Iosua 11:1-23
11 KUA logona e Iapino e patuiki a Hasora e tau mena ia, ti fakafano atu e ia kia Iopapo ko e patuiki a Matono, mo e patuiki a Simelona, mo e patuiki a Akasafa;
2 Ko e patuiki foki ke he fahi tokelau he atu mouga, mo e kelekele tatai ke he fahi toga a Kinereta, mo e vaha mouga, mo e tau mena tokoluga i Toro ke he fahi lalo;
3 Ko e tau tagata Kanana ke he fahi uta mo e fahi lalo, mo e tau tagata Amori, mo e tau tagata Heti, mo e tau tagata Perisi, mo e tau tagata Iepusi ke he atu mouga, mo e tau tagata Hivi ki lalo a Heremoni ke he motu ko Misepa.
4 Ti o atu ai a lautolu mo e ha lautolu a tau kau oti fakalataha mo lautolu, ko e tau tagata tokologa, tuga ne oneone ke he mataafaga he loga; mo e tau solofanua mo e tau kariota ne loga lahi ni.
5 Kua tutuuta ai e tau patuiki oti ia; ti o a lautolu mo e heapi fakalataha ai tata age ke he vai ko Meroma, ke tau mo Isaraela.
6 Ti pehe mai a Iehova kia Iosua, Aua neke matakutaku a koe kia lautolu, ha ko a pogipogi, ke he magaaho nai, to tuku atu e au a lautolu oti ki mua a Isaraela kua kelipopo; ti helehele motu ai e koe e tau hokohoko he tau hui he tau solofanua ha lautolu, mo e huhunu ai ha lautolu a tau kariota ke he afi.
7 Ti hoko atu fakalutukia kia lautolu a Iosua, mo e kau oti fakalataha mo ia, ke he vai ko Meroma; ti feoho atu ai a lautolu kia lautolu.
8 Ti tuku mai ai e Iehova a lautolu ke he lima a Isaraela, ti keli e lautolu a lautolu, mo e tutuli atu kia lautolu ki Saitonu lahi, mo Misirefomaima, mo e pahua a Misepa ke he fahi uta; mo e keli e lautolu a lautolu, nakai toka ai e lautolu taha ia lautolu.
9 Ti eke e Iosua kia lautolu, tuga ne vagahau mai ai a Iehova kia ia; ne helehele motu e ia e tau hokohoko he tau hui he tau solofanua ha lautolu, mo e huhunu ai ha lautolu a tau kariota ke he afi.
10 Ti liu mai ai a Iosua ke he aho ia, mo e eke ai e ia ma lautolu a Hasora, ti keli foki e ia hana patuiki ke he pelu; ha ko e mena mua a Hasora ke he tau kautu oti na.
11 Ti keli e lautolu ke he pelu e tau tagata oti ha ha i ai, ne fakaotioti ai a lautolu, nakai toka ai e lautolu taha ke moui; ti huhunu foki e ia a Hasora ke he afi.
12 Ne moua e Iosua e tau maga oti he tau patuiki ia, mo e tau patuiki oti ha lautolu; ti keli ai e ia a lautolu ke he pelu, kua fakaotioti ai e ia a lautolu, tuga ne poaki mai ai he fekafekau a Iehova ko Mose.
13 Ka ko e tau maga oti ne tu ai ke he tau mena tokoluga ha lautolu, nakai huhunu ai e Isaraela; ka ko Hasora hokoia ne huhunu ai e Iosua.
14 Ko e tau mena oti he tau maga ia ne fofo he tau, mo e tau manu, ne eke ia mo mena ne fofo he tau ma e fanau a Isaraela, ka e keli e lautolu e tau tagata oti ke he pelu, kua fakaotioti a lautolu, nakai toka ai e lautolu ha tagata taha ke moui.
15 Tuga ne poaki mai e Iehova kia Mose hana fekafekau, ne poaki mai ai pihia e Mose kia Iosua, ti eke ai pihia e Iosua, nakai tiaki e ia ha mena he tau mena oti ne poaki mai ai e Iehova kia Mose.
16 Kua eke ai e Iosua ma lautolu e motu oti nai, ko e atu mouga, mo e fahi toga oti; ko e motu oti foki ko Kosena, mo e vaha mouga, mo e kelekele tatai, mo e mouga a Isaraela, mo e hana vaha mouga;
17 Ke kamata mai he mouga ko Kalaka, ke hake ai ki Seira, ke hoko atu ki Paala-kato ha he pahua a Lepanona ki lalo he mouga ko Heremoni; ne moua foki e ia ha lautolu a tau patuiki oti, ti keli e ia a lautolu, mo e tamate ai e ia a lautolu.
18 Ko e tau aho loga ni ne tau ai a Iosua mo e tau patuiki oti na.
19 Nakai fai maga ne hufeilo mo e fanau a Isaraela, ka ko e tau tagata Hivi ne nonofo i Kipeona hoko lautolu; kia moua ia e tau motu oti ke he tau.
20 Ha ko e mena mai ia Iehova ke fakamao ha lautolu a tau loto ke o age a lautolu ke tau mo Isaraela, kia fakaoti e ia a lautolu, ke aua neke ofania a lautolu, ka kia fakaoti e ia a lautolu, tuga ne poaki mai ai e Iehova kia Mose.
21 Kua fina age ai a Iosua ke he na aho ia, mo e fakaoti ai e tau tagata Anaki ke he atu mouga, mo Heperona, mo Tiperi, mo Anapi, mo e tau mouga oti a Iuta, mo e tau mouga oti a Isaraela; ne fakaoti ni e Iosua a lautolu mo e ha lautolu a tau maga.
22 Kua nakai toe taha he tau tagata Anaki ke he motu he fanau a Isaraela; ka ko Kasa, mo Kata, mo Asetota ne toe ai a lautolu.
23 Kua eke e Iosua e motu oti ma lautolu, ke lata mo e tau mena oti ne vagahau mai ai e Iehova kia Mose; ti tuku atu ai e Iosua ke eke mo tufaaga ma Isaraela ke fakalata e tau veveheaga ha lautolu ke he tau magafaoa ha lautolu. Ti okioki ai e motu he tau.