Isaia 25:1-12
25 IEHOVA na e, ko e haku a Atua a koe; to nava atu au kia koe; to fakaheke atu au ke he hau a higoa; ha kua eke e koe e tau mena ke ofo ai; ko e tau mena ne pule ai tali mai ne aho mua ko e fakamoli ia, to moli ni;
2 Ha kua eke e koe e maga mo toloaga maka; ko e maga nofo taue kua eke mo tau fala malŏlŏ; ko e fale iki he tau tagata kehe ke nakai eke mo maga; nakai liu ati a ia tukulagi;
3 Ko e mena ia to fakalilifu atu ai kia koe he motu malolo; to matakutaku kia koe e maga he tau motu kehe ne matakutakuina;
4 Ha kua eke a koe mo taue māna ne lolelole, ko e taue māna ne nofogati ke he hana matematekelea, ko e fakamaluaga ka to e afa, ko e mena ke malu ai ka vevela, he hoko mai ai e ita lahi ha lautolu ne favale, tuga ne afa kua to ke he kaupa.
5 Tuga ne vevela ke he motu nakai fai vai, to fakatokolalo ai e koe e go he tau tagata kehe; tuga e vevela ke he malu he aolagi to fakatokolalo ai e koe e lologo he tau tagata favale.
6 To eke ai e Iehova Sapaota ke he mouga nai e galue ke he tau mena mitaki ma e tau motu oti, ko e galue e uaina ne toka ai e tau kele; ko e tau mena mitaki ue atu; ko e uaina ne toka ai mo e tau kele kua hakahaka.
7 To fakaoti foki e ia ke he mouga nai e ie ufiufi, ne ufia ai e tau motu oti, mo e ufiufi ne ufia ai e tau motu kehe oti kana.
8 To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti; to uta kehe foki e ia e mena ke mā ai hana motu ke he lalolagi oti ni; ha kua vagahau mai ai e Iehova.
9 To pehe ke he aho ia, Kitiala, ko e ha tautolu a Atua hanai; ne tatali a tautolu kia ia, ti fakamomoui e ia a tautolu; ko Iehova hanai ne tatali a tautolu kia ia; ti fakamomoui e ia a tautolu; ko Iehova hanai ne tatali a tautolu kia ia; to fiafia a tautolu mo e olioli ke he hana fakamouiaga.
10 Ha ko e mena to tumau e lima a Iehova ke he mouga nai; to taholi ai a Moapi ke he hana motu, tuga ne taholi ai e tau saito ke he toloaga veve.
11 To fakaloloa foki e ia hana tau lima ki loto ia lautolu, tuga ne fakaloloa e tau lima he tagata kua kakau ke kakau ai; to fakatokolalo ai ha lautolu a mahani fakatokoluga katoa mo e tau lagatau he tau lima ha lautolu.
12 Kua tulei hifo e ia e kolo tokoluga he hau a kaupa, kua fakatokolalo ai, kua fakatatai ai a ia mo e kelekele, ke hoko ni ke he efuefu.