Iosua 6:1-27
6 KUA pāpā malu a Ieriko na ko e fanau a Isaraela, nakai hu atu taha, ti nakai hu mai taha.
2 Ti pehe mai a Iehova kia Iosua, Kitiala, kua tuku atu e au ke he hau a lima a Ieriko, mo e hana iki, mo e hana tau toa malolo.
3 Kia agaagai a mutolu, ko e tau tagata tau oti, ke he maga, takilaga taha ke he aho ke takai ai a mutolu e maga. Kia eke pihia a mutolu ke he tau aho ne ono.
4 Ti uta ai he tau ekepoa ne tokofitu fitu e pu he iupeli ki mua he puha; ti takai ai lagafitu e mutolu e maga ke he aho ke fitu aki, ti ulo ai foki he tau ekepoa e tau pu.
5 Ka ulo fakaloa e lautolu e tau pu, ka logona e mutolu e leo he pu, ti kalaga ai e motu oti mo e leo lahi; ti malolo hifo ai e kaupa he maga; ti o hake ai e motu oti takitaha ki mua ha lautolu.
6 Ti ui age a Iosua ko e tama a Nuno ke he tau ekepoa mo e pehe age a ia kia lautolu, Kia uta e mutolu e puha he maveheaga a Iehova, ti uta ai foki he tau ekepoa ne tokofitu fitu e pu he iupeli, ki mua he puha a Iehova.
7 Ti pehe atu foki a ia ke he motu, Kia o atu a a mutolu mo e takai ai e maga, ko mutolu kua tauteute ke tau kia o atu a mutolu ki mua he puha a Iehova.
8 Kua mole atu e tau kupu a Iosua ke he motu ti o atu ai e tau ekepoa ne tokofitu, kua uta e lautolu fitu e pu he iupeli ki mua a Iehova, ti ulo ai e lautolu e tau pu, ti mui atu ai kia lautolu e puha he maveheaga a Iehova.
9 Kua o atu foki e tau tagata kua tauteute ke tau ki mua he tau ekepoa kua ulo e tau pu; ti mumui atu e muiakikau ke he puha, ko e tau ekepoa kua mumua atu mo e ulo e tau pu.
10 Kua poaki atu foki e Iosua ke he motu kua pehe atu, Aua neke kalaga a mutolu, ti aua neke logona ai ha mutolu a leo; ti aua foki neke to ha kupu mai he tau gutu ha mutolu, ato hoko ke he aho ke pehe atu au, ke kalaga, ti kalaga ai a mutolu.
11 Ti takai ai he puha a Iehova ke he maga, laga taha he takai; ti o mai a lautolu ke he heaga api, ti momohe ai a lautolu ke he heaga api.
12 Ti uhu matike a Iosua ke he magaaho pogipogi, kua uta foki he tau ekepoa e puha a Iehova.
13 Kua uta he tau ekepoa ne tokofitu e tau pu he iupeli ne fitu ki mua he puha a Iehova, kua o atu a lautolu mo e ulo e tau pu; ti o atu foki ki mua ha lautolu e tau tagata kua tauteute ke tau, ka kua mumui atu e muiakikau ke he puha a Iehova; ko e tau ekepoa ne mumua atu mo e ulo e tau pu.
14 Ko e aho ua foki ne takai lagataha a lautolu e maga, ti liliu mai ai a lautolu ke he heagaapi; ti eke ai pihia e lautolu ke he tau aho ne ono.
15 Ka ko e aho fitu ne uhu matike a lautolu ke he matafatafaata he aho, mo e takai ai pihia e lautolu e maga ke fitu aki, ka ko e aho ia ne takai ai lagafitu e lautolu e maga.
16 Kua hoko ke he laga fitu, kua ulo ai he tau ekepoa e tau pu; ti pehe atu a Iosua ke he motu, Kia kalaga a ha kua foaki mai ai e Iehova e maga kia mutolu.
17 Ti tuku atu ai e maga, ko e maga ni, mo e tau mena oti ha ha i ai ma Iehova, ka ko Raava ko e fifine fakataka ke moui a ia; ko ia, mo lautolu oti ha ha he fale mo ia, he fufu ai e ia e tau fekau ne fakafano atu e tautolu.
18 Ka ko mutolu, kia fakaeneene a mutolu mo e mena kua tuku atu kia Iehova; neke eke a mutolu mo mena kua tuku atu kia Iehova ka uta e mutolu ha mena kua tuku atu ai; ti eke foki e mutolu e heagaapi mo mena kua tuku atu kia Iehova; mo e fakalavelave ki ai a mutolu.
19 Ka ko e ario oti, mo e auro, mo e tau kapiniu apa kula, mo e tau kapiniu lapatoa, kua tapu ia kia Iehova, to uta ia ke he tokaaga koloa a Iehova.
20 Kua ulo he tau ekepoa e tau pu, ti kalaga ai e motu; ne logona he motu e leo he pu, ti kalaga ai a lautolu mo e leo lahi, ti malŏlŏ hifo ai e tau kaupa he maga, ti o hake ai e motu ke he maga takitaha ki mua ha lautolu, ti fofo ai e lautolu e maga.
21 Ti fakaoti ai e lautolu ke he pelu a lautolu oti ha ha he maga, ko e tau tane mo e tau fifine, ko e tau tama mo e tau fuakau, katoa mo e tau povi, mo e tau mamoe, mo e tau asini;
22 Ka e pehe atu a Iosua ke he tau tagata tokoua ne o ke toko ke he motu, Kia o a mua ke he fale he fifine fakataka, mo e ta mai ai e fifine mo lautolu oti ha ha ia ia, ke tuga ne omonuo ai a mua kia ia.
23 Ti o age e tau fuata ne toko ke he motu, mo e ta mai ai e lautolu a Raava, mo e hana matua tane, mo e hana matua fifine, mo e hana tau tugane, mo lautolu oti ha ha ia ia; ne ta mai e laua hana magafaoa oti, mo e toka ai ki tua he heaga api a Isaraela.
24 Ka e huhunu e lautolu ke he afi e maga mo e tau mena oti ha ha i ai; ka ko e ario, mo e auro, mo e tau kapiniu apa kula, mo e tau kapiniu lapatoa, ne tuku ai e lautolu ke he tokaaga koloa ke he fale a Iehova.
25 Ne fakamoui e Iosua a Raava ko e fifine fakataka, mo e magafaoa he hana matua tane, mo lautolu oti ha ha ia ia; kua nofo foki a ia i Isaraela ke hoko mai ke he aho nai; ha ko e mena fufu e ia e tau fekau ne fakafano atu e Iosua ke toko ki Ieriko.
26 Ti omonuo ai a Iosua ke he aho ia, kua pehe atu a ia, Kia malaia e tagata ki mua a Iehova kua matike ke ati foki e maga nai ko Ieriko; to tuku ai e ia hana tau fakaveaga ke he hana tama uluaki, ti fakatu ai e ia hana tau gutuhala ke he hana tama fakamui.
27 Ne fakalataha a Iehova mo Iosua; ti hoko foki e tala kia ia ke he tau motu oti.