe atu,
2 Kua iloa e au kua maeke kia koe e tau mena oti kana, ti nakai maeke foki ke lekua ai ha mena kua finagalo ki ai a koe.
3 Ko hai kia hanai kua fakapouli ai hau a pule mo e nakai iloa? Ko e mena ia kua vagahau atu au mo e nakai manamanatu, ko e tau mena ne mua ue atu he uka kia au, nakai ni iloa e au.
4 Kia fanogonogo mai ā, to vagahau atu ai au kia koe; to huhu atu e au kia koe, ti talahau mai a e koe kia au.
5 Ne fanogonogo au kia koe, he fanogonogo ai haku tau teliga; ka ko ainei kua kitekite atu haku tau mata kia koe;
6 Ko e mena ia kua vihiatia ai e au haku tau kupu, mo e tokihala ai au ke he efuefu mo e efuefuafi.
7 Kua mole he vagahau mai a Iehova e tau kupu ia kia Iopu, ti pehe age a Iehova kia Elifasa ko e tagata Timanu, Kua tupu haku a ita kia koe, mo e hau a tau kapitiga tokoua; he nakai vagahau mo e tonu kia au a mutolu, tuga e fekafekau haku ko Iopu.
8 Ko e mena ia kia uta ai e mutolu fitu e povi tane, mo e fitu e mamoe tane, mo e o age a mutolu ke he haku a fekafekau ko Iopu; kia eke ai a mutolu e poa huhunu ma mutolu; ti liogi ai ma mutolu haku a fekafekau ko Iopu, ha ko e mena talia e au a ia; neke taui atu e au kia mutolu ha mutolu a goagoa he nakai vagahau mo e tonu kia au a mutolu po ke fekafekau haku ko Iopu.
9 Ti o age ai a Elifasa ko e tagata Timanu, mo Pilitati ko e tagata Sua, mo Sofara ko e tagata Naama, mo e eke ai e lautolu ke lata mo e mena ne vagahau mai e Iehova kia lautolu; ti talia ai e Iehova a Iopu.
10 Kua oti he liogi a Iopu ha ko e tau kapitiga hana, ti liuaki e Iehova e paeaaga hana. Ne tamai fakaloga ai foki e Iehova e tau mena kia Iopu, ko e tau mena oti ha ha ia ia fakamua kua takiua.
11 Ti o age kia ia hana tau matakainaga oti, mo e hana tau mahakitaga oti, katoa mo lautolu oti ne mahani mo ia fakamua; ti kai mena ai a lautolu mo ia ke he hana fale; ne fakaalofa foki a lautolu kia ia mo e fakamafana e lautolu a ia ha ko e tau malaia oti ne fakahoko mai e Iehova kia ia. Ti ta age foki e lautolu kia ia takitaha e tupe, mo e takitaha foki e mama auro.
12 Ne mua foki he fakamonuina e Iehova a Iopu ke he hana a fakahikuaga ke he hana a kamataaga; ha ko e mena ha ha ia ia e tau mamoe ne hogofulu ma fa e afe, mo e tau kamela ne ono e afe, mo e tau povi taha e afe ne takiua, mo e tau asini fifine ne taha e afe.
13 Ha ha ia ia foki tokofitu e tama tane, mo e tokotolu e tama fifine.
14 Ne ui foki e ia e higoa he taha ko Timaima, mo e higoa hana ne tokoua aki ko Kesia, mo e higoa hana ne tokotolu aki ko Kerenapuka.
15 Nakai kitia foki ke he motu oti e tau fifine ne tatai mo e tau tama fifine a Iopu he tino mitaki. Ne age foki he matua tane ha lautolu e tau tufaaga kia lautolu fakalataha mo e lafu tugane ha lautolu.
16 Kua mole atu e tau mena ia, ti moui ai a Iopu taha e teau mo e fagofulu e tau. Ne kitia foki e ia hana tau tama tane, mo e tau tama tane he hana tau tama tane, ko e fa ni e hau ha lautolu.
17 Ti mate a Iopu, kua motua, kua katoatoa foki hana tau aho.