Iosua 17:1-18
17 KUA eke foki e tufaaga he magafaoa a Manase, ha ko e tama uluaki a Iosefa a ia; mo Makiro ko e tama uluaki a Manase, ko e matua a Kiliata; ha ko ia ko e toa, ti ha ia ia a Kiliata mo Vasana.
2 Ti eke e tufaaga he fanau a Manase, ko lautolu ne toe, ke lata mo e ha lautolu a tau magafaoa; mo e fanau a Apieseru, mo e fanau a Heleka, mo e fanau a Aserieli, mo e fanau a Sakema, mo e fanau a Heferu, mo e fanau a Semita, ko e tau tama tane ia a Manase ko e tama a Iosefa, ke lata mo e ha lautolu a tau magafaoa.
3 Ka ko Selofeata ko e tama a Heferu, ko e tama a Kiliata, ko e tama a Makiro, ko e tama a Manase, nakai fai tama tane a ia ka ko e tau tama fifine; ko e tau higoa he hana tau tama fifine hanai, ko Maala, mo Noa, mo Hakela, ko Meleka mo Tiresa.
4 Kua o mai a lautolu ki mua a Eleasaro ko e ekepoa, ki mua foki a Iosua ko e tama a Nuno, ki mua foki he tau iki, kua pehe mai, Ne poaki mai e Iehova kia Mose ke ta mai e tufaaga ma mautolu fakalataha mo e ha mautolu a tau tugane. Ti age ai e ia e tufaaga kia lautolu fakalataha mo e tau matakainaga he matua tane ha lautolu, ke lata mo e kupu a Iehova.
5 Ti moua e Manase hogofulu e tufaaga ke lafilafi ke he motu ko Kiliata mo Vasana, ke he fahi atu a Ioritana
6 Ha kua eke he tau tamafifine a Manase e tufaaga fakalataha mo e hana tau tama tane; ka e eke he tau tama tane a Manase ne toe e motu ko Kiliata.
7 Ko e katofia a Manase ne kamata mai Asera ke hoko atu ki Mekemeta, ne fehagai mo Sikema; kua fina age e katofia ke he fahi matau, ke hoko atu kia lautolu ne nonofo i Enetapua.
8 Ha ia Manase e kelekele ko Tapua; ka ko Tapua ke he katofia a Manase, ko e mena he fanau a Efaraimo haia.
9 Kua hifo e katofia ke he vailele ko Kana, ke he fahi toga he vailele, ko e tau maga ia a Efaraimo ke he vaha loto he tau maga a Manase; ko e katofia foki a Manase ha he fahi tokelau he vailele, mo e hana liuaga ko e tahi haia.
10 Ko e fahi toga, ha Efaraimo ia; mo e fahi tokelau ha Manase haia; ko e hana katofia foki ko e tahi; kua tutuuta foki ha laua a tau katofia i Asera ke he fahi tokelau, mo Isakara ke he fahi uta.
11 Ti ha ha ia Manase ia Isakara mo Asera, ko Petesana mo e hana tau maga, mo Ipelamo mo e hana tau maga, mo lautolu ne nonofo i Toro mo e hana tau maga, mo lautolu ne nonofo i Enetoro mo e hana tau maga, mo lautolu ne nonofo i Tanaka mo e hana tau maga, mo lautolu ne nonofo i Mekito mo e hana tau maga; tolu ni e motu.
12 Ka e nakai maeke ke he fanau a Manase ke vega kehe e tau tagata he tau maga ia; ka e nonofo matauka ai e tau tagata ke he motu na.
13 Ka kua malolo e fanau a Isaraela, ti kotofa atu ai e lautolu e poa ke ta mai ai he tau tagata Kanana kia lautolu; ka e nakai vega fakaoti a lautolu.
14 Ti vagahau age e fanau a Iosefa kia Iosua, kua pehe age, Ko e ha kua ta mai e koe maku taha maka e tufaaga, mo e veveheaga taha ke eke mo tufaaga, ko e motu lahi haku, ha kua fakamonuina mai e Iehova au kua hoko mai ke he aho nai?
15 Ti tali age ai a Iosua kia lautolu, Kaeke ko e motu lahi hāu, ti hake a koe ke he vao motua, mo e fakatoka māu ke he mena ia, ke he motu he tau tagata Perisi, mo e tau tagata Rafā, kaeke kua lautote kia koe e mouga ko Efaraimo.
16 Ti pehe age ai e fanau a Iosefa, Nakai lata ma mautolu e mouga; kua fai kariota lapatoa foki he tau tagata Kanana oti kua nonofo ke he motu ha he pahua, ko lautolu ha ha i Petesana mo e hana tau maga, katoa mo lautolu ke he pahua a Isereelu.
17 Ti tala age ai a Iosua ke he magafaoa a Iosefa, ko Efaraimo mo Manase, kua pehe age, Ko e motu lahi a koe, ha ha ia koe foki e malolo lahi, nakai ko e tufaaga taha ke eke māu.
18 Ka ko e mouga to eke foki ia māu; ha ko e vao motua haia, ti hahala ai e koe ia; to eke foki e koe mo e tau mena ne liu mai ai a ia; ko e mena vega e koe e tau tagata Kanana, pete ni he fai kariota lapatoa, mo e malolo a lautolu.