Isaia 1:1-31
1 KO e fakakiteaga kia Isaia ko e tama a Amota, ne kitia e ia kia Iuta mo Ierusalema, ke he tau vaha a Usia, mo Iotamo, mo Ahasa, mo Hesekia, ko e tau patuiki a Iuta.
2 Ko e lagi na e fanogonogo mai a; ko e lalolagi na e kia fakateliga mai ā koe kia au; kua pehe mai a Iehova, Ne leveki e au mo e fakaako ai e au e fanau, ka kua fakafualoto mai a lautolu kia au.
3 Kua kitia he povi e tagata ne leveki a ia, kua kitia foki he asini e mena he hana iki ne fagai ai a ia; ka ko Isaraela nakai iloa e lautolu, nakai ni manamanatu haku motu.
4 Oi te fakaalofa ke he motu kua hala, ko e motu kua pehia he tau mahani kelea, ko e hau mahani kelea, ko e fanau eke mena kelea a lautolu; kua tiaki e lautolu a Iehova; kua fakavihia e lautolu a ia ne Tapu i Isaraela, kua tukumuli ni a lautolu.
5 Ke fahi foki he ha a mutolu, kia o kehe agaia kia a mutolu? Kua gagao e ulu oti, kua lolelole e loto oti.
6 Ke kamata mai he tau aloalohui ke hoko ni ke he ulu, nakai ha i ai ha maga kakano mau; ka ko e tau kafokia, mo e tau kalavalava, katoa mo e unoko, ti nakai fakakati e tau matamotu, to nakai pipi, ti nakai fakamalū ai foki ke he magalolo.
7 Kua eke mo vao ha mutolu a motu, kua huhunu ke he afi e tau maga ha mutolu; ti kai he tau tagata kehe e tau fua he kelekele ha mutolu ki mua ha mutolu, kua eke mo vao, kua fakaoti ni he tau tagata kehe.
8 Ti toe ai e tamafifine a Siona tuga e fale api ke he uluvine, tuga e fale ke he mena ne to ai e tau kukama, tuga ne maga kua pa takai.
9 Aua he toka e Iehova Sapaota e tau tagata tokogahoa kia tautolu, po kua eke ni a tautolu ke tuga a Sotoma, po kua tuga a Komora a tautolu.
10 Ko e tau iki Sotoma na e, kia fanogonogo mai a mutolu ke he kupu a Iehova; ko e tau tagata Komora na e, kia fakateliga mai a mutolu ke he fakatufono he Atua ha tautolu.
11 Kua pehe mai a Iehova, Kua aoga ha ha kia au ha mutolu a tau poa loga? Kua makona tuai au ke he tau mamoe tane kua eke mo poa huhunu, mo e gako he tau manu gako; nakai ni fiafia au ke he toto he tau povi tane, mo e tau punua mamoe, katoa mo e tau koti tane.
12 Ka o mai a mutolu kia kitia ai a mutolu ki mua haku, ko hai kia ne pehe atu kia mutolu ke taholi ai haku a tau lotopa?
13 Ua ta mai foki e mutolu e tau poa nakai aoga, ko e tau mena manogi kua huhunu, kua eke ia mo mena vihiatia kia au; kua pihia foki e mahina pula fou, mo e sapati, mo e kotofaaga he fakapotopotoaga; nakai maeke kia au e hala mo e fakapotopotoaga.
14 Ko e ha mutolu a tau mahina pula fou mo e ha mutolu a tau fakapotopotoaga, kua vihia he haku loto; kua eke ni mo mena mamafa kia au, nakai maeke kia au ke uta.
15 Ka fakaolo mai e mutolu ha mutolu a tau lima, to haga kehe au haku tau mata ia mutolu, ka fakaloga ai e mutolu e tau liogi nakai fanogonogo atu au; kua puke ha mutolu a tau lima ke he toto.
16 Kia koukou a mutolu, ti fakameā ai e mutolu a mutolu; kia tuku kehe e mutolu ha mutolu a tau gahua kelea mai mua haku, kia toka e tau mena kelea neke eke e mutolu.
17 Kia fakamahani a mutolu ke he mahani mitaki, kia kumi e mutolu ke he fakafiliaga; kia fakahako ai e mutolu e tau mena kua fakakeu he favale, kia fakafili e mutolu e tama kua nakai fai matua, kia eke e mutolu e taufetoko he fifine takape.
18 Kua pehe mai a Iehova, Kia o mai a a mutolu, ke pulega a tautolu, pete he tuga e ie kula ha mutolu a tau hala, to hina ia po ke kiona; pete ni he kula a ia po ke ie kula uhi, to eke ni ke tuga ne tau fulu mamoe.
19 Kaeke ke loto mai a mutolu, mo e fanogonogo mai a mutolu, to kai ai e mutolu e tau mena mitaki he kelekele.
20 Ka ko e mena ka temagao a mutolu mo e fakafualoto a mutolu, to fakaoti ai a mutolu ke he pelu; kua vagahau mai ai he fofoga a Iehova.
21 Oi te! kua eke mo fifine fakataka e maga ne fakamoli; ne puke ai ke he fakafiliaga, ne nofo ai e mahani tututonu; ka ko ainei, kua nonofo ai e tau keli tagata.
22 Ko e ario hāu kua eke mo otaota; kua fiofio hāu a uaina mo e magavai.
23 Ko e tau tagata fakafualoto hāu a tau iki, kua kapitiga a lautolu mo e tau tagata kaiha, kua manako a lautolu oti ke he tau mena fakaalofa, ti tutuli atu a lautolu ke he taui; nakai fakafili e lautolu e tama nakai fai matua, nakai hoko atu foki kia lautolu e taufetoko he fifine takape.
24 Ko e mena ia kua pehe mai e Iki, ko Iehova Sapaota, ko e Malolo a Isaraela, Oi fakaalofa! to taui atu e au kia lautolu kua favale mai kia au, to fakahala e au a lautolu kua fai fi mai kia au.
25 To fakahoko atu foki e au haku lima kia koe, mo e tiaki hāu a otaota katoatoa, to aau kehe foki e au hāu a apa hina oti kana.
26 To liu aki atu e au e tau fakafili hāu ke tuga ne aho mua, mo e hau a tau patu kua pule ke tuga ne kamataaga; ka mole ia ti ui ai a koe, Ko e maga tututonu, ko e maga ne fakamoli.
27 To fakamoui ai a Siona ke he fakafiliaga; ko lautolu foki kua liliu mai, to fakamomoui ai a lautolu ke he mahani tututonu.
28 Ka e hoko fakalataha e malaia he tau tagata holifono katoa mo e tau tagata hala; ko lautolu foki kua tiaki a Iehova to fakaoti ni a lautolu.
29 Ha ko e mena to ma a lautolu ha ko e tau akau magamaga ne manako ai a mutolu, to fakahakuhaku foki a mutolu ha ko e tau kaina ne loto ki ai a mutolu.
30 Ko e mena eke a mutolu ke tuga ne akau kua fifigo ai hana tau lau, ke tuga foki e kaina nakai ha i ai ha vai.
31 To eke a ia ne malolo mo lino, to eke foki hana gahua mo lemu afi; ti huhunu ai a laua fakalataha, ti nakai ha i ai taha ke tamate e afi.