Isaia 16:1-14
16 KIA fakafano atu e mutolu e tau punua mamoe ke he iki ne pule ke he motu ke fina atu i Sila ke he tutakale, ke he mouga he tama fifine a Siona.
2 Ko e mena tuga ne tau manu kua fehola kua vega mai he fata, kua pihia e tau tama fifine a Moapi ke he hala potaki he vailele ko Aranona.
3 Kia eke e koe hau a fifiliaga, kia fakatonu mai ā; kia fakamalu mai ā, ke tuga e po ke he tupoulā; kia fufu a lautolu kua vega, ti aua neke fakakite a lautolu kua fehola.
4 Moapi na e, kia toka e koe haku a tau tagata kua vega ke nonofo mo koe; kia eke a koe mo huaga ma lautolu ki mua ha lautolu ne fakaoti a lautolu; ha kua mole atu a ia ne favale, kua fakahiku foki e malaia, kua fakaoti tuai a lautolu ne taholi ai ha lautolu a motu.
5 To fakamau ai foki e nofoaiki ke he fakaalofa, to nofo ai foki taha mo e fakamoli ke he fale ie a Tavita, ko e taha ke fakafili ai mo e kumi ke he fakafiliaga, to alumaki foki a ia ke he mahani tututonu.
6 Kua logona e mautolu e fakatokoluga, a Moapi, kua fakatokoluga lahi a ia, ko e hana fakaikaluga, mo e hana mahani fakahakehake, mo e hana ita, ko e pikopiko he hana tau kupu ne palau ai.
7 Ko e mena ia to fakatutu ai a Moapi ha ko Moapi, to fakatutu a lautolu oti ni; to tauoi a lautolu ha ko e tau fakaveaga a Kiriaresa, kua tuki ni a lautolu.
8 Ha kua fifigo e tau fonua a Hesepona; ko e vine a Sipema kua pakipaki ai he tau iki he tau motu kehe hana tau la; ne hohoko atu a lautolu ki Iasaru, ne totolo atu ke he tutakale; ne haolo hana tau la, ne hohoko atu ki tahi.
9 Ko e mena ia to tagi ai au tuga ne tagi a Iasaru ha ko e vine a Sipema; to fakapala e au a koe ke he haku a tau hihina mata, Hesepona na e mo Eleale na e; ha kua hunu atu e kalaga ke he ha mutolu a tau fua akau momoho, mo e ha mutolu a heleheleaga saito.
10 Ti uta kehe ai e fiafia mo e kolikoli he fonua talumelie, to nakai kalaga fiafia a lautolu, to nakai miha foki ke he tau uluvine; ko ia ne taholi e tau fua vine nakai taholi ai e ia e uaina ke he holiaga vine; kua fakahiku e au e kalaga fiafia.
11 Ko e mena ia to tagi ai haku a manava tuga ne kitara ha ko Moapi, katoa mo e haku a loto ha ko Kiriaresa.
12 Ka kitia foki e Moapi kua oti e manava hana ki luga he mena tokoluga, ti hu atu a ia ke he hana faituga ke liogi ai, ka e nakai ni maeke kia ia.
13 Ko e kupu ia a Iehova ne vagahau mai ai e ia ki Moapi i tuai.
14 Ka ko ainei kua vagahau mai e Iehova, kua pehe mai, Ko e tolu e tau, tuga ne tau tau he fekafekau palepale, ti eke ai e lilifu a Moapi mo mena fakateaga, mo e ekefakakelea ai e motu o tagata oti ne tokologa; ko lautolu foki ne toe to tokogahoa maka a lautolu, to nakai malolo a lautolu.