Iosua 1:1-18
1 KUA mole e mate a Mose ko e fekafekau a Iehova, ti vagahau mai e Iehova kia Iosua ko e tama a Nuno, ko e fekafekau a Mose, kua pehe mai,
2 Kua mate tuai haku a fekafekau ko Mose, hanai, kia matike a koe, ti fano ke he fahi atu a Ioritana na, ko koe, katoa mo e motu oti nai, ke he motu kua foaki atu e au kia lautolu, ko e fanau a Isaraela.
3 To foaki atu e au kia mutolu, e tau mena oti ke taholi ai he tau aloalohui ha mutolu, tuga ne vagahau atu ai e au kia Mose.
4 Ke kamata mai he tutakale mo Lepanona na, ke hoko atu ke he vailele lahi, ko e vailele ko Eufirate, ko e motu oti he tau tagata Heti, ke hoko atu foki ke he tahi lahi, ko e mena kua to ai e la, to eke ia mo tau katofia ha mutolu.
5 Nakai tu mai ha tagata ke totoko atu kia koe ke he tau aho oti he hau a moui; tuga ne fakalataha au mo Mose, to fakalataha pihia au mo koe; nakai tiaki e au a koe, to nakai toka e au a koe.
6 Kia fakamalolo a koe mo e fakamanavalahi; ha ko e mena fakahoko e koe e motu nai ke he kelekele ke eke mo tufaaga ma lautolu ne omonuo ai au ke he tau matua ha lautolu ke foaki atu ai kia lautolu.
7 Ka e fakamalolo a koe, ti fakamanavalahi ni; kia taofi e koe ke eke ai ke lata mo e fakatufono oti ne poaki atu ai a Mose haku a fekafekau kia koe; aua neke fano kehe a koe mo e mena ia ke he fahi matau po ke fahi hema, kia monuina ai a koe ke he tau mena oti ke fano a koe ki ai.
8 Nakai uta kehe mo e gutu hau e tohi he fakatufono nai, ka kia manamanatu ai a koe ke he aho katoa mo e po, kia taofi e koe ke eke ai ke lata mo e tau mena oti kua tohi ai; ti monuina a koe ke he tau puhala oti ke fano ai a koe, ti monuina ai ni.
9 Nakai kia poaki atu ai au kia koe? Kia fakamalolo, mo e fakamanavalahi a koe; aua neke matakutaku a koe; ti ua fakaatukehe; ha ko e mena fakalataha a mua mo Iehova hau a Atua ke he tau mena oti ke fano a koe ki ai.
10 Ti poaki atu a Iosua ke he tau iki he motu, kua pehe atu,
11 Kia o atu a a mutolu ke he heagaapi ti poaki atu a mutolu ke he motu, kua pehe atu, Kia taute e mutolu ha mutolu a oho ha ko e mena toe tolu e aho ti o atu ai a mutolu ke he fahi atu a Ioritana nai, ke o atu ke he motu kua foaki mai ai e Iehova ha mutolu a Atua kia mutolu ke eke ma mutolu.
12 Ti vagahau atu e Iosua ke he tau tagata Reupena, mo e tau tagata Kato, mo e tau tagata he taha veveheaga he magafaoa a Manase, kua pehe atu,
13 Kia manamanatu a e mutolu e kupu ne poaki atu ai a Mose ko e fekafekau a Iehova kia mutolu, kua pehe atu, Kua ta atu e Iehova ha mutolu a Atua e okiokihaga kia mutolu; mo e foaki mai e ia e motu nai kia mutolu;
14 Kia nonofo ai e tau hoana ha mutolu mo e ha mutolu a tau tama ikiiki, mo e ha mutolu a tau manu ke he motu ne foaki atu ai e Mose kia mutolu ke he fahi mai nai a Ioritana; ka ko mutolu, ko e tau tagata kua tauteute ke tau, ko e tau toa malolo oti, kia o atu a mutolu ki mua he tau matakainaga ha mutolu mo e lagomatai kia lautolu;
15 Ato ta atu ai e Iehova e okiokihaga ke he tau matakainaga ha mutolu, ke tuga ne ta atu e ia kia mutolu, mo e eke ai e lautolu e motu kua foaki mai e Iehova ha mutolu a Atua kia lautolu; ti liu mai a mutolu mo e nofo ai ke he motu kua eke e mutolu ma mutolu, ne foaki mai e Mose ko e fekafekau a Iehova kia mutolu, ke he fahi mai nai a Ioritana ke he mena kua hake ai e la.
16 Ti tali mai ai a lautolu kia Iosua, kua pehe mai, Ko e tau mena oti ke poaki mai e koe kia mautolu to eke ai e mautolu; ko e tau mena oti foki ke fekau atu e koe a mautolu ki ai, to o atu ki ai ni a mautolu;
17 Tuga ne fanogonogo a mautolu kia Mose ke he tau mena oti, to fanogonogo atu pihia a mautolu kia koe; ka e fakalataha a mua mo Iehova hau a Atua, tuga ne fakalataha ai a ia mo Mose.
18 Ko e tagata foki ke totoko atu ke he pule hau, mo e nakai fanogonogo ke he tau kupu hau, ke he tau mena oti ke poaki mai ai a koe, to kelipopo a ia; ka kia fakamalolo a koe ti fakamanavalahi a koe.