Iosua 14:1-15
14 KO e tau motu nai kua eke mo tufaaga he fanau a Isaraela ke he motu ko Kanana, ne tufatufa ke eke ma lautolu e Eleasaro ko e ekepoa ne mua, mo Iosua ko e tama a Nuno mo e tau patu he tau matua he tau magafaoa he fanau a Isaraela.
2 Ne eke ai ha lautolu a tufaaga ke he vili ma e tau magafaoa ne hiva mo e veveheaga he magafaoa, tuga ne poaki mai ai e Iehova ke he lima a Mose.
3 Ha kua age tuai e Mose e tufaaga ke he na magafaoa ne ua mo e veveheaga he magafaoa, ke he fahi atu a Ioritana; ka e nakai age e ia ha tufaaga ke he tau tagata Levi fakalataha mo lautolu.
4 Ha kua ua e magafaoa he fanau a Iosefa, ko Manase mo Efaraimo. Ti nakai age ai e lautolu ha tufaaga he kelekele ke he tau tagata Levi ka ko e tau maga ke nonofo ai a lautolu, mo e vao ne takai ai mo e tau manu ha lautolu mo e ha lautolu a tau mena.
5 Tuga ne poaki mai e Iehova kia Mose, ne eke pihia ni he fanau a Isaraela, ti tufatufa ai e lautolu e motu.
6 Ti o age e fanau a Iuta kia Iosua i Kilikala; ti pehe age a Kalepa ko e tama a Iefuna ko e tagata Kenasi kia ia, Kua iloa e koe e kupu ne vagahau mai ai e Iehova kia Mose ko e tagata he Atua kia taua i Katesapanea.
7 Ne fagofulu haku tau tau he fakafano atu ai e Mose ko e fekafekau a Iehova au i Katesapanea ke toko atu ke he motu; ti ta mai ai e au e kupu ke lata mo e haku a taofi.
8 Ka ko e haku tau matakainaga ne fakalataha mo au, ne fakalolelole ai e lautolu e tau loto he motu; ka e mui atu fakaoti ni au kia Iehova haku a Atua.
9 Ti omonuo ai e Mose ke he aho ia, kua pehe mai, Ko e moli ko e motu ne taholi ai he hau a tau hui to eke ia mo tufaaga mau mo e hau a fanau tukulagi, ha kua mui atu fakaoti a koe kia Iehova haku Atua.
10 Ko e hanai foki, kitiala, kua fakatuleva mai e Iehova haku a moui, tuga ne vagahau mai a ia, ko e tau tau fagofulu ma lima, tali he vagahau mai e Iehova e tau kupu na kia Mose, ka kua o fano ai a Isaraela ke he tutakale; ko e hanai foki, kitiala, kua valugofulu ma lima haku tau tau ke he aho nai.
11 Kua toka agaia haku malolo ke he aho nai tuga ne aho ne fakafano atu ai e Mose au; tuga ni haku a malolo ke he aho ia, kua pihia ni haku a malolo ke he aho nai ke tau, ke fina atu ai, mo e liu mai ai.
12 Ko e hanai, kia tuku mai e koe kia au e mouga nai, ne vagahau mai ai e Iehova ke he aho ia; ha ko e mena logona ai e koe ke he aho ia, ha i ai ke he mena ia e tau tagata Anaki, mo e tau maga lalahi kua eke mo tau taue, kaeke ke ha ha ia au a Iehova ti maeke ia au ke vega a lautolu, tuga ne vagahau mai ai e Iehova.
13 Ti fakamonuina e Iosua kia ia, ti age ai a Heperona kia Kalepa ko e tama a Iefuna ke eke mo tufaaga mana.
14 Ko e mena ia kua eke a Heperona mo tufaaga a Kalepa ko e tama a Iefuna ko e tagata Kenasi, ke hoko mai ke he aho nai, he mui atu fakaoti a ia kia Iehova ko e Atua a Isaraela.
15 Ko e higoa foki a Heperona ne aho mua ko Kiriata-arapa haia; ko Arapa ko e tagata lahi a ia he tau tagata Anaki. Ti okioki ai e motu he tau.