Isaia 27:1-13
27 KO e aho ia to fakahala ai e Iehova a Leviatana, ko e gata mafiti lahi, ko Leviatana ni, ko e gata vakavakai, to fakahala ai ni ke he hana pelu mao, mo e lahi, mo e malolo; to kelipopo ni e ia e tanimo ha ha he tahi.
2 Kia lologo ā mutolu ke he aho ia ke he uluvine.
3 Ko au ko Iehova, kua leveki e au a ia; to fakamalū ai e au; to leveki e au ki ai ke he po mo e aho neke hoko ki ai ha kelea.
4 Nakai ni ita au; kua fia moua e au e tau akau fotofoto mo e tau akau talatala ke he tau; to oho atu au kia lautolu, ti huhunu e au a lautolu.
5 Po ke toto ai e ia haku a malolo ke mafola ai e maua mo ia, ti mafola ni a ia mo au.
6 Ko e tau aho a mui to totolo ai e tau vaka a Iakopo; to fiti mai mo e matala ai e tau fiti a Isaraela, to puke ai e fuga kelekele oti ke he hana tau fua.
7 Kua ta kia e ia a ia tuga ne ta e ia a lautolu ne ta a ia? kua kelipopo kia ia tuga ne kelipopo ai ha lautolu a tau tagata ne kelipopo?
8 Ne fetoko fakalata a koe mo ia, he fakafano kehe e koe a ia; ne uta kehe a ia he hana matagi lahi ke he aho ne age mai ai he fahi uta e matagi.
9 Ko e mena ia to fakamagalo ai e mahani kelea a Iakopo ke he mena ia; ko e hana kakano oti ia kia uta kehe ai hana tau hala; he eke ai e ia e tau maka oti he fatapoa ke tuga ne tau maka puga kua malipilipi; nakai tuai liliu tutu ki luga e tau tupua Asaira, mo e tau tupua ke he lā.
10 Ha ko e mena toka noa e maga ne eke mo kolo, ko e fale nakai nofo ai taha, ka e tiaki ni ke tuga ne tutakale; to totolo ai e tau punua povi mo e tatakoto ai a lautolu, ti kai ai e lautolu hana tau la akau.
11 Ka mago hana tau lā to papaki kehe ai; ti o mai e tau fifine mo e huhunu ai; ha ko e mena nakai ko e tau tagata pulotu e motu ia; ko e mena ia nakai ofania a lautolu e ia ne eke a lautolu; ko ia foki ne tufugatia a lautolu nakai ni fakaalofa mai a ia kia lautolu.
12 Ko e aho ia to haha hifo ai e Iehova hana tau fua, ke kamata mai he mena ne tafe ai e vailele ke hoko atu ke he vailele a Aikupito; to fakapotopoto ai a mutolu takitokotaha, ko mutolu ko e fanau a Isaraela.
13 Ko e aho ia foki to ulo ai e pu lahi, ti o mai ai a lautolu ko e mamate ha ne fai ke he motu ko Asuria, katoa foki mo lautolu ne vega kehe ke he motu ko Aikupito, ti hufeilo a lautolu kia Iehova ke he mouga tapu i Ierusalema.