Isaia 11:1-16
11 KA to tupu ai e hoe he tagutugutu akau ko Iese, to fua foki e huli ke tupu hake ai he hana tau vaka.
2 To haele mau ia ia e Agaga a Iehova; ko e Agaga he iloilo mo e pulotu; ko e Agaga he fifiliaga mo e malolo; ko e Agaga he maama mo e matakutaku kia Iehova.
3 To fiafia foki a ia ke he matakutaku kia Iehova; nakai fakafili ai e ia ke lata mo e kitekite atu he hana tau fofoga; to nakai akonaki foki e ia ke lata mo e logona he hana tau teliga.
4 Ka to fakafili ai e ia mo e tututonu e tau tagata loleloe, to akonaki foki e ia mo e tonu ha ko e tau tagata matematekelea ha ha he lalolagi; to ta foki e ia e lalolagi ke he akau he hana fofoga, to keli ai foki e ia e tau tagata mahani kelea ke he fafagu he hana fofoga.
5 To eke e mahani tututonu mo pipi he hana tokupu, to eke foki e fakamoli mo pipi he hana tino.
6 To nonofo fakalataha e luko mo e punua mamoe, to takoto foki e nameri fakalataha mo e punua koti, to fakalataha foki e punua povi mo e punua leona katoa mo e manu gako, to takitaki foki he tama tote a lautolu.
7 To kai fakalataha e povi fifine mo e urosa, to takoto fakalataha ha laua a tau punua? to kai foki he leona e tau kakau saito tuga ne povi.
8 To fefeua foki e tama kai huhu ki luga he luo he asipi, ko e tama kua tapani foki, to tuku atu e ia hana lima ki luga he ofaga he gata gagau.
9 Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.
10 Ko e aho ia to tu mai ai e Vaka akau ko Iese ke eke mo fakamailoga ke he tau motu, to kumi kia ia he tau motu kehe; ti lilifu ni hana okiokihaga.
11 Ko e aho ia foki to liu tuku lagaua atu he Iki hana lima ke laveaki mai a lautolu ne toe he hana motu; ko lautolu ne toe i Asuria, mo Aikupito, mo Patarosi, mo Kusa, mo Elama, mo Sinara, mo Amato, katoa mo e tau motu ne tutu ke he hala kau tahi.
12 To nikiti foki e ia e fakamailoga ki mua he tau motu kehe, mo e fakapotopoto ai e ia a lautolu ne vega i Isaraela, mo e tatanaki e ia a lautolu ne fakamavehevehe i Iuta ke he tau fahi ne fa he lalolagi.
13 To fakahiku ai e mahekeheke a Efaraimo, to fakaoti foki a lautolu ne fai fi kia Iuta; nakai mahekeheke a Efaraimo kia Iuta, to nakai mahekeheke foki a Iuta kia Efaraimo.
14 To lele atu a lautolu ke he tau fulima he tau tagata Filisitia ke he fahi lalo; to fofo fakalataha e lautolu ke he tau e tau mena he tau tagata he fahi uta; to hoko atu e tau lima ha lautolu ki Etoma mo Moapi, to omaoma foki e fanau a Amoni kia lautolu.
15 To fakaoti ni e Iehova e ava he tahi i Aikupito; to nikiti foki e ia hana lima ki luga he vailele, ti ta e ia a ia ke eke mo tau la ne fitu, ti o atu ai a lautolu mo e tau hui kua afi ke he tau afialoalohui.
16 To ha i ai foki e puhala tu ma lautolu ne toe he hana motu, ko lautolu ne toe i Asuria; tuga ne eke kia Isaraela, ke he aho ne o hake ai a lautolu he motu ko Aikupito.