Iosua 9:1-27
9 KUA logona he tau patuiki oti ha he fahi mai nai a Ioritana, ke he mouga, mo e vaha mouga, mo e fahi oti he tahi lahi ne fehagai mo Lepanona, ko e tau tagata Heti, mo e tau tagata Amori, ko e tau tagata Kanana, ko e tau tagata Perisi, ko e tau tagata Hivi, mo e tau tagata Iepusi;
2 Ti tutuuta fakalataha ai a lautolu ke tau ai mo Iosua mo Isaraela; kua taha ni e loto.
3 Kua fanogonogo e tau tagata kua nonofo i Kipeona ke he tau mena kua eke e Iosua ki Ieriko, mo Ai;
4 Ti eke lagatau fakavai e lautolu, ne o a lautolu, mo e eke ko e tau fekau a lautolu; ne uta ai e lautolu e tau taga popo ki luga he tau asini ha lautolu, mo e tau lupo kili manu tuku uaina kua popo, mo e mahehe, mo e haihai;
5 Ko e tau afialoalohui popo foki kua fono ha he tau hui ha lautolu, mo e tau tapulu popo ne tapulu ai a lautolu; ko e tau areto oti foki he oho ha lautolu kua magomago, mo e valavala.
6 Ti o age a lautolu kia Iosua ke he heaga api a Kilikala, mo e pehe age a lautolu kia ia mo e tau tagata Isaraela, Kua o mai a mautolu nai he motu mamao; ko e hanai, kia eke ai e tautolu e maveheaga mo mutolu.
7 Ti pehe age e tau tagata Isaraela ke he tau tagata Hivi, Na kua nonofo a mutolu fakalataha mo mautolu heutehepihia; po ke eke fefe e tautolu e maveheaga mo mutolu?
8 Ti pehe age a lautolu kia Iosua, Ko e tau fekafekau hau a mautolu. Ti pehe age ai a Iosua kia lautolu, Ko hai kia a mutolu? ti o mai i fe kia a mutolu?
9 Ti pehe age a lautolu kia ia, Ko e motu mamao lahi ni kua o mai ai hau a tau fekafekau, ha ko e higoa a Iehova hau a Atua; ha kua fanogonogo a mautolu ke he tala kia ia, mo e tau mena oti ne eke ai e ia i Aikupito;
10 Ko e tau mena oti foki ne eke e ia ke he na patuiki tokoua he tau tagata Amori, ne ha i ai ke he fahi atu a Ioritana; ko Sikono ko e patuiki i Hesepono, mo Oko ko e patuiki i Vasana, ne nofo i Aserota.
11 Ko e mena ia ne vagahau mai he tau patu ha mautolu, mo lautolu oti kua nonofo ke he motu ha mautolu kia mautolu kua pehe mai, Kia uta e mutolu e oho mo e fenoga ha mutolu, ti o ai a mutolu ke fonofono a lautolu, mo e pehe age a mutolu, Ko e tau fekafekau ha mutolu a mautolu; ko e hanai, kia eke ai e tautolu e maveheaga mo mautolu.
12 Ko e ha mautolu a areto nai ne taute ai mo oho ma mautolu, ne mafana ke he aho ne o mai ai a mautolu he tau fale ha mautolu ke o mai kia mutolu; ko e hanai, kitiala, kua magomago mo e valavala.
13 Ko e tau lupo kili manu tuku uaina nai ne utu fou e mautolu, kitiala foki, kua mahehe tuai, ko e ha mautolu a tau tapulu nai foki mo e tau afialoalohui ha mautolu kua popo, ha kua mamao lahi e puhala ne o mai ai a mautolu.
14 Ti uta he tau patu mai he tau mena kai ha lautolu, ka e nakai huhu atu ke he finagalo he Atua.
15 Ti eke ai e Iosua e maveheaga mo lautolu, ti eke foki e ia e maveheaga mo lautolu ke momoui ai a lautolu; ti omonuo ai foki e tau iki he fakapotopotoaga kia lautolu.
16 Kua mole atu e tau aho ne tolu tali he eke ai e lautolu e maveheaga mo lautolu, ti logona ai e lautolu kua katofia a lautolu mo lautolu, ti nonofo ai a lautolu mo lautolu.
17 Ti o fenoga ai e fanau a Isaraela, tolu ni e aho ti hoko atu a lautolu ke he tau maga ha lautolu; ko e ha lautolu a tau maga hanai, ko Kipeona, mo Kafira, mo Perota, mo Kiriata-iarima.
18 Ti nakai keli he fanau a Isaraela a lautolu, ha kua omonuo ai he tau iki he fakapotopotoaga kia lautolu, kia Iehova ko e Atua a Isaraela. Ti loma ai e fakapotopotoaga oti ke he tau iki.
19 Ka e pehe age e tau iki oti he fakapotopotoaga oti, Kua omonuo e mautolu kia lautolu kia Iehova ko e Atua a Isaraela; ko e mena ia nakai tuai maeke a tautolu ke pipiki atu kia lautolu.
20 Ko e mena hanai ke eke e tautolu kia lautolu, to fakamoui e tautolu a lautolu, neke ha i luga ha tautolu e ita, ha ko e omonuo ne omonuo ai e tautolu kia lautolu.
21 Ti pehe age foki e tau iki kia lautolu, Tokai a lautolu ke momoui, ha kua fai kupu age pihia e tau iki kia lautolu; ka kia eke a lautolu mo tau tagata ke fai gaafi, mo e utu vai ma e fakapotopotoaga oti.
22 Ti ui age a Iosua kia lautolu, mo e vagahau ai kia lautolu kua pehe age, Ko e ha ne fakavai mai e mutolu a mautolu, kua pehe mai, Kua mamao lahi ni a mautolu mo mutolu; ka kua nonofo fetataaki a mutolu mo mautolu?
23 Ko e mena ia kua malaia ai a mutolu, nakai fai tagata ia mutolu ke to kehe mo e nofo fakatupa, mo e tau tagata ke fai gaafi, mo e utu vai mo e fale he haku Atua.
24 Ti tali age a lautolu kia Iosua, kua pehe age, Ha kua talahau mai fakamoli ke he hau a tau fekafekau kua poaki mai e Iehova hau a Atua ke he hana fekafekau ko Mose, ke foaki age e kelekele oti kia mutolu, ke fakaoti foki a lautolu oti kua nonofo ke he motu ki mua ha mutolu; ko e mena ia ne matakutaku lahi ai a mautolu neke mamate a mautolu, ti eke ai e mautolu e mena nai.
25 Ko e hanai, kitiala, ha he lima hau a mautolu nai; ko e mena kua mitaki mo e tonu ki mua hau ke eke kia mautolu, kia eke la e koe e mena ia.
26 Ti eke pihia e ia kia lautolu, mo e laveaki mai e ia a lautolu he lima he fanau a Isaraela, ti nakai kelipopo ai a lautolu.
27 Ti eke ai e Iosua a lautolu ke he aho ia mo tau tagata fai gaafi, mo e utu vai mo e fakapotopotoaga, mo e fatapoa a Iehova kua hoko mai ke he aho nai, ke he mena ke fifili ai e ia.