Isaia 19:1-25
19 KO e kavega a Aikupito. Kitiala, kua heke e Iehova ke he aolagi lele vave, ti haele atu ai a ia ki Aikupito; ti vivivivi ai e tau tupua a Aikupito ki mua hana, ti lolelole ai e tau loto a Aikupito ki loto ia lautolu.
2 To fakaohooho foki e au a Aikupito ke tau ki Aikupito; to tau ai a lautolu ko e tagata mo e hana matakainaga, ko e tagata mo e tagata ne katofia mo ia, ko e taha maga mo e taha maga, ko e taha kautu mo e taha kautu.
3 To mole atu foki e loto a Aikupito mai loto ia lautolu, to ulu moumou foki e au hana tau pulega; ti kumi a lautolu ke he tau tupua, mo lautolu ne fakaleo kehe, mo lautolu ha i ai e tau agaga talahau tuai, mo e tau taulaatua.
4 To tuku atu e au a Aikupito ke he lima he iki favale; to pule foki e patuiki malolo kia lautolu, kua tala mai pihia e Iki ko Iehova Sapaota.
5 To mamiti foki e puke vai he vai, to momo foki mo e pakupaku e vailele.
6 To elo foki e tau vailele, to maha mo e momo e tau hala vai a Aikupito, to fifigo e tau kaho mo e tau vao vihi.
7 Ko e tau mena ne tata age ke he vailele, ha ha he kauvai he vailele, katoa mo e tau mena oti ne tata age ke he vailele ne to mena ai, to fifigo ia, ti havilia kehe, ti nakai toe ai ha mena.
8 To momoko e tau tagata takafaga, ti manu ai a lautolu, ko lautolu oti ne tuku matau ke he tau vailele, to fakalolelole foki a lautolu oti kua liti kupega ai ke he kili vai.
9 Kua mā a lautolu kua eke lino mitaki, katoa mo lautolu kua lalaga lino hina.
10 Kua ulu ki lalo hana tau fakaveaga, ko e tau tagata oti foki kua gahua ke moua ai e palepale kua mamahi ai ha lautolu a tau loto.
11 Kua goagoa lahi ni e tau iki i Soana, kua eke mo mena goagoa e tau pulega he tau tagata pulotu, ko e tau pule a Farao; po ke pehe atu fefe a mutolu kia Farao, Ko au ko e tama he tau tagata pulotu, ko e tama he tau patuiki i tuai?
12 Ko fe kia a lautolu? Ko fe kia hau a tau tagata pulotu? Kia tala atu ai a lautolu kia koe, mo e iloa e lautolu, e mena kua pule ai a Iehova Sapaota ki Aikupito.
13 Kua eke mo tau tagata goagoa e tau iki i Soana, kua fakavai e tau iki a Nofi, kua fakaheke foki e lautolu a Aikupito, ko lautolu kua eke mo maka he malokuaga he hana tau magafaoa.
14 Kua liligi atu e Iehova ki loto ia lautolu a agaga ke fakavai ai, ti fakahehe ai e lautolu a Aikupito ke he hana tau mena oti ne eke, tuga ne hehe ai e tagata konahia ke he hana koko.
15 To nakai ha i ai foki i Aikupito ha mena ke eke, ko e mena ke eke ai he ulu po ke hiku, ke eke ai he lau pama po ke kaho.
16 Ko e aho ia to eke a Aikupito ke tuga ne tau fifine; to vivivivi a lautolu mo e matakutaku ai ha ko e lima a Iehova Sapaota kua nikiti, kua nikiti ai e ia ki luga ha lautolu.
17 To eke foki e motu ko Iuta mo mena ke matakutaku ai a Aikupito; ko lautolu oti kua talahau atu ai e motu ia kia lautolu to matakutaku ai a lautolu, ha ko e pule a Iehova Sapaota kua pule a ia ki ai.
18 Ko e aho ia to vagahau ai e tau maga ne lima he motu ko Aikupito ke he vagahau Kanana, to omonuo ai foki a lautolu kia Iehova Sapaota; to talahau ai e taha, ko e maga he malaia.
19 Ko e aho ia to ha i ai ke he loto uho he motu ko Aikupito e fatapoa kia Iehova, mo e pou maka kia Iehova ke he fahi he hana tau katofia.
20 To eke ia mo fakamailoga mo fakamoli foki kia Iehova Sapaota ke he motu ko Aikupito; ha ko e mena to tagi a lautolu kia Iehova ha ko lautolu ne favale kia lautolu; ti fakafano atu e ia kia lautolu e fakamoui, ko e taha ne homo atu, ti laveaki mai e ia a lautolu.
21 To fakailoa ai a Iehova ki Aikupito, to iloa foki e Aikupito a Iehova ke he aho ia; to fekafekau a lautolu kia ia ke he tau poa mo e tau mena fakaalofa; to omonuo foki e lautolu kia Iehova, mo e fakamoli ai a lautolu.
22 To ta foki e Iehova a Aikupito, to ta ai e ia, mo e fakamalolo ai; ti liliu atu ai a lautolu kia Iehova, ti fanogonogo ai a ia kia lautolu, mo e fakamalolo ai e ia a lautolu.
23 Ko e aho ia to eke ai e puhala tu, ke kamata mai i Aikupito ke hoko atu ki Asuria, to o atu a Asuria ki Aikupito, to o mai foki a Aikupito ki Asuria; to fekafekau foki a Aikupito fakalataha mo Asuria.
24 Ko e aho ia to eke a Isaraela mo motu ne toluaki, ke fakalataha mo Aikupito mo Asuria, to eke mo mena ke monuina ai ki loto he lalolagi.
25 To fakamonuina e Iehova Sapaota kia lautolu, kua pehe mai, Kia monuina haku a motu ko Aikupito, mo Asuria ko e gahua he haku tau lima, katoa mo e haku a tufaaga ko Isaraela.