Iosua 4:1-24
4 KUA oti he o atu e motu oti ke he fahi atu a Ioritana, ti vagahau mai e Iehova kia Iosua kua pehe mai,
2 Kia uta e mutolu mai he motu e tau tagata tokohogofulu ma ua, ke takitaha e magafaoa mo e tagata;
3 Ti poaki age e koe kia lautolu, kia pehe age, Kia uta e mutolu mai he mena nai ki loto, a Ioritana, e tau maka ne hogofulu ma ua, mai he mena ne tu mau ai e tau hui he tau ekepoa, ti uta e mutolu e tau maka ia mo e to ai ke he mena ke heapi ai, ke he mena ke momohe ai a mutolu ke he po a magaaho.
4 Ti ui e Iosua ke he tau tagata tokohogofulu ma ua ne kotofa mai he fanau a Isaraela ke takitaha e magafaoa mo e tagata.
5 Ti pehe age a Iosua kia lautolu, Kia o atu a mutolu ki mua he puha a Iehova ha mutolu a Atua ki loto a Ioritana, ti takitaha a mutolu mo e ta hake ki luga e maka ke he hana fulima, ke lata mo e tau magafaoa he fanau a Isaraela;
6 Kia eke ai e mena na mo fakamailoga kia mutolu, ka huhu mai e fanau ha mutolu kia mutolu a taha aho, kua pehe mai, Ko e heigoa kia e kakano he tau maka na kia mutolu?
7 Ti tali atu ai a mutolu kia lautolu, Ne veveheua ai e vai a Ioritana kia mua he puha he maveheaga a Iehova, ne hifo atu a ia ki Ioritana, ti veveheua ai e vai a Ioritana. Ti eke ai e tau maka na mo fakamanatuaga tukulagi ke he fanau a Isaraela.
8 Ti eke pihia he fanau a Isaraela tuga ne poaki atu ai e Iosua kia lautolu; ne uta a lautolu hogofulu ma ua e maka mai loto a Ioritana, tuga ne vagahau mai e Iehova kia Iosua, ke lata mo e tau magafaoa he fanau a Isaraela, ti uta ai e lautolu e tau maka ia ke he mena ne heapi ai a lautolu mo e to ai ke he mena ia ni.
9 Kua to foki e Iosua e tau maka ne hogofulu ma ua ki loto a Ioritana ke he tau mena ne tutu ai e tau hui he tau ekepoa ne uta ai e puha he maveheaga; ti ha i ai foki ke he mena ia ke hoko mai ke he aho nai.
10 Ne tutu ai e tau ekepoa ne uta e puha ki loto a Ioritana, ato mau e tau mena oti ne poaki mai ai e Iehova kia Iosua he vagahau atu ai ke he motu, ke lata mo e tau mena oti ne poaki age ai e Mose kia Iosua; ti alumaki e motu mo e o atu a lautolu ke he fahi atu.
11 Kua maeke e motu oti he o ke he fahi atu, ti o atu ai e puha a Iehova, mo e tau ekepoa ki mua he motu.
12 Ne o atu ai e fanau a Reupena, mo e fanau a Kato, mo e taha veveheaga he magafaoa a Manase, ko e tau tagata kua tauteute ke tau, ki mua he fanau a Isaraela, tuga ne vagahau atu ai a Mose kia lautolu.
13 Ko e tau tagata kua tauteute ke tau tokai ne fagofulu e afe a lautolu, ne o atu ai ki mua a Iehova, ke tau ai ke he tau ke he kelekele tatai a Ieriko.
14 Ko e aho ia ne fakalilifu atu ai e Iehova kia Iosua ki mua a Isaraela oti; ti matakutaku a lautolu kia ia, tuga ne matakutaku ai a lautolu kia Mose, ke he tau aho oti he hana moui.
15 Ti vagahau mai e Iehova kia Iosua, kua pehe mai,
16 Kia poaki atu e koe ke he tau ekepoa ne uta e puha he fakatufono, ke o hake a lautolu i Ioritana.
17 Ti poaki atu ai e Iosua ke he tau ekepoa, kua pehe atu, Kia o hake a mutolu i Ioritana.
18 Ti o hake ai e tau ekepoa ne uta e puha he maveheaga a Iehova mai loto a Ioritana, ne tutu hake e tau aloalohui he tau ekepoa ke he kelekele momo; ti liu tafe mai ai e vai a Ioritana ke he hana toka, ti lofia ai hana tau kauvai oti ni ke tuga ne eke fakamua.
19 Ne o hake e motu mai Ioritana ke he aho hogofulu he mahina fakamua, ti heapi ai a lautolu i Kilikala, ke he fahi uta a Ieriko.
20 Ti to ai e Iosua i Kilikala e tau maka ne hogofulu ma ua, ne uta ai e lautolu i Ioritana.
21 Ti vagahau e ia ke he fanau a Isaraela, kua pehe age, Ka huhu mai he fanau ha mutolu a taha aho ke he tau matua ha lautolu, kua pehe mai, Po ke heigoa e kakano he tau maka na?
22 Ti fakailoa atu e mutolu ke he fanau ha mutolu, kia pehe atu, Ne o mai a Isaraela i Ioritana nai, ke he hala toka momo;
23 Ha ko e mena fakapakupaku ai e Iehova ha mutolu a Atua e vai a Ioritana ki mua ha mutolu, ato o atu ai a mutolu, tuga ne eke e Iehova ha mutolu a Atua ke he Tahi Kulu, ne fakapakupaku ai e ia ki mua he tautolu ato o atu ai a tautolu;
24 Kia iloa ai he tau motu oti he lalolagi e lima malolo a Iehova; kia matakutaku a mutolu kia Iehova ha mutolu a Atua ke he tau aho oti ni.