Isaia 18:1-7
18 OE! Ko e motu na e kua tuputupu hau a tau tapakau, ha ha i ai ke he fahi atu he tau vailele a Aitiope.
2 Kua fakafano atu e tau fekau ke o ke he tahi, ke he tau vaka kome foki ke he kili tahi. Kia o ā mutolu ko e tau fekau mafiti ke he motu malolo mo e toa, ko e motu matakutakuina tali mai hana kamataaga, ko e motu malolo ue atu ti taholi ai e ia hana tau fi; kua vehevehe ai ke he tau vailele he lautolu a kelekele.
3 Ko mutolu oti kua nonofo ke he atu motu, ko mutolu foki kua nonofo ke he lalolagi, ka fakatu ai e fakamailoga ki luga he tau mouga kia kitekite a mutolu ki ai, ka ulo ai foki e pu kia fanogonogo a mutolu ki ai.
4 Ha kua tala mai pehe a Iehova kia au, To nofo fakatekiteki au, mo e kitekite atu au ke he mena kua nofo ai au, tuga ne vevela lahi ki luga he tau lakau ikiiki, tuga ne hahau kua to ke he vevela ke he vaha ne helehele ai e tau fua he fonua.
5 Ha kua nakaila hoko ke he aho ke helehele ai, ka mole e tau fiti ti ponapona mai ai e tau fua vine mui he tau fiti, kua hahala e ia e tau la ke he tau titipi ke taute aki e tau vine, ko e tau tatupu foki kua uta kehe e ia, kua hahala kehe ai e ia.
6 To tiaki fakalataha a lautolu ma e tau manu lele favale he tau mouga, ma e tau manu huifa foki ne totolo he kelekele; to nonofo ai e tau manu lele favale ke he tau mafana katoa, to katoa foki e tau makalili he nonofo ai e tau manu huifa oti ne totolo ke he kelekele.
7 Ko e vaha ia to ta mai ai e mena fakaalofa kia Iehova Sapaota, he motu malolo mo e toa, ko e motu foki ne matakutakuina tali mai hana kamataaga, ko e motu malolo ue atu ti taholi ai e ia hana tau fi, kua vehevehe ai ke he tau vailele ha lautolu a kelekele, to ta mai ai ke he mena ne ha i ai e higoa a Iehova Sapaota, ko e mouga ko Siona.