Iosua 21:1-45
21 TI o age e tau iki he tau matua he tau tagata Levi kia Eleasaro ko e ekepoa, mo Iosua ko e tama a Nuno, mo e tau iki he tau matua he tau magafaoa he fanau a Isaraela,
2 Ti vagahau ai a lautolu kia lautolu i Sailo ke he motu ko Kanana, kua pehe age, Ne poaki mai ai e Iehova ia Mose, ke tuku mai ma mautolu e tau maga ke nonofo ai a mautolu, mo e tau vao ne takai ai e tau maga ia mo e tau manu ha mautolu.
3 Ti age ai he fanau a Isaraela ke he tau tagata Levi, mai he tufaaga ha lautolu, ke lata mo e kupu a Iehova, e tau maga mo e tau vao ne takai ai.
4 Ne hagao e vili ke he magafaoa a Koato; mo e fanau a Arona ko e ekepoa, ko e tau tagata Levi, ne moua e lautolu e tufaaga mai he magafaoa a Iuta, mo e magafaoa a Simeona, mo e magafaoa a Peniamina, ko e tau maga ne hogofulu ma tolu.
5 Ko e fanau foki a Koato ne toe, ne moua ai e lautolu ke lata mo e vili e tufaaga mai he tau magafaoa he magafaoa a Efaraimo, mo e magafaoa a Tano, mo e taha veveheaga he magafaoa a Manase, ko e tau maga ne hogofulu.
6 Ne moua foki he fanau a Keresona e tufaaga mai he tau magafaoa he magafaoa a Isakara, mo e magafaoa a Asera, mo e magafaoa a Nafatali, mo e taha veveheaga he magafaoa a Manase i Vasana, ko e tau maga ne hogofulu ma tolu.
7 Ne moua he fanau a Merari e tufaaga ke lata mo e ha lautolu a tau magafaoa, mai he magafaoa a Reupena, mo e magafaoa a Kato, mo e magafaoa a Sepulona, ko e tau maga ne hogofulu ma ua.
8 Ne tuku atu ai ke he vili he fanau a Isaraela e tau maga ia mo e tau vao ne takai ai ke he tau tagata levi, ke lata mo e mena ne poaki mai ai e Iehova ia Mose.
9 Ti tuku atu ai e lautolu mai he magafaoa he fanau a Iuta, mo e magafaoa he fanau a Simeona, e tau maga nai kua talahau ai ha lautolu a tau higoa,
10 Ha ha i ai ke he fanau a Arona, ko lautolu ia kua magafaoa mo Koato, ko e fanau a Levi, ha kua to kia lautolu e tufaaga fakamua,
11 Kua tuku atu foki kia lautolu e maga a Arapa ko e matua tane a Anaki, ko Heperona haia, ke he atu mouga a Iuta mo e hana vao ne takai ai a ia.
12 Ka ko e fonua he maga mo e hana tau kaina ke he magahehala, kua tuku atu ai e lautolu kia Kalepa ko e tama a Iefuna, ke eke mana.
13 Kua tuku atu ai e lautolu ke he tau tama tane a Arona ko e ekepoa, ko Heperona mo e vao ne takai ai, ko e maga ke eke mo huaga maana kua keli tagata; mo Lipena mo e hana vao.
14 Ko Iatira mo e hana vao; mo Esetamoa mo e hana vao;
15 Mo Holona mo e hana vao; mo Tiperi mo e hana vao;
16 Mo Aino mo e hana vao; mo Iutaha mo e hana vao; mo Petesemesa mo e hana vao; ko e tau maga ne hiva mai he tau magafaoa ia ne ua.
17 Mai he magafaoa foki a Peniamina, ko Kipeona mo e hana vao; mo Kepea mo e hana vao;
18 Mo Anatota mo e hana vao; mo Alemoni mo e hana vao; ko e tau maga ne fa.
19 Ko e katoatoa he tau maga he tau ekepoa, ko e tau tama tane a Arona, ko e hogofulu ma tolu e maga, mo e ha lautolu a tau vao.
20 Ko e tau magafaoa a Koato, ko e tau tagata Levi ne toe he fanau a Koato, ha i ai e tau maga he tufaaga ha lautolu mai he magafaoa a Efaraimo.
21 Kua tuku atu e lautolu kia lautolu a Sikema mo e hana vao, ke he mouga ko Efaraimo, ko e maga ke eke mo huaga maana kua keli tagata; mo Kasera mo e hana vao;
22 Mo Kipesaima mo e hana vao; mo Petehorona mo e hana vao; ko e tau maga ne fa.
23 Mai he magafaoa a Tano, ko Eleteka mo e hana vao; mo Kipetonu mo e hana vao;
24 Mo Ailona mo e hana vao; mo Katarimoni mo e hana vao; ko e fa e maga.
25 Mai he veveheaga foki he magafaoa a Manase ko Tanaka mo e hana vao; mo Katarimoni mo e hana vao; ko e tau maga ne ua.
26 Ko e katoatoa he tau maga ko e hogofulu ni, mo e ha lautolu a tau vao ma e tau magafaoa he fanau a Koata ne toe.
27 Ko e fanau a Keresona, he tau magafaoa a Levi, ne tuku atu e lautolu ki ai, mai he taha veveheaga he magafaoa a Manase, ko Kolani i Vasana mo e hana vao, ko e maga ke eke mo huaga maana kua keli tagata; mo Peseteraha, mo e hana vao; ko e tau maga ne ua.
28 Mai he magafaoa foki a Isakara, ko Kiseone mo e hana vao; mo Taperu mo e hana vao;
29 Mo Iaremuta mo e hana vao; mo Enekanima mo e hana vao; ko e tau maga ne fa.
30 Mai he magafaoa foki a Asera, ko Misala mo e hana vao; mo Apetono mo e hana vao;
31 Mo Kelekata mo e hana vao; mo Rehopo mo e hana vao; ko e fa ni e maga.
32 Mai he magafaoa foki a Nafatali, ko Katesa i Kalilaia mo e hana vao, ko e maga ke eke mo huaga maana kua keli tagata, mo Amatatoro mo e hana vao; mo Karetana mo e hana vao; ko e tau maga ne tolu.
33 Ko e katoatoa he tau maga he tau tagata Keresona, ke lata mo e tau magafaoa ha lautolu, ko e hogofulu ma tolu e maga, mo e ha lautolu a tau vao.
34 Kua tuku atu foki ke he magafaoa he fanau a Merari, ko lautolu ne toe he tau tagata Levi, mai he magafaoa a Sepulona, ko Iokeneama mo e hana vao; ko Kareta mo e hana vao;
35 Ko Timena mo e hana vao; mo Nahalali mo e hana vao; ko e tau maga ne fa.
36 Mai he magafaoa foki a Reupena, ko Peseri mo e hana vao; mo Iaesa mo e hana vao;
37 Ko Katemoti mo e hana vao; mo Mefata mo e hana vao; ko e tau maga ne fa.
38 Mai he magafaoa foki a Kato, ko Ramota i Kiliata, mo e hana vao, ko e maga ke eke mo huaga maana kua keli tagata; mo Mahanaima mo e hana vao;
39 Mo Hesepona mo e hana vao; ko Iasaru mo e hana vao; ko e katoatoa he tau maga ne fa ni.
40 Ko e katoatoa he tau maga he fanau a Merari, ke lata mo e ha lautolu a tau magafaoa, ko lautolu ne toe he tau magafaoa he tau tagata Levi, ko e tufaaga ha lautolu ko e tau maga ne hogofulu ma ua.
41 Ko e katoatoa he tau maga he tau tagata Levi, i loto he tufaaga he fanau a Isaraela, ko e fagofulu ti valu e maga, mo e tau vao ha lautolu.
42 Kua takitaha e maga mo e hana vao ne takai ai; ti pihia ni e tau maga oti ia.
43 Kua foaki mai e Iehova kia Isaraela e tau motu oti ne omonuo ai e ia ke foaki mai ai ke he tau matua ha lautolu, kua eke ai e lautolu ma lautolu, mo e nonofo ai.
44 Ti eke e Iehova ke okioki ai a lautolu ia lautolu ne agaagai mai kia lautolu, ke lata mo e tau mena oti ne omonuo ai e ia ke he tau matua ha lautolu; nakai fai tagata ia lautolu oti kua fai fi kia lautolu kua maeke ke tu mai ki mua ha lautolu, ne tuku mai e Iehova ke he tau lima ha lautolu a lautolu oti kua fai fi kia lautolu.
45 Nakai to ha kupu taha he tau kupu mitaki oti ne vagahau mai ai e Iehova ke he magafaoa a Isaraela; kua hoko oti ni.