Iosua 18:1-28
18 KUA fakapotopoto ai e fakapotopotoaga oti he fanau a Isaraela ki Sailo, ti fakatu ai e lautolu e fale uta fano he tutuutaaga. Kua mahala ai foki e motu ki mua ha lautolu.
2 Ne toe fitu e magafaoa he fanau a Isaraela kua nakaila moua e lautolu e tufaaga ha lautolu.
3 Ti pehe age a Iosua ke he fanau a Isaraela, To fakalolelole a mutolu ato a fe, ke nakai o atu a mutolu ke eke ma mutolu e motu kua foaki atu ai kia mutolu e Iehova ko e Atua he tau matua ha mutolu?
4 Kia kotofa e mutolu ia mutolu takitokotolu e tagata he tau magafaoa; ke fekau atu e au a lautolu, kia mamatike a lautolu mo e o fano ai ke he motu, mo e tohi e lautolu fakalata ke he tau tufaaga ha lautolu, ti o mai a lautolu kia au.
5 Ti vevehe ai e lautolu ke fitu e veveheaga; ke tumau ai a Iuta ke he hana katofia ke he fahi toga; mo e magafaoa a Iosefa, ke tumau ai a lautolu ke he katofia ha lautolu ke he fahi tokelau.
6 Ka kia tohi a mutolu e motu ke he fitu e veveheaga mo e ta mai e mutolu e tohi ki hinai kia au, kia eke ai e au e vili ma mutolu ki mua a Iehova ha tautolu a Atua.
7 Ha kua nakai fai tufaaga he tau tagata Levi fakalataha mo mutolu; ha ko e feua he ekepoa kia Iehova ko e ha lautolu a tufaaga haia; ko Kato foki, mo Reupena, mo e taha veveheaga he magafaoa a Manase, kua moua e lautolu ha lautolu a tufaaga ke he fahi atu a Ioritana ke he fahi uta, ne age e Mose ko e fekafekau a Iehova kia lautolu.
8 Ti matike e tau tagata ia mo e o atu ai a lautolu; ti poaki age ai e Iosua kia lautolu ne o age ke tohi e motu kua pehe age, Kia o ā mutolu, mo e o fano ke he motu mo e tohi ai, ti liliu mai a mutolu kia au, kia eke ai e au e vili ma mutolu ki mua a Iehova i Sailo.
9 Ti o e tau tagata ia, mo e o age ai a lautolu ke he motu, mo e tohi ai e lautolu e tau maga ke he tohi, ke he tau veveheaga ne fitu, ti o mai ai a lautolu kia Iosua ke he heaga api i Sailo.
10 Ti eke ai e Iosua e vili ma lautolu i Sailo ki mua a Iehova; ti tufatufa ai e Iosua ke ke mena ia e motu ma e fanau a Isaraela ke lata mo e tau veveheaga ha lautolu.
11 Ne hagao e vili ke he magafaoa he fanau a Peniamina ke lata mo e ha lautolu a tau magafaoa; ti fina age ai e katofia he tufaaga ha lautolu ke he vaha loto he fanau a Iuta mo e fanau a Iosefa.
12 Ne eke ha lautolu a katofia ke he fahi tokelau ke kamata mai i Ioritana; ti hake ai e katofia ke he fahi a Ieriko, ke he fahi tokelau, mo e hake ke he atu mouga ke he fahi lalo; ti liu mai ai he tutakale ko Petavene.
13 Ti fina atu ai e katofia he mena ia ki Lusa, ke he fahi ko Lusa, ko Peteli haia, ke he fahi toga; ti hifo ai e katofia ki Atarota-atara, ne tata age ke he mouga ha ha he fahi toga a Petehorona i lalo.
14 Ne tohi ai e katofia, ti afe age ai ke he tapa tahi, ke he fahi toga, ne kamata mai he mouga ne fehagai mo Petehorona ke he fahi toga; ko e hana liuaga ko Kiriata-paala, ko Kiriata-iarima haia, ko e maga he fanau a Iuta. Ko e fahi lalo haia.
15 Ko e fahi toga, ne kamata mai he mena ne liu mai ai a Kiriata-iarima, ti fina atu ai e katofia ke he fahi lalo, mo e fina atu ke he vaipuna ko Nafatoa;
16 Ti hifo ai e katofia ke he mena ne liu mai ai e mouga ne fehagai mo e pahua he fanau a Hinoma, ha ha i ai ke he pahua he tau tagata Rafā ke he fahi tokelau, ti hifo ai ke he pahua a Hinoma, ke he tapa a Iepusi ke he fahi toga, ti hifo ki Enerokelu;
17 Ne tohia ke kamata mai he fahi tokelau, ti fina atu ki Enesemesa, ti fina atu ki Kelilota ne fehagi mo e mena ne hake ai ki Atumema, mo e hifo ke he maka ko Poana he fanau a Reupena;
18 Ti fina atu ai ke he fahi, ne fehagai mo Arapa ke he fahi tokelau, mo e hifo ki Arapa;
19 Ti fina atu ai e katofia ke he fahi ko Peteokelu ke he fahi tokelau; ti liu mai ai e katofia he ava ke he fahi tokelau he Tahi Kona, ke he mena ne liu mai ai a Ioritana ke he fahi toga. Ko e katofia ke he fahi toga haia.
20 Ko Ioritana ko e hana katofia ke he fahi uta haia. Ko e tufaaga ia he fanau a Peniamina, mo e hana tau katofia ne takai ai, ke lata mo e ha lautolu a tau magafaoa.
21 Ko e tau maga hanai he magafaoa he fanau a Peniamina ke lata mo e ha lautolu a tau magafaoa; ko Ieriko, mo Peteokelu, mo e pahua a Kesisa,
22 Mo Petearapa, mo Simaraima, mo Peteli,
23 Mo Avima, mo Para, mo Ofira,
24 Mo Kefara-hamoni, mo Ofini, mo Kapea; ko e tau maga ne hogofulu ma ua mo e ha lautolu a tau kaina ke he magahehala.
25 Ko Kipeona, mo Rama, mo Perota,
26 Mo Misepa, mo Kafira, mo Mosa,
27 Mo Rekema, mo Irefelu, mo Taralu,
28 Mo Sila, mo Elifa, mo Iepusi, ko Ierusalema haia, ko Kipeata,mo Kiriata; ko e tau maga ne hogofulu ma fa, mo e ha lautolu a tau kaina ke he magahehala. Ko e tufaaga haia he fanau a Peniamina, ke lata mo e ha lautolu a tau magafaoa.