Isaia 14:1-32
14 KO e fakaalofa a Iehova kia Iakopo, ke liu fifili ai foki a Isaraela, mo e foaki mai e ia ma lautolu e okiokiaga ke he motu ha lautolu; ke lafilafi mai foki e ia kia lautolu e tau tagata kehe, ke fakalataha ni a lautolu mo e magafaoa a Iakopo.
2 To uta foki he tau motu a lautolu mo e fakahoko atu e lautolu a lautolu ke he ha lautolu a motu; ti eke he magafaoa a Isaraela a lautolu ke he motu a Iehova, ke eke mo tau fekafekau tane mo e tau fekafekau fifine; to eke foki e lautolu a lautolu mo tau tagata ne fofo he tau kia lautolu ne eke a lautolu mo tau tagata ne fofo he tau, ti pule ni a lautolu kia lautolu ne favale atu kia lautolu.
3 Ko e aho foki ke foaki mai e Iehova ke okioki a koe he mamahi hau, mo e hau a matematekelea, mo e hau a gahua mamafa ne eke,
4 To uhu ai e lologo nai ke he patuiki i Papelonia, mo e pehe atu, Oi te! kua mole atu a ia ne favale, kua mole atu a ia ne fofo auro.
5 Kua fafati e Iehova e akau he tau tagata mahani kelea, ko e tokotoko ha lautolu ne pule.
6 Kua ta ai e tau motu mo e ita, kua ta nakai noa, kua pule ke he tau motu kehe mo e ita mo e favale nakai taofi ai e ia.
7 Kua okioki e lalolagi oti, kua nonofo fakatekiteki ni; kua kalaga a lautolu mo e fiafia.
8 Kua olioli foki e tau perosi ha ko koe, katoa mo e tau arasi a Lepanona, kua pehe, Tali he takoto a koe nakai hake mai a ia kua hio akau kia mautolu.
9 Ko Seoli ki lalo kua vivivivi ha ko koe, ke feleveia a ia mo koe ke he hau a fina atu; kua lagaaki ha ko koe e tau agaga ha lautolu ne mamate, ko e tau iki ne mua oti he lalolagi; kua fakamamatike ai e tau patuiki oti he tau motu kehe he tau nofoaiki ha lautolu.
10 To tala atu a lautolu oti mo e pehe atu kia koe, Ko koe foki kua lolelole tuai tuga na mautolu, kua eke a koe ke tuga na mautolu!
11 Kua ta hifo ki Seoli hau a fakatokoluga mo e leo he hau a napeli; kua fofola ai e tau uaga ki lalo ia koe, ti eke e tau kelemutu mo kafu hau.
12 Oi te! kua hifo a koe he lagi ko koe ne kikila, ko e tama tane he aho; kua hio ki lalo a koe ke he kelekele, ko koe ne fakatokolalo ai e tau motu kehe.
13 Ko koe foki ne pehe hifo ke he hau a loto, To hake au ke he lagi, to fakatu e au haku a nofoaiki ki luga he tau fetu he Atua, to nofo foki au ke he mouga he fakapotopotoaga ke he tau fahi ki tokelau;
14 To hake au ki luga he tau mena tokoluga ki luga he tau aolagi; to eke au ke tuga hana ne Mua ue atu.
15 Ka to ta hifo a koe ki seoli ke he tau fahi he luo.
16 Ko lautolu kua kitia a koe to mataono a lautolu kia koe, to manamanatu a lautolu kia koe, mo e pehe a lautolu, Ko e tagata kia aenei ne fakavivivivi ai e lalolagi, ne lulululu ai e tau kautu?
17 Ne eke e lalolagi ke tuga ne tutakale, mo e ulu ki lalo e tau maga ha ha i ai; ti nakai tuku atu hana tau tagata ne fofo he tau ke o ke he tau magafaoa ha lautolu.
18 Ko e tau patuiki oti he tau motu, ko lautolu oti ni, kua tatakoto a lautolu mo e lilifu, takitaha ke he hana fale;
19 Ka ko koe kua liti a koe mai he tukuaga hau, tuga ne la akau kua vihiatia; kua ufia kia lautolu ne keli, ko lautolu ne tuina ke he tau pelu, ko lautolu ne o hifo ke he tau maka he luo, tuga ne tino mate kua taholi.
20 To nakai fakalataha a koe mo lautolu ke he tukuaga, he moumou e koe hau a kelekele, ti kelipopo e koe hau a motu; nakai ni talahaua tukulagi e fanau ha lautolu ne mahani kelea.
21 Kia taute e mutolu e keliga ma e hana tau tama tane ha ko e tau hala he tau matua ha lautolu; neke tutu a lautolu ki luga mo e eke ma lautolu e lalolagi, mo e fakapuke ai e fuga kelekele oti ke he tau maga.
22 Kua pehe mai a Iehova Sapaota, To tu ki luga au ke tau mo lautolu; to uta kehe foki e au i Papelonia e higoa, mo lautolu ne toe, ko e tama tane katoa mo e tama tane he hana tama tane, kua pihia mai a Iehova.
23 To eke foki e au ia mo mena ke nofo ai e kefota, mo tau vai namo foki; to tafitafi foki e au a ia ke he tafi ke fakaoti ai, kua pihia mai a Iehova Sapaota.
24 Ne omonuo e Iehova Sapaota, kua pehe mai, Ko e moli tuga ne manatu e au kua hoko ni pihia, ti tuga ne pule e au kua fakamoli ai ni;
25 Ke tuki malipilipi ai a Asuria ke he haku a motu, mo e taholi ai e au a lautolu ki luga haku a tau mouga; ti mole atu ai ha lautolu a lakau hahamo ia lautolu, mo e ha lautolu a tau kavega to uta kehe ia he tau ua ha lautolu.
26 Ko e pule hanai kua pule ai a ia ke he lalolagi oti, ko e lima foki hanai kua fakaolo atu ke he tau motu kehe oti.
27 Ha ko Iehova Sapaota kua pule a ia, ko hai kia ke fakahui ai? ko e hana ni e lima kua fakaolo atu ko hai kia ke liuaki ai?
28 Ko e tau ne mate ai e patuiki ko Ahasa, ne hoko mai ai e kavega nai.
29 Filisitia katoa na e, aua neke fiafia a koe ha kua fati e tokotoko ne ta aki a koe; ha ko e tino he gata ke tupu mai ai e gata gagau, ko e hana punua foki ko e gata lele haia.
30 To kai foki he tau tama uluaki ha lautolu ne lolelole, ko e tau tagata nonofogati foki to tatakoto a lautolu mo e nakai haofia; to tamate foki e au hau a vaka akau ke he hoge, mo lautolu ne toe kia koe to keli ai e ia a lautolu.
31 Ko e gutuhala na e, kia fakatutu ā koe, ko e maga na e, kia tagi ā koe; Filisitia katoa na e kua faliu puke vai ai a koe; ha kua hau e ahua mai he fahi tokelau, to nakai fai tagata ke auhia he hana kau.
32 Ti heigoa kia ke tali atu ke he tau fekau he tau motu kehe? hanai, Kua fakave ai e Iehova a Siona, ti huhu atu ai a lautolu ne matematekelea he hana motu.