Iosua 3:1-17
3 KUA uhu matike a Iosua ke he magaaho pogipogi; ti o ai a lautolu i Sitima, kua hoko atu a lautolu ki Ioritana, ko ia katoa mo e fanau oti a Isaraela, ti nonofo ai a lautolu ke he mena ia ka e nakaila o a lautolu ke he fahi atu a Ioritana.
2 Kua mole atu tolu e aho ti o ai e tau iki he motu ke he tau vaha loto he heaga api;
3 Ti poaki atu e lautolu ke he motu kua pehe atu, Ka kitia atu e mutolu e puha he maveheaga a Iehova ha mutolu a Atua, kua uta he tau ekepoa ko e tau tagata Levi, ti o atu a mutolu he mena kua nonofo ai a mutolu mo e mumui atu ki ai.
4 Ka kia toka ai e mutolu e vaha ke he vaha loto ha mutolu mo e puha, ke ua e afe kupita ka fafati; aua neke fakatata a mutolu ki ai, kia kitia ai e mutolu e puhala ke o atu ai a mutolu; ha ko e mena nakai o ai a mutolu ke he puhala nai ke he tau vaha kua mole.
5 Kua pehe age foki a Iosua ke he motu, Kia fakatapu e mutolu a mutolu; ha ko e aho a pogipogi ke eke ai e Iehova e tau mana ki mua ha mutolu.
6 Ti tala age a Iosua ke he tau ekepoa kua pehe age, Kia uta e mutolu e puha he maveheaga, mo e o atu a mutolu ki mua he motu. Ti uta e lautolu e puha he maveheaga, mo e o atu ai a lautolu ki mua he motu.
7 Kua pehe mai foki a Iehova kia Iosua, Ko e aho nai ke kamata ai e au ke fakalilifu atu kia koe ki mua a Isaraela oti, ke iloa ai e lautolu ke tuga ne fakalataha au mo Mose, to fakalataha pihia au mo koe.
8 Ti poaki age e koe ke he tau ekepoa kua uta e puha he maveheaga, kia pehe age, Ka hoko a mutolu ke he kauvai a Ioritana, ti tutu ai a mutolu i Ioritana.
9 Ti pehe atu a Iosua ke he fanau a Isaraela, Kia fakatata mai a mutolu ki hinai, mo e fanogonogo mai a mutolu ke he tau kupu a Iehova ha mutolu a Atua.
10 Ti pehe atu a Iosua kia lautolu, Ko e mena hanai ke iloa ai e mutolu, ha ha ia mutolu e Atua moui, to vegavega foki ni e ia ki mua ia mutolu e tau tagata Kanana, mo e tau tagata Heti, mo e tau tagata Hivi, mo e tau tagata Perisi, mo e tau tagata Kirekasi, mo e tau tagata Amori, mo e tau tagata Iepusi;
11 Kitiala, ko e puha he maveheaga, ko e Iki ni he lalolagi oti kua haele atu ai ki mua ia mutolu ki Ioritana.
12 Ko e hanai, kia uta e mutolu e tau tagata tokohogofulu ma ua mai he tau magafaoa a Isaraela, ke takitaha e magafaoa mo e tagata.
13 Ka tutu ai ke he vai a Ioritana e tau aloalohui he tau ekepoa ne uta e puha a Iehova; ko e Iki he lalolagi oti, ti veveheua ai e vai a Ioritana; ko e vai ne tafe hifo mai i luga; ti tu ai foki e vai ke tuga ne tumutumu.
14 Ti o atu ai e motu he tau fale ie ha lautolu, ke o ke he fahi atu a Ioritana; ne uta foki he tau ekepoa e puha he maveheaga ki mua he motu;
15 Kua hoko atu a lautolu ne uta e puha ki Ioritana, mo e pala ai e tau hui he tau ekepoa ne uta e puha ke he kauvai; (ha ko e mena lofia e tau kauvai oti a Ioritana ke he tau aho oti he heleheleaga saito;)
16 Ti tu ai e vai ne tafe hifo i luga, kua tu hake ni tuga ne tumutumu, ne mamao ni ke hoko ke he maga ko Atama, ne tata age ki Saretana; ko e vai ne tafe hifo ke he tahi ke he kelekele tatai; ko e Tahi Kona haia; ne pakupaku, mo e veveheua ai; ti o ai e motu ke he fahi atu ke he mena kua fehagai mo Ieriko.
17 Ti tutu mau ai e tau ekepoa ne uta e puha he maveheaga a Iehova, ke he hala toka momo ki loto a Ioritana; ti o atu ai a Isaraela oti ke he hala toka momo, ato maeke e motu oti he o ke he fahi atu a Ioritana.