Iosua 7:1-26
7 KA e hala e fanau a Isaraela ke he mena kua tuku atu ai kia Iehova; ha ko Akana, ko e tama a Karame, ko e tama a Sapata, ko e tama a Siraha, ko e magafaoa a Iuta, ne uta ai e ia falu a mena he tau mena kua fakatoka atu; ti tupu ai ni e ita a Iehova ke he fanau a Isaraela.
2 Kua fakafano atu e Iosua e tau tagata mai Ieriko ki Ai, ne tata age ki Petavene, ke he fahi uta a Peteli; kua tala age a ia kia lautolu, kua pehe age, Kia o hake a mutolu mo e toko ke he motu, ti o hake ai e tau tagata mo e toko atu ke he motu.
3 Kua liliu mai a lautolu kia Iosua ti pehe age a lautolu kia ia, Aua neke o hake e motu, oti; ka kia o hake e tau tagata ne ua e afe, po ke tolu e afe ke ta e lautolu a Ai; ka e aua neke fakafita e motu oti ke o hake ki ai; ha ko e mena tokogaogao a lautolu.
4 Ti o hake ai e tau tagata he motu tokāi ko e tolu e afe ke he mena ia; ka e fehola ni a lautolu ki mua he tau tagata Ai.
5 Ti keli he tau tagata Ai ia lautolu, tokai ko e toko tolugofulu ma ono e tagata; ha ko e mena tutuli e lautolu a lautolu ke kamata mai he gutuhala he maga, ke hoko ki Siparema, mo e keli a lautolu ha ne o hifo ai; ti faliu puke vai ai e tau loto he motu, ke tuga ne maga vai ni.
6 Ti hehe ai e Iosua hana tau tapulu, mo e fakaveli fakafohifo ai a ia ke he kelekele ki mua he puha a Iehova, kua hoko ke he afiafi, ko ia, mo e tau patu Isaraela; ti tuku e lautolu e efuefu ki luga he tau ulu ha lautolu.
7 Kua pehe age foki a Iosua, Oi te! ko e Iki na e, Iehova, ko e ha ne fakahoko mai e koe e motu nai ke he fahi nai a Ioritana ke tuku atu ai a mautolu ke he lima he tau tagata Amori, ke fakaoti ai a mautolu? Ka ne nonofo ai a mautolu ke he fahi atu a Ioritana po kua mitaki!
8 Ko e Iki na e, ko e heigoa haku ke tala atu ai ka liu tua ai a Isaraela ki mua ha lautolu kua fai fi mai?
9 Ha ko e mena logona ai he tau tagata Kanana, katoa mo lautolu oti kua nonofo ke he motu, ti agaagai mai a lautolu kia mautolu, mo e tamate ai e lautolu ha mautolu a higoa mai he lalolagi; to fefe foki hau a higoa lilifu?
10 Ti pehe mai ai a Iehova kia Iosua, Kia matike a koe; ko e ha kua fakaveli fakafohifo ai pihia a koe?
11 Kua hala a Isaraela, kua holi foki e lautolu haku a maveheaga ne poaki atu ai e au kia lautolu, kua uta mena foki e lautolu mai he tau mena kua tuku mai, kua kaiha e lautolu, mo e fakavai foki, mo e tuku ai ni e lautolu e tau mena ia mo e tau mena ha lautolu.
12 Kua nakai maeke e fanau a Isaraela ke tutu ki mua ha lautolu kua fai fi kia lautolu, kua liliu ki tua a lautolu ki mua ha lautolu kua fai fi kia lautolu, ha kua tuku mai a lautolu, nakai liu foki ke fakalataha au mo mutolu, ka nakai fakaoti ai e mutolu a lautolu kua tuku mai mai ia mutolu.
13 Kia matike ā, mo e fakatapu e koe e motu, mo e pehe atu a koe kia fakatapu ai e mutolu a mutolu ke lata mo a pogipogi, ha kua pehe mai a Iehova ko e Atua a Isaraela, Isaraela na e, ha ha ia koe e mena kua tuku atu ai kia Iehova; ti nakai maeke ke tu ai a koe ki mua ha lautolu kua fai fi kia koe ato uta kehe ai e mutolu ia mutolu e mena kua tuku atu.
14 Kia fakapotopoto mai ai a pogipogi ha mutolu a tau magafaoa; ko e magafaoa ka moua a Iehova, kia fakatata mai a ia mo e tau patu he hana tau kaina, ko e patu he kaina ka moua e Iehova, ke hau ai a ia mo e tau patu he hana kaina, ko e fale foki ka moua e Iehova kia fakatata mai ai hana tau tagata takitokotaha.
15 Ko e tagata ke moua ha ha ia ia e mena kua tuku atu kia Iehova, to huhunu ai a ia ke he afi, ko ia ni, katoa mo e hana tau mena oti; ha kua holi e ia e maveheaga a Iehova, ha kua eke foki e ia e mena kelea i Isaraela.
16 Ti uhu matike a Iosua ke he magaaho pogipogi, ti fakatata mai e ia a Isaraela ke he ha lautolu a tau magafaoa, ti moua ai e magafaoa a Iuta.
17 Ti fakapotopoto mai e ia e tau patu he tau kaina a Iuta, ti moua ai e ia e kaina he tau tagata Siraha; kua fakatata mai e ia e tau tagata takitokotaha he kaina he tau tagata Siraha ti moua ai a Sapata.
18 Ti fakatata mai e ia e tau tagata he hana tau fale takitokotaha; ti moua ai a Akana, ko e tama a Karame, ko e tama a Sapata, ko e tama a Siraha, ko e magafaoa a Iuta.
19 Ti pehe atu ai a Iosua kia Akana, Haku tama na e, kia tuku atu la e lilifu kia Iehova, ko e Atua a Isaraela, mo e fakakite atu e koe kia ia ho mena; ti tala mai e koe kia au e mena kua eke e koe, aua neke fufu e koe ia au.
20 Ti tali mai ai a Akana kia Iosua, kua pehe mai, Ko e moli kua hala tuai au ki mua a Iehova ko e Atua a Isaraela, kua eke ai e au pehe mo e pehe;
21 Ne kitia e au ke he tau mena kua fofo he tau taha tapulu Sinara kua mitaki, mo e tau sikeli ario ne ua e teau, mo e tepu auro ne limagofulu e sikeli hana mamafa, ti manako au ki ai, ti uta ai ni e au, kitiala, kua tanu ai ke he kelekele ki loto haku a fale ie, ko e ario foki kua tokai i lalo.
22 Ti fakafano atu e Iosua e tau fekafekau; ti tafepoi atu ai a lautolu ke he fale ie, kitiala, kua tanu ai e tau mena ia ke he hana fale ie, ko e ario foki ne tokai i lalo.
23 Ti uta e lautolu e tau mena ia mai he loto fale ie, mo e ta mai ai kia Iosua, katoa mo e fanau a Isaraela oti, mo e tuku atu ai e lautolu ia ki mua a Iehova.
24 Ti o age a Iosua, mo Isaraela oti fakalataha mo ia ti uta e lautolu a Akana ko e tama a Siraha, mo e ario, mo e tapulu, mo e tepu auro, mo e hana tau tama tane, mo e hana tau tamafifine, mo e hana tau povi, mo e hana tau asini, mo e hana tau mamoe, mo e hana fale ie, mo e tau mena oti ha ha ia ia, ti o hake a lautolu mo lautolu ke he pahua a Akori.
25 Ti pehe atu a Iosua kia ia, Kua fakalavelave mai e koe kia mautolu he ha? to fakalavelave atu e Iehova kia koe ke he aho nai. Ti pinimaka e Isaraela oti a ia, ti huhunu ai e lautolu a lautolu ke he afi, ka kua oti he pini aki e lautolu a lautolu ke he tau maka.
26 Ti fakapotopoto ai e lautolu e tau maka ki luga hana, ko e tanakiaga maka lahi ni, kua hoko mai ke he aho nai. Ti mafoki kehe ai a Iehova mo e hana ita lahi; ko e mena ia kua ui ai e higoa he mena ia, Ko e pahua a Akori, kua hoko mai ke he aho nai.