Isaia 28:1-29
28 OI te fakaalofa ke he foufou tokoluga ha lautolu ne inu ke konahia i Efaraimo, katoa mo e fiti kua fifigo he ha lautolu a tau mena fulufuluola ne taute aki a lautolu, ha ha he ulu he pahua talumelie, ha lautolu kua mahala ke he uaina.
2 Kitiala, ha ha i ai ke he Iki taha ne malolo mo e manava lahi a ia, tuga ne afa ko e uha tuli, ko e afa to kai maka, tuga ne tafe e tau vai loga kua puapua, kua liti hifo ai mo e malolo ke he kelekele.
3 Ti taholi ai ke he tau hui e foufou tokoluga ha lautolu ne inu ke konahia i Efaraimo.
4 Ko e fiti foki kua fifigo he ha lautolu a tau mena fulufuluola ne taute aki a lautolu, ha ha he ulu he pahua talumelie, to eke ia ke tuga ne fua mati ne momoho tuai ka e nakaila hoko ke he tau mafana; kua kitia e ia ne kitekite ki ai, ka moua e ia ke he hana lima, ti folo ai agataha.
5 Ko e aho ia to eke a Iehova Sapaota mo foufou iki fulufuluola, mo e foufou lilifu kia lautolu ne toe ke he hana motu;
6 To eke foki mo agaga ke fakafili ai kia ia kua nofo ke eke e fakafiliaga, to eke foki mo malolo kia ia kua fakaliu e tau ke he gutuhala.
7 Ko lautolu nai foki, kua hehe a lautolu ha ko e uaina; kua o kehe a lautolu ha ko e kava; kua hehe e ekepoa mo e perofeta ha ko e kava; kua mahakava a lautolu ke he uaina, kua o kehe a lautolu ha ko e kava; kua hehe ha lautolu a kitekite, kua tupetupe a lautolu ke he fakafiliaga.
8 Ha kua puke e tau laulau oti ke he kokō mo e otaota, nakai ni fai mena kua meā.
9 To fakaako atu e ia e iloilo kia hai? ko hai ke fakailoa atu e ia e tala ki ai? Ko lautolu kua tapani kua toka e lautolu e huhu.
10 Ha kua ha i ai e poaki mo e poaki, ko e poaki mo e poaki; ko e hataki mo e hataki, ko e hataki mo e hataki; ko e mena tote ha i hinai, ko e mena tote ha i kunā.
11 Ha ko e mena to vagahau mai e ia ke he motu nai ke he tau kupu nakai maama, mo e vagahau kehe.
12 Ne pehe atu foki a ia kia lautolu, Ko e okiokihaga hanai; kia uta ai e mutolu mo okiokihaga foki hanai; ka e nakai fia fanogonogo mai a mutolu.
13 Ti ha i ai e kupu a Iehova kia lautolu, ko e poaki mo e poaki, ko e poaki mo e poaki; ko e hataki mo e hataki, ko e hataki mo e hataki; ko e mena tote ha i hinai ko e mena tote ha i kunā; kia o a lautolu mo e veveli ai hana tua a lautolu, ti mafatifati ai a lautolu, ti tauhele ai a lautolu, mo e moua ai a lautolu.
14 Ko e mena ia kia fanogonogo mai a mutolu ke he kupu a Iehova, ko mutolu ko e tau tagata fa vā, ko e tau pule he tau tagata kua nonofo i Ierusalema.
15 Ha kua pehe mai a mutolu, Kua eke e mautolu e maveheaga mo e mate; kua eke foki e mautolu e maveheaga mo seoli; ka fina age e malaia ke lofia ai e tau tagata, nakai hoko mai ia kia mautolu; ha kua eke e mautolu e pikopiko mo mena ke malu ai a mautolu; kua fakamumuli foki a mautolu ke he mahani fakavai.
16 Hanai, kua vagahau mai pehe e Iki ko Iehova, Kitiala, kua tuku e au i Siona e maka ke eke mo fakaveaga; ko e maka kua oti hana a kamatamata, ko e maka he malokuaga kua uho ni, ko e fakaveaga kua mauokafua; nakai fakatepetepe a ia kua tua kia ia.
17 To eke e au e fakafiliaga mo fua fakatakoto, to eke foki e au e mahani tututonu mo fua tautau; to tafia ai ke he uha tuli e pikopiko ne eke mo mena ke malu ai, to lofia foki e mena ne fakamumuli ai ke he vai.
18 To fakahui ni ha mutolu a maveheaga mo e mate, nakai mau foki ha mutolu a maveheaga mo seoli; ka fina atu e malaia ke lofia ai ti taholi ai e ia a mutolu.
19 Ka fina atu ia, to uta kehe ai e ia a mutolu; ha ko e mena fina atu a ia ke he pogipogi mo e pogipogi, ke he aho katoa mo e po; ti fakaatukehe lahi ni a lautolu ka logona ai e tala.
20 Ha kua ku e mohega nakai maeke ia taha ke fakaleleva ai a ia; to lautote e kafu nakai maeke ke taotao aki a ia.
21 Ha kua tu atu a Iehova tuga ne eke ai e ia ke he mouga ko Faresa, to ita lahi foki a ia tuga ne ita ai ke he pahua i Kipeona, kia eke ai e ia hana tau mena ke eke, kua kehe ni; kia eke ai foki e ia hana gahua, ko e hana gahua kehe ni.
22 Ko e hanai, aua neke vā a mutolu, neke au atu he mau ha mutolu a tau liliaga; ha ko e fakaotiaga kua kotofa, kua logona e au mai he Iki ko Iehova Sapaota ke hoko ke he lalolagi oti ni.
23 Kia fakateliga mai a mutolu mo e logona e mutolu haku a leo, kia haga mai a mutolu, mo e fanogonogo mai a mutolu ke he haku a vagahau.
24 Kua gahua kia ke he aroti ke he tau aho oti he tagata gahua aroti kia gana ai hana tau fua saito? Kua keli kia e ia mo e fakamolemole ai hana kelekele?
25 Ka oti he fakamolemole e ia e fuga kelekele, nakai kia tolo ai e ia e tau fua kesaka, mo e gana ai e tau fua kumina, mo e to fakaatuatu e tau fua saito, mo e tau fua karite ke he mena kua fafati ke to ai, mo e tau fua kaseme ke he hana katofia?
26 Ha kua fakaako fakatonu atu hana Atua kia ia, kua fakaako atu ni e ia a ia.
27 Ha kua nakai taholi ai e kesaka ke he mena ne taholi aki e saito, ti nakai taveli e veli he nofoa fakataveli ki luga e kumina; ka kua haha ai e kesaka ke he akau, ti haha aki e kumina ke he tokotoko.
28 Kua lipilipi ai e saito, ko e mena nakai taholi mau ai e ia, ti toho age e ia ki ai e veli he hana nofoa fakataveli; ka e nakai lipilipi ai e ia ke he hana tau solofanua
29 Kua o mai ai e tau mena ia ia Iehova Sapaota; ko e hana pule ko e mena ke ofo ai haia, kua homo atu ni hana pulotu.