Iosua 22:1-34
22 TI ui ai e Iosua ke he tau tagata Reupena, mo e tau tagata Kato, mo e taha veveheaga he magafaoa a Manase,
2 Mo e pehe age a ia kia lautolu, Kua omaoma tuai a mutolu ke he tau mena oti ne poaki age ai e Mose ko e fekafekau a Iehova kia mutolu; kua fanogonogo foki a mutolu ke he haku a leo ke he tau mena oti ne poaki atu ai e au kia mutolu.
3 Nakai tiaki e mutolu ha mutolu a tau matakainaga ke he tau aho loga, ke hoko mai ke he aho nai; ka kua omaoma a mutolu ke he fekau ko e poaki a Iehova ha mutolu a Atua.
4 Ko e hanai, kua ta age e Iehova ha mutolu a Atua e okiokihaga ke he tau matakainaga ha mutolu, tuga ne vagahau mai e ia kia lautolu; ko e mena ia kia liliu ā mutolu, mo e o atu ai ke he tau fale ie ha mutolu ke he motu kua eke mo tufaaga ha mutolu, ne ta atu ai e Mose ko e fekafekau a Iehova kia mutolu, ke he fahi atu a Ioritana.
5 Ka kia omaoma e mutolu ke eke e poaki mo e fakatufono, ne poaki atu ai e Mose ko e fekafekau a Iehova kia mutolu; ke fakaalofa atu kia Iehova ha mutolu a Atua, mo e o ai a mutolu ke he hana tau puhala oti, mo e omaoma ke he hana tau poaki, mo e pipiki atu ni kia ia, ti fekafekau a mutolu kia ia mo e ha mutolu a loto katoa mo e ha mutolu a agaga katoa.
6 Ti fakamonuina atu e Iosua kia lautolu, mo e fakafano atu e ia a lautolu ke o; ti o atu ai a lautolu ke he tau fale ie ha lautolu.
7 Ne age e Mose ke he taha veveheaga he magafaoa a Manase e tufaaga i Vasana; ka e ta atu e Iosua ke he taha veveheaga e tufaaga fakalataha mo e tau matakainaga ha lautolu ke he fahi lalo a Ioritana. Kua fakamonuina e Iosua a lautolu, mo e fakafano atu e ia a lautolu ke o ke he tau fale ie ha lautolu.
8 Kua tala age a ia kia lautolu, kua pehe age, Kia liliu atu ā mutolu ke he tau fale ie ha mutolu mo e tau koloa loga, mo e tau manu ne loga lahi ni, mo e tau ario, mo e tau auro, mo e tau apa kula, mo e tau lapatoa, mo e tau tapulu ne loga lahi ni, ti tufatufa ai e mutolu ke he tau matakainaga ha mutolu e tau mena ne fofo ai e mutolu he tau mo lautolu oti ne fai fi kia mutolu.
9 Ko e fanau a Reupena, mo e fanau a Kato, mo e taha veveheaga he fanau a Manase, kua liliu atu a lautolu, mo e o kehe mo e fanau a Isaraela i Sailo, ke he motu ko Kanana, ke o atu ke he motu ko Kiliata, ne moua e lautolu mo tufaaga ha lautolu ha lautolu ke lata mo e kupu a Iehova kia Mose.
10 Kua hoko atu a lautolu ke he tapa a Ioritana ha ha he motu ko Kanana, ti ati ai ke he mena ia he fanau a Reupena, mo e fanau a Kato, mo e taha veveheaga he magafaoa a Manase, e fatapoa ne tata age ki Ioritana, ko e fatapoa lahi ke kitekite ki ai.
11 Kua logona he fanau a Isaraela e tala, kua pehe age, Kitiala, kua ati he fanau a Reupena, mo e fanau a Kato, mo e taha veveheaga he magafaoa a Manase, e fatapoa, kua fakafehagai mo e motu ko Kanana ke he tapa a Ioritana, ke he mena ne o mai ai e fanau a Isaraela.
12 Kua logona he fanau a Isaraela, ti fakapotopoto ai e fakapotopotoaga oti he fanau a Isaraela i Sailo, ke o hake ke tau mo lautolu.
13 Ti fakafano atu ai he fanau a Isaraela, ke he fanau a Reupena, mo e fanau a Kato, mo e taha veveheaga he magafaoa a Manase, ke he motu ko Kiliata, a Fineaso ko e tama a Eleasaro ko e ekepoa;
14 Mo e tau iki tokohogofulu fakalataha mo ia, takitaha e magafaoa ne mua mo e iki ke he tau magafaoa oti ia Isaraela; ko lautolu takitokotaha ko e tau iki he tau magafaoa he tau matua ha lautolu, he tau takiafe ia Isaraela.
15 Ti o age a lautolu ke he fanau a Reupena, mo e fanau a Kato, mo e taha veveheaga he magafaoa a Manase ke he motu ko Kiliata, ti vagahau ai a lautolu kia lautolu kua pehe age,
16 Kua pehe mai e fakapotopotoaga oti a Iehova, Ko e heigoa kia e holifono nai kua holifono ai a mutolu ke he Atua a Isaraela, ke liliu kehe a mutolu ke he aho nai, he mumui atu kia Iehova, ke ati e mutolu ma mutolu e fatapoa ke fakafualoto ai a mutolu ke he aho nai kia Iehova?
17 Ne tote kia kia tautolu e mahani hepehepe ha tautolu i Peoro kua nakai fakamea ai a tautolu kua hoko mai ke he aho nai, pete ni e tatalu ne tupu ai ke he fakapotopotoaga a Iehova?
18 Ka kua liliu kehe a mutolu ke he aho nai he mumui atu a mutolu kia Iehova. Kua fakafualoto a mutolu kia Iehova ke he aho nai, ti ita mai a ia ke he fakapotopotoaga oti a Isaraela a pogipogi.
19 Ka ko e mena kaeke kua kelea e motu kua eke mo tufaaga ha mutolu, ti o atu a mutolu ke he motu kua eke mo tufaaga a Iehova, ko e mena ne tu ai e faituga a Iehova, ti eke ai e mutolu e tufaaga fakalataha mo mautolu; ka e aua neke fakafualoto a mutolu kia Iehova, ti ua fakafualoto mai a mutolu kia mautolu, ke ati e mutolu e fatapoa ke lafilafi ai ke he fatapoa a Iehova ha tautolu a Atua.
20 Nakai kia holifono a Akana ko e tama a Siraha ke he mena kua tuku atu kia Iehova, ti to mai ai e ita ki luga he fakapotopotoaga oti a Isaraela? Ti nakai mate tokotaha ai e tagata na ha ko e hana mahani hepehepe.
21 Ti tali age ai e fanau a Reupena, mo e fanau a Kato, mo e taha veveheaga he magafaoa a Manase, kua pehe age a lautolu ke he tau iki he tau takiafe ia Isaraela,
22 Ko Iehova, ko e Atua he tau atua; ko Iehova, ko e Atua he tau atua, kua iloa ni e ia, to iloa foki e Isaraela; kaeke ko e fakafualoto, po ke holifono kia Iehova, (aua neke fakamoui e mutolu a mautolu ke he aho nai,)
23 Ha kua ati ai e mautolu e fatapoa ma mautolu ke liliu kehe ai a mautolu he mumui atu kia Iehova; kaeke foki kua ati e mautolu e fatapoa ke eke ai ki luga hana e tau poa huhunu mo e tau poa mena kai; kaeke foki ke eke ai ki luga hana e tau poa fakaaue, kia kumi mai e Iehova ia;
24 Ka e nakai kia eke e mautolu e mena na ke he aho nai he matakutaku ai a mautolu he mena nai, kua pehe age, Neke vagahau mai he fanau ha mutolu ke he fanau ha mautolu a taha aho, kua pehe mai, Ko e heigoa kia ha mutolu kia Iehova ko e Atua a Isaraela?
25 Ko e mena tuku mai e Iehova a Ioritana ke eke mo katofia ke he vaha loto ha mautolu mo mutolu ko e fanau a Reupena na e mo e fanau a Kato na e; nakai fai tufaaga ma mutolu ia Iehova; ti fakaohooho pihia he fanau ha mutolu ha mautolu a fanau ke ua matakutaku a lautolu kia Iehova.
26 Ko e mena ia ne pehe ai a mautolu, Kia tauteute a a tautolu, ke ati ai e fatapoa, nakai eke ai e poe huhunu, po ke taha poa;
27 Ka kia eke mo fakamoli kia mautolu mo mutolu, mo e tau hau ke mumui mai kia tautolu, kia fekafekau ai a tautolu ke he gahua a Iehova ki mua hana ke he tau poa huhunu, mo e tau poa ha tautolu, mo e ha tautolu a tau poa fakaaue; ti aua neke pehe mai e fanau ha mutolu, ke he fanau ha mautolu a taha aho, Nakai fai tufaaga a mutolu kia Iehova.
28 Ti pehe age ai a mautolu, Ka pihia mai a lautolu a taha aho kia tautolu, po ke tau hau ha tautolu a mui, ti pehe atu ai a tautolu, Kikite la ke he fakatai he fatapoa a Iehova ne eke he tau matua ha mautolu, nakai eke ai e poa huhunu, to nakai eke ai taha poa; ka e eke ni mo fakamoli kia mautolu mo mutolu.
29 Kia mamao ia mautolu ke fakafualoto kia Iehova, mo e liliu kehe ai a mautolu ke he aho nai, he mumui atu kia Iehova, ke ati e mautolu e fatapoa ke eke ai e tau poa huhunu, po ke tau poa mena kai, po ke tau poa, ke lafilafi ke he fatapoa a Iehova ha tautolu a Atua, ha ha i mua hana faituga.
30 Ne logona e Fineaso ko e ekepoa, mo e tau iki he fakapotopotoaga, mo e tau iki he tau takiafe i Isaraela ne fakalataha mo ia, e tau kupu ne vagahau mai ai he fanau a Reupena, mo e fanau a Kato, mo e fanau a Manase, ti mitaki ia kia lautolu.
31 Ti pehe age a Fineaso ko e tama a Eleasaro ko e ekepoa, ke he fanau a Reupena, mo e fanau a Kato, mo e fanau a Manase, Kua iloa tuai e tautolu ke he aho nai, kua ha ha ia tautolu a Iehova, ha kua nakai holifono ai a mutolu kia Iehova ke he mena nai; ko e hanai, kua laveaki e mutolu e fanau a Isaraela mai he lima a Iehova.
32 Ti liliu mai ai a Fineaso ko e tama a Eleasaro ko e ekepoa, mo e tau iki mai he fanau a Reupena, mo e fanau a Kato, mo e fanau a Manase, mai he motu ko Kiliata ke he motu ko Kanana ke he fanau a Isaraela, mo e ta mai ai kia lautolu e tala.
33 Kua mitaki e tala ke he fanau a Isaraela; ti fakaaue atu ai e fanau a Isaraela ke he Atua, ti nakai tuai pehe a lautolu ke o hake ke tau kia lautolu, ke fakaoti ai e motu kua nonofo ai e fanau a Reupena, mo e fanau a Kato.
34 Kua fakahigoa ai he fanau a Reupena, mo e fanau a Kato e fatapoa, Ko e Fakamoli, ha ko e fakamoli haia kia lautolu, ko Iehova ko e Atua haia.