Iopu 5:1-27
5 KIA ui atu la po ke ha i ai nakai taha ke tali mai kia koe? po ko hai foki ia lautolu kua tapu ke hagao atu ki ai a koe ?
2 Ko e ita ne kelipopo ai e tagata goagoa, ko e mahekeheke foki ne tamate ai e tagata goagoa.
3 Ne kitia e au e tagata goagoa ne totolo ai hana tau vaka; ka e kaialu fakaofo atu e au ke he mena ne nofo ai a ia.
4 Ne mamao hana fanau mo e mena ke momoui ai, ne taholi foki a lautolu ke he gutuhala, ka e nakai ha ha i ai taha ke laveaki mai.
5 Kua kai e lautolu ne hoge hana tau fua saito, ne uta ai foki e lautolu mai he tau akau fotofoto, ti fakamaga atu e matahele ke he tau koloa ha lautolu.
6 Ko e mena nakai hake mai he efuefu e matematekelea, nakai tupu mai he kelekele foki e mamahi.
7 Ka kua fanau ai e tagata ke mamahi tuga he lele hake ai e lemu afi.
8 Ka ko au to kumi e au ke he Atua, ti tuku atu e au haku mena ke he Atua;
9 Ko ia ne eke e tau mena lalahi nakai maeke ke kumikumi ai, ko e tau mana ni nakai maeke ke totou.
10 Ko ia ne foaki mai e uha ke he kelekele, ne fakafano mai foki e ia e vai ke he vao.
11 Kua ta hake e ia ke he mena tokoluga a lautolu ne tokolalo; kua fakatokoluga foki a lautolu ne tagi ke nonofo a lautolu mo e nakai haofia.
12 Kua moumou e ia e tau fatukiloto ha lautolu ne eke lagatau, ti nakai eke he tau lima ha lautolu e tau mena ne manatu a lautolu ki ai.
13 Kua moua e ia e tau tagata iloilo ke he tau lagatau ni ha lautolu, ko e pule foki ha lautolu ne mahani keukeu kua eke mo mena nakai aoga.
14 Kua hoko kia lautolu e pouli ka ko e aho, kua tamotamo foki a lautolu ke he tupoulā ke tuga ne po.
15 Ka e fakamoui ai e ia mai he pelu, he tau gutu ha lautolu, ko e tau tagata nonofogati ni mai he lima he tagata malolo.
16 Ko e mena ia kua fai mena ke amaamanaki ai a lautolu ne lolelole, kua ponoti ai foki e gutu hana ne mahani kelea.
17 Kitiala, kua monuina e tagata kua akonaki he Atua, ko e mena ia aua neke fakateaga a koe ke he akonakiaga hana Hana e malolo oti kana.
18 Ko e mena fakamamahi e ia, ti pipi ai e ia, ne ta e ia, ko e hana tau lima foki ne fakamaulu ai.
19 To laveaki mai e ia a koe he tau mena ke matematekelea ai ne ono, ko e mena ke fitu aki foki nakai piki atu ha kelea kia koe.
20 To laveaki e ia a koe ke he vaha hoge, ke aua neke mate ai a koe, to laveaki mai foki a koe he pelu ke he tau.
21 To fufu ai a koe mai he akau he alelo, nakai matakutaku foki a koe he malaia ka hoko mai.
22 To kata a koe ke he malaia mo e hoge, to nakai matakutaku foki a koe he tau manu he vao.
23 Ha ko e mena to eke e mutolu e maveheaga, ko mutolu mo e tau maka he kelekele, to mitaki foki a mutolu mo e tau manu he vao.
24 To iloa foki e koe, kua monuina hau a fale ie, to aahi foki e koe hau a mena kua nofo ai, ti nakai galo ai ha mena.
25 To iloa foki e koe ke tokologa e fanau hau, ke tatai foki a lautolu ke tutupu mai ia koe mo e tau vao ikiiki he kelekele.
26 To hoko a koe ke he tukuaga ke he vaha ka motua ai, tuga he ta hake ai e tanakiaga saito ke he hana ni a tau.
27 Kitiala, kua kumi e mautolu e tau mena ma, kua pihia ni haia; kia fanogonogo mai a, mo e iloa ai ni e koe.