Iosua 24:1-33
24 KUA fakapotopoto e Iosua e tau magafaoa oti a Isaraela ki Sikema, ti ui atu a ia ke he tau patu Isaraela, mo e tau iki ha lautolu, mo e ha lautolu a tau fakafili, mo e ha lautolu a tau takitaki; ti tutu ai a lautolu ki mua he Atua.
2 Ti pehe atu a Iosua ke he motu oti, Kua pehe mai a Iehova ko e Atua a Isaraela, Ne nonofo e tau matua ha mutolu ne aho mua ke he fahi atu he vailele, ko Taraha ko e matua a Aperahamo, mo e matua a Nakori; ti fekafekau ai a lautolu ke he tau atua kehe.
3 Ti ta mai e au ha mutolu a matua ko Aperahamo he fahi atu he vailele, ti takitaki ai e au a ia ke he motu oti ko Kanana, mo e fakatokologa ai e au hana fanau, mo e foaki atu e au kia ia a Isaako.
4 Ti foaki atu e au kia Isaako a Iakopo mo Esau; ti ta age e au e mouga ko Seira kia Esau ke eke ai mana, ka e o hifo a Iakopo mo e hana fanau ki Aikupito.
5 Ti fakafano atu e au a Mose mo Arona, mo e ta e au a Aikupito ke he tau mena ne eke ai e au kia lautolu; kua mole ia ti ta mai ai e au a mutolu.
6 Ti ta mai e au ha mutolu a tau matua i Aikupito; ti o mai ai a lautolu ke he tahi; ti tutuli mai a Aikupito ke he tau matua ha mutolu ke he tau kariota, mo e tau kau heke solofanua, ke he Tahi Kula.
7 Ti tagi atu a lautolu kia Iehova, ti tuku ai e ia e pouli ke he vaha loto ha lautolu mo Aikupito; ti fakahoko atu e ia e tahi ki luga ha lautolu, ti tanumia ai a lautolu; ne kitia he tau mata ha mutolu e tau mena ne eke ai e au ki Aikupito. Ti nonofo a mutolu ke he tutakale ke he tau aho loga.
8 Ti fakahoko atu e au a mutolu ke he motu he tau tagata Amori, ne nonofo ke he fahi atu a Ioritana; ti tau ai a lautolu mo mutolu; ti tuku atu e au a lautolu ke he tau lima ha mutolu, ti eke ai e mutolu ha lautolu a kelekele ma mutolu; ti fakaotioti ni e au a lautolu ki mua ha mutolu.
9 Ti matike a Palako ko e tama a Tiporu, ko e patuiki a Moapi, ti tau ai a ia mo Isaraela; ti fakafano atu e ia e ogo kia Palaamo ko e tama a Peoro, mo e ui age kia ia ke kaialu atu kia mutolu.
10 Ka e nakai mafai au ke fanogonogo kia Palaamo; ko e mena ia ne fakamonuina atu e ia kia mutolu, ti laveaki mai e au a mutolu he lima hana.
11 Ti o mai a mutolu ke he fahi nai a Ioritana, ti hoko mai a mutolu ki Ieriko; ti tau ai mo mutolu e tau tagata Ieriko, ko e tau tagata Amori, mo e tau tagata Perisi, mo e tau tagata Kanana, mo e tau tagata Heti, mo e tau tagata Kirekasi, ko e tau tagata Hivi, mo e tau tagata Iepusi; ti tuku atu e au a lautolu ke he tau lima ha mutolu.
12 Ti fakafano atu e au e tau lago siraga ke mumua atu kia mutolu, ti vega ai a lautolu mai mua ha mutolu, ko e tau patuiki ne tokoua he tau tagata Amori, ka e nakai vega ai a lautolu ke he hau a pelu mo e hau a kaufana.
13 Kua ta atu e au kia mutolu e motu nakai fakafita ai a mutolu, mo e tau maga nakai ati e mutolu kua nonofo ai a mutolu; ti kai ai foki e mutolu e tau ulu vine, mo e tau ulu olive nakai to e mutolu.
14 Ko e hanai, kia matakutaku a mutolu kia Iehova, ti fekafekau atu a mutolu kia ia mo e loto katoa mo e fakamoli; ka kia tuku kehe e mutolu e tau atua ne fekafekau ki ai e tau matua ha mutolu ke he fahi atu he vailele mo Aikupito, ti fekafekau atu a mutolu kia Iehova.
15 Kaeke foki kua kelea kia mutolu ke fekafekau kia Iehova, tififili la e mutolu ke he aho nai, po ko hai ke fekafekau ki ai a mutolu; po ke tau atua ne fekafekau ki ai ha mutolu a tau matua ke he fahi atu he vailele, po ke tau atua he tau tagata Amori, ko e ha lautolu a motu kua nonofo ai a mutolu; ka ko au mo e haku a magafaoa, to fekafekau a mautolu kia Iehova.
16 Ti tali mai ai he motu, kua pehe mai, Kia mamao ia mautolu ke tiaki e mautolu a Iehova, ke fekafekau ai ke he tau atua kehe;
17 Ha ko Iehova ko e ha tautolu a Atua, ko ia ni ne ta hake a tautolu mo e ha tautolu a tau matua, he motu ko Aikupito, ko e mena ne nonofo fakatupa ai a tautolu; ko ia foki ne eke e tau fakamailoga lalahi ki mua ha tautolu, mo e leoleo mai kia tautolu ke he puhala oti ne o mai ai a tautolu, mo e tau motu oti ne o mai ai a tautolu.
18 Kua vega foki e Iehova ki mua ha tautolu e tau motu oti, ko e tau tagata Amori ni ko lautolu ne nonofo ai ke he motu; ko mautolu foki to fekafekau ai a mautolu kia Iehova, ha ko e Atua ni ha tautolu a ia.
19 Ti pehe atu ai a Iosua ke he motu, Nakai maeke kia mutolu ke fekafekau kia Iehova, ha ko e Atua tapu a ia; ko e Atua ita tafua a ia; nakai fakamagalo ai e ia ha mutolu a tau holifono, mo e ha mutolu a tau hala.
20 Kaeke ke tiaki e mutolu a Iehova, mo e fekafekau a mutolu ke he tau atua kehe, ti liu mai a ia, mo e fakamamahi a mutolu, mo e fakaoti ai a mutolu, ka ko ia ni ne mahani mitaki mai fakamua kia mutolu.
21 Ti pehe mai ai e motu kia Iosua, Nakai, to fekafekau ni a mautolu kia Iehova.
22 Ti pehe atu ai a Iosua ke he motu, Kua eke a mutolu mo tau fakamoli kia mutolu, kua fifili e mutolu a Iehova ke fekafekau a mutolu kia ia. Ti pehe mai a lautolu, Ko e tau fakamoli ni a mautolu.
23 Ti pehe atu a ia, Hanai, kia tuku kehe e mutolu e tau atua kehe ha ha ia mutolu, mo e hagao atu e tau loto ha mutolu kia Iehova ko e Atua a Isaraela.
24 Ti pehe mai ai e motu kia Iosua, To fekafekau a mautolu kia Iehova ha tautolu a Atua; to fanogonogo foki a mautolu ke he hana tau kupu.
25 Ti eke ai e Iosua ke he aho ia e maveheaga mo e motu; ti eke ai foki e ia ma lautolu e fakatufono, mo e fakafiliaga i Sikema.
26 Ti tohi ai e Iosua e tau kupu na ke he tohi he fakatufono he Atua; ti uta e ia e maka lahi, mo e to ai ke he mena ia i lalo he aluna ne fetataaki mo e faituga a Iehova.
27 Ti pehe atu a Iosua ke he motu oti, Kitiala e maka nai to eke ia mo fakamoli kia tautolu; he kua logona e ia e tau kupu oti ne vagahau mai a ia kia tautolu; to eke ia mo fakamoli kia mutolu, neke fakatikai e mutolu ha mutolu a Atua.
28 Ti toka atu e Iosua e motu ke o takitaha ke he hana tufaaga.
29 Kua mole he tau mena ia, ti mate a Iosua ko e tama a Nuno, ko e fekafekau a Iehova; ko e hana tau tau ne taha e teau ti hogofulu e tau.
30 Ti tanu e lautolu a ia ke he katofia he hana tufaaga i Timenata-sera ke he mouga ko Efaraimo, ke he fahi tokelau he mouga ko Kaasa.
31 Ne fekafekau ai a Isaraela kia Iehova ke he tau aho oti a Iosua, mo e tau aho oti he tau patu kua momoui agaia ka kua mole atu a Iosua, ko lautolu ne iloa e tau gahua oti ne eke ai e ia kia Isaraela.
32 Ko e tau hui atua foki a Iosefa ne ta hake ai he fanau a Isaraela i Aikupito, ne tanu ai e lautolu i Sikema ke he fahi fonua, ne fakatau e Iakopo mai he fanau a Hamora ko e matua tane a Sikema, ke he tau tupe taha ni e teau; ti eke mo tufaaga he fanau a Iosefa.
33 Kua mate foki a Eleasaro ko e tama a Arona, ti tanu e lautolu a ia ke he mouga a Fineaso hana tama, ne ta age kia ia ke he mouga ko Efaraimo.