Isaia 3:1-26
3 KITIALA, ko e uta kehe ne fai he Iki ko Iehova Sapaota i Ierusalema mo Iuta e taha toko mo e taha toko; ko e toko areto oti, katoa mo e toko vai oti.
2 Ko e toa mo e tagata tau, ko e fakafili mo e perofeta, mo e taulaatua, katoa mo e patu;
3 Ko e iki he takilimagofulu, mo e iki lilifu, mo e pule, mo e tufuga iloilo, mo e tagata pulotu he fakavai.
4 To tuku atu foki e au e tau tama ke eke mo tau iki ha lautolu, to pule foki e tau tama iki kia lautolu.
5 To favale foki e motu o tagata, ko e taha ke he taha, ko e tagata foki ke he hana kapitiga; to fakatokoluga a lautolu ko e tama tote ke he tagata motua, ko e tagata fakateaga foki ke he tagata lilifu.
6 Ti toto ai he tagata hana matakainaga he kaina he hana matua tane, mo e pehe age kia ia, Ha ha ia koe e tau tapulu, kia eke a koe mo iki ha mautolu, ti pule a koe ke he malaia nai.
7 Ko e aho ia ke ui age a ia, kua pehe age, Nakai eke au mo ekekafo, he nakai fai tapulu au ke he fale haku to nakai fai mena kai au; nakai ni eke e mutolu au mo iki he motu.
8 Ko e mena tupetupe a Ierusalema, kua veli foki a Iuta; ha ko e tau kupu ha lautolu mo e ha lautolu a tau mahani kua hoko ia kia Iehova ke totoko atu ai ki mua hana fofoga.
9 Kua kitia ai ha lautolu a mahani ke he tau mata ha lautolu, kua fakakite e lautolu ha lautonu a tau hala tuga na Sotoma, nakai ni fufu e lautolu. Oi te fakaalofa kia lautolu! kua fakahoko ai e lautolu e kelea kia lautolu.
10 Kia pehe age a mutolu ke he tau tagata tututonu, to monuina a lautolu; ha ko e tau fua he ha lautolu a tau gahua ke kai ai e lautolu.
11 Oi te fakaalofa ke he tagata mahani kelea! to malaia ni a ia, ha ko e tau mena ne eke ai he tau lima hana, to eke ia kia ia.
12 Ko lautolu kua pule mo e favale ke he haku motu, ko e tau tama ikiiki a lautolu, kua pule e tau fifine kia lautolu. Haku a motu na e, kua fakahehe he tau takitaki hāu a koe, kua moumou e lautolu e puhala ke fano ai a koe.
13 Kua tu mai a Iehova ke eke ai e tau fetoko, ti matike ai a ia ke fakafili e tau motu.
14 To haele mai a Iehova ke fakafili e tau patu he hana motu, katoa mo e tau iki ha lautolu; ha kua fakaoti e mutolu e uluvine, ha ha he tau fale ha mutolu e tau mena ne fofo mai he tau tagata nonofogati.
15 Ko e heigoa e mena ne lipilipi ai e koe haku a motu, mo e tuki maka ai e tau mata he tau tagata nonofogati? kua pihia mai e Iki ko Iehova Sapaota.
16 Kua pehe mai a Iehova, kua fakatokoluga e tau tama fifine a Siona, ti o a lautolu mo e tau ua ha lautolu kua fakakiakia, kua matakakana a lautolu, ka o a lautolu ti o fakatamafine a lautolu, ti gatiti ai e tau pipi hui ke he tau hui ha lautolu.
17 Ko e mena ia to fakatula ai he Iki e tau tumuaki ulu he tau tama fifine a Siona, to fakakite ai e Iehova ha lautolu a kakano.
18 Ko e aho ia to uta kehe ai he Iki e tau mena ne fakafulufuluola aki e tau pipi hui, mo e tau mena ke taute aki ne tia po ke kupega, katoa mo e tau mena ne kahoa ai a lautolu;
19 Ko e tau mama tau teliga, mo e tau pipi lima, katoa mo e tau ie ufi mata;
20 Ko e tau potiki, mo e tau filifili lapatoa ne pipi e tau polohui, mo e tau pipi tokupu, mo e tau lupo ke hohogi ki ai, katoa mo e tau mena ke pa ai e kaialu.
21 Ko e tau mama, mo e tau mama tau ihu;
22 Ko e tau tapulu uho, mo e tau tapulu lalahi, mo e tau tapulu, katoa mo e tau kato fulufuluola ke tuku ai e tau mena ikiiki;
23 Ko e tau fakaata, mo e tau tapulu lino, mo e tau potiki, katoa mo e tau tapulu lalahi ke ufiaki e tau tapulu oti.
24 To ha i ai foki kia lautolu e tau motu pela kua elo ke totogi aki e tau mena manogi mitaki, to ha i ai foki e toua ke totogi aki e pipi, ko e ulu kila ke totogi aki e lauulu kua fili, ko e felevehi ie kafu popo ke totogi aki e tapulu lahi, ko e fakamailoga kua tugi ai ke he kakano ke totogi aki e mata mitaki.
25 To mamate ai hāu a tau tagata ke he pelu; ko e hāu a tau tagata malolo foki to mamate a lautolu ke he tau.
26 To tauoi mo e mānu hana tau gutuhala; to nofo foki a ia ke he kelekele nakai tuai nofo ai taha.