Iosua 23:1-16
23 KUA mole tuai e tau aho loga tali he eke e Iehova ke okioki ai a Isaraela mai ia lautolu oti ne fai fi kia lautolu ne agaagai mai kia lautolu; kua motua foki a Iosua kua loga tuai hana tau tau;
2 Ti ui age ai a Iosua kia Isaraela oti, ko e tau patu, mo e tau iki, mo e tau fakafili, mo e tau takitaki, kua pehe age a ia kia lautolu, Kua motua tuai au, kua loga haku tau tau;
3 Ka ko mutolu, kua kitia e mutolu e tau mena oti ne eke e Iehova ha mutola a Atua ke he tau motu oti ia ha ko mutolu; ha ko Iehova ko e ha mutolu a Atua ko ia ne tau ma mutolu.
4 Kitiala kua tufatufa tuai e au kia mutolu ke he vili e tau motu ia kua toe ke eke mo tufaaga ma e tau magafaoa ha mutolu, ke kamata mai i Ioritana, mo e tau motu oti ne fakaotioti ai e au, ke hoko atu ke he tahi lahi ke he mena ne hifo ai e la.
5 Ko Iehova foki ko e ha mutolu a Atua to vega e ia a lautolu ki mua ha mutolu, mo e tutuli kehe a lautolu ki mua ha mutolu, ti eke e mutolu ha lautolu a motu ma mutolu tuga ne vagahau mai e Iehova ha mutolu a Atua kia mutolu.
6 Ka kia fakamalolo a mutolu ke omaoma ke eke e tau mena oti kua tohia ke he tohi he fakatufono a Mose, aua neke o kehe a mutolu mo ia ke he fahi matau po ke fahi hema;
7 Neke fakalataha a mutolu mo e tau motu ia, ko lautolu na kua toe ia mutolu; aua foki neke totoku ai e mutolu e higoa he tau atua ha lautolu, ti aua neke omonuo ai a mutolu, ti ua fekafekau atu ai a mutolu, ti ua fakaveveli fakafohifo a mutolu kia lautolu;
8 Ka kia pipiki atu a mutolu kia Iehova ha mutolu a Atua, tuga ne eke e mutolu kua hoko mai ke he aho nai.
9 Ha kua vega e Iehova ki mua ha mutolu e tau motu lalahi mo e malolo; ka ko mutolu, nakai fai tagata ke tu ki mua ha mutolu ke totoko mai kia mutolu, kua hoko ke he aho nai.
10 To tutuli he tagata tokotaha ha mutolu e tau tagata taha ni e afe; ha ko Iehova ko e ha mutolu a Atua ke tau ma mutolu, tuga ne vagahau mai e ia kia mutolu.
11 A mutolu kia mutolu, ke fakaalofa atu a mutolu kia Iehova ha mutolu a Atua,
12 Ha ko e mena ka liliu a mutolu ki tua, mo e pipiki atu a mutolu ke he tau motu na kua toe, ko lautolu kua toe ia mutolu, mo e fakafetauaki a mutolu mo lautolu, ti o atu a mutolu kia lautolu, mo e o mai a lautolu kia mutolu.
13 Kia iloa ni e mutolu nakai tuai vega foki e Iehova ha mutolu a Atua e tau motu na ki mua ha mutolu; ka to eke a lautolu mo fakavai, mo hele kia mutolu, to eke foki a lautolu mo fahi ke he tau kahokaho ha mutolu, mo tau akau fotofoto foki ke he tau mata ha mutolu, ato fakaoti ai a mutolu mai he motu mitaki nai kua foaki mai e Iehova ha mutolu a Atua kia mutolu.
14 Kitiala foki, ko e fano ne fai au ke he aho nai ke he puhala he lalolagi oti; ka kua iloa e mutolu mo e ha mutolu a tau loto katoa, mo e ha mutolu a tau agaaga katoa, nakai to ha kupu taha he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu, nakai ni to ha kupu taha.
15 Ko e hanai, tuga ne hoko kia mutolu e tau mena mitaki oti ne vagahau mai ai e Iehova ha mutolu a Atua kia mutolu, to fakahoko pihia foki e Iehova e tau mena kelea oti kia mutolu, ato fakaoti ai e ia a mutolu mai he motu mitaki nai kua foaki mai e Iehova ha mutolu a Atua kia mutolu;
16 Ka holi e mutolu e maveheaga a Iehova ha mutolu a Atua ne poaki mai ai e ia kia mutolu, ti o a mutolu mo e fekafekau ai ke he tau atua kehe, mo e fakaveveli fakafohifo ai a mutolu kia lautolu; ti tupu ai e ita a Iehova kia mutolu, ti mahaikava alumaki a mutolu mai he motu mitaki kua foaki mai e ia kia mutolu.