Isaia 21:1-17
21 KO e kavega he tutakale he tahi. Kua fina age a ia tuga ne tau hiohio ke he fahi toga, kua hau he tutakale, mai he motu matakutakuina.
2 Ko e fakakiteaga uka kua fakakite mai ai kia au, ko ia kua fakavai ha ne fakavai, ko ia kua moumou ha ne moumou; Elama na e, kia hake ā koe; Metai na e, kia pa takai ā koe e taue; kua fakahiku ai e au e tau tauoi oti.
3 Ko e mena ia kua mamahi lahi ai haku a tokupu, kua moua au he mamahi tuga ne mamahi he fifine ka fanau; kua fitikeleu au, nakai maeke au ke fanogonogo atu; kua fakaatukehe lahi ni au, ti nakai maeke au ke kitekite.
4 Kua hehe haku loto; kua hoko kia au e matakutaku; ko e po ne fiafia au ki ai kua eke ai e ia mo mena ke matakutaku ai au.
5 Kua fakatokatoka atu e tau mena ke he laulau; kua kotofa e tau tagata toko; kua kai a lautolu mo e inu, ko e tau iki na e, kia mamatike ā, kia fakainuinu e mutolu e akau punuti.
6 Kua tala mai pehe e Iki kia au, Fano ā koe, ti kotofa e koe e toko, ko e mena ka kitia e ia, kia talahau ai e ia.
7 Ka kitia e ia e kau kua o takitokoua, kua heke e tau solofanua, ko e kau kua heke e tau asini, mo e kau kua heke e tau kamela; ti fanogonogo fakamitaki atu a ia.
8 Ti ui ai a ia tuga ne leona, Ko e Iki na e, kua tu ai au ke he kolo ke toko ai nakai noa ke he aho; kua tu foki au ke he mena kua kotofa au ke toko ki ai ke he tau po oti ni.
9 Kitiala, ko e kau ne o mai ne o takitokoua kua heke e tau solofanua. Ti liu pehe mai a ia, Kua veli, kua veli a Papelonia; ko e tau tupua oti foki he hana tau atua kua tuki malipilipi ai e ia ke he kelekele.
10 Haku a taholiaga saito na e, mo e saito ha ha i ai ke he haku a mena ne taholi ai e saito; ko e tau mena ne logona ai e au ia Iehova Sapaota ko e Atua a Isaraela, kua fakakite atu e au kia mutolu.
11 Ko e kavega a Tuma. Ne ui mai ai e taha kia au i Seira, Ko e toko na e, ko e heigoa ke he po Ko e toko na e, ko e heigoa ke he po?
12 Kua pehe age e toko, Ko e pogipogi ne hau katoa foki mo e po; kaeke ke huhu a mutolu, ti huhu la; kia liliu mai ā mutolu, ti o mai ā.
13 Ko e kavega a Arapi. Ko e kavei i Arapi ke momohe ai a mutolu ko e fenoga a Titana.
14 Ko lautolu kua nonofo ke he motu ko Tema kua uta e lautolu e magavai ke feleveia ai mo lautolu ne fia inu, kua o age a lautolu mo e tau mena kai ke fonofono a lautolu ne fehola.
15 Ha ko e mena fehola kehe a lautolu he tau pelu, ko e pelu foki kua aki, mo e kaufana kua loloku, katoa mo e tau ne uka.
16 Ha kua pehe e vagahau mai he Iki kia au, Taha ni e tau ne toe, ke tuga ne tau tau he fekafekau palepale, ti fakaoti ai e lilifu oti a Kitara.
17 Ko lautolu ne toe ko e tau tagata fana, ko e tau toa a Kitara to fakatokogahoa ai a lautolu; ha kua vagahau mai ai a Iehova ko e Atua a Isaraela.