Iopu 6:1-30
6 TI tali age a Iopu, kua pehe age,
2 Ane fafati haku a mamahi po kua mitaki; ane tuku fakalataha foki haku malaia ke he fua tautau.
3 Po kua mua ni hana mamafa ke he oneone he tahi; ko e mena ia ne to fakahanoa ai haku a tau kupu.
4 Ko e mena ha ha i loto ia au e tau fana Hana ha ha i ai e malolo oti kana; ko e mena kona ha ha i ai kua inu ai haku agaga; kua tatanaki mai ke tau kia au e tau mena makatutakuina he Atua.
5 Kua tagi kia e asini vao ka ha i ai a ia ke he mena ne toka ai e vao mui? po ke tagi kia e povi ka ha i ai ki mua hana e tau mena kai?
6 Po ke maeke kia ke kai e mena namu noa ka nakai kai aki e masima? po ke manogi kia he kai e mena tea he fufua moa?
7 Nakai mafai au ke pipiki ke he tau mena ia, kua eke ia kia au ke tuga ne tau mena kai kelea.
8 Ane moua e au e mena ne ole ai au po kua mitaki; ti foaki mai foki he Atua e mena ne manako au ki ai;
9 Kia finagalo e Atua ke tuki malipilipi au, kia tuku mai e ia hana lima mo e vevehe kehe e ia au.
10 Ti mafanatia foki au; ti olioli foki au ke he mamahi; pete he nakai fakahao e ia au; he nakai fakatikai e au e tau kupu hana ne Tapu.
11 Ko e heigoa kia haku a malolo ke tatali ai au? ko e heigoa foki haku a fakahikuaga ke fakahautoka ai au?
12 Ko e haku a malolo ko e malolo he tau maka kia haia? po ke tino haku ko e apa kula kia haia?
13 Nakai kia pihia he nakai ha ha ia au haku a lagomatai; kua vega kehe foki ia au e iloilo?
14 Kua lata ke ofania a ia ne lolelole he hana kapitiga; neke tiaki e ia e matakutaku kia ia Hana e malolo oti kana.
15 Kua fakavai he tau matakainaga haku tuga ne vailele, kua mole atu a lautolu tuga ne tau hala vai he tau vailele;
16 Ne kele ai ha ko e tau vaituli; ne galo ai e kiona.
17 Ko e hana vaha ke pakupaku ai ti oti ai ni; ka velagia ti pakupaku ai ni ke he tau mena ha ha i ai.
18 Ne afe e tau fenoga ne o ai he tau puhala ha lautolu, ne o hake a lautolu ke he tutakale, ti mahaikava ai a lautolu.
19 Ne kitekite atu e tau fenoga he tau tagata Tema, ne amaamanaki ai e tau fenoga Sihipa.
20 Ne ma a lautolu, he tua a lautolu ki ai, ne hohoko atu a lautolu ki ai, ti fakahahaku ai a lautolu.
21 Kua eke a mutolu ainei ke tuga ne mena ia, kua kitekite mai a mutolu ke he haku a malaia ti matakutaku ai a mutolu?
22 Ne pehe atu kia au, Kia foaki mai e mutolu ha mena kia au? po ke pehe, Ta mai la e mena fakaalofa kia au he tau koloa ha mutolu?
23 Po ke pehe, Kia laveaki au mai he lima hana kua fai fi mai? po ke pehe, Kia fakamoui a e mutolu au mai he tau lima ha lautolu ne favale mai?
24 Kia fakaako mai a e mutolu au, ti fakamate ai na au; kia fakakite mai foki e mutolu kia au e mena ne hehe ai au.
25 Ne mao lahi e tau kupu tonu. Ka e heigoa kia e mena kua fakatonu ai he akonakiaga ha mutolu?
26 Kua manatu kia a mutolu ke akonaki mai ke he tau kupu? ko e tau kupu hana kua noa mo e amaamanaki kua tuga ne matagi.
27 Ko e mena eke e mutolu e vili ke he tau tama nakai fai matua, mo e fakafua atu e mutolu ha mutolu a kapitiga.
28 Hanai, kia loto mai a mutolu mo e kitekite mai kia au; ti kitia ni e mutolu ka pikopiko atu au.
29 Kia liliu mai a aua neke toka ai ha mahani kelea; kia liliu mai foki a mutolu ha ha i ai ke he mena nai haku a tututonu.
30 Po ke ha i ai kia ha mahani kelea ke he haku a tau laugutu? po ke logona kia he gutu haku e tau mena kelea?