Isaia 30:1-33
30 KUA pehe mai a Iehova. Oi fakaalofa ke he fanau fakafualoto, ko lautolu ne eke ha lautolu a pule, ka e nakai tupu mai ia au; kua liligi foki e lautolu e poa inu, ka e nakai tupu mai he haku agaga; kia lafilafi atu ai e lautolu e hala ke he hala.
2 Ko lautolu ne o ke hifo ki Aikupito, ka e nakai huhu mai a lautolu kia au; kia fakamalolo ai a lautolu ke he malolo a Farao, mo e tua a lautolu ke he malu a Aikupito.
3 Ka to eke e malolo a Farao mo mena ke mā ai a mutolu, ko e tua foki ke he malu a Aikupito, to eke ia mo mena ke fakahahaku ai a mutolu.
4 Ha kua ha i Soana hana tau iki, kua hoko foki hana tau fekau ki Hanesa.
5 Kua mā a lautolu oti ha ko e motu nakai aoga kia lautolu, nakai lagomatai a lautolu, to nakai aoga ni, ka e eke mo mena ke mā ai, mo e mena ke fakahahaku ai a lautolu.
6 Ko e kavega he tau manu ke he fahi toga; ke he motu ke matematekelea ai mo e mamahi, ne tutupu mai ai e leona fifine mo e leona, ko e gata mo e gata lele, kua uta e lautolu ha lautolu a tau koloa ke he tau tua he tau asini, mo e ha lautolu a tau taoga ke he tau hoe he tau tua he tau kamela ke he motu nakai aoga kia lautolu.
7 Ha ko e lagomatai a Aikupito kua nakai aoga kua teao ni; ko e mena ia kua ui e au a ia ko Raava, kua nonofo noa a lautolu.
8 Hanai, kia fano a koe mo e tohi e tau mena nai ke he lapa maka ki mua ha lautolu, ti tohi ai foki ke he tohi, kia tumau ai ke he tau aho a mui ke tukulagi tukumuitea.
9 Ha ko e motu fakafualoto a enei, ko e fanau pikopiko, ko e fanau nakai mafai ke fanogonogo ke he fakatufono a Iehova;
10 Ko lautolu ne pehe age ke he tau tagata kitekite, Aua neke kitekite a mutolu; kua pehe atu foki a lautolu ke he tau perofeta, Aua neke fakakite mai e mutolu e tau mena tonu kia mautolu; kia vagahau mai kia mautolu ke he tau kupu molemole, kia fakakite mai a e tau mena fakavai;
11 Kia afe kehe a mutolu he puhala; kia o kehe ā mutolu e puhala; kia uta kehe a mai mua ha mutolu a ia ne Tapu i Isaraela.
12 Ko e mena ia kua talahau mai pehe a ia ne Tapu i Isaraela, Ha kua tiaki e mutolu e kupu nai, mo e tua a mutolu ke he favale mo e mahani keukeu, mo e falanaki ki ai a mutolu.
13 Ko e mena ia to eke e mahani kelea nai kia mutolu, ke tuga ne mena maona ko e to ne fai, kua hoe mai he kaupa tokoluga, kua malŏlŏ fakalutukia a ia, ke he magaaho ke kemo ai e mata.
14 Kua malŏlŏ a ia tuga ne malipilipi e kapiniu he tagata eke e tau kapiniu kelekele, kua tuki fakaikiiki; nakai ni toka; to nakai moua ai foki ke he tau mena ne malipilipi ha kapa kapiniu ke uta aki e afi mai he tokaaga afi, po ke ahu aki e vai mai he vaikeli.
15 Ha kua vagahau mai pehe e Iki ko Iehova, ko ia ne Tapu i Isaraela, Ko e liliu mai, mo e okioki ke fakamomoui ai a mutolu, ko e nonofo fakatekiteki mo e tua ko e ha mutolu a malolo haia; ka e nakai mafai a mutolu.
16 Ka kua pehe mai a mutolu, Nakai, ko e mena fehola a mautolu ke he tau solofanua; ko e mena ia to fehola ai ni a mutolu; kua pehe mai a mutolu to heke e mautolu e tau mena mafiti lahi; ko e mena ia ke mafiti lahi a lautolu ke tutuli kia mutolu.
17 To fehola e tokoafe ha ko e akonaki he tagata tokotaha; ha ko e akonaki he tokolima to fehola ai ni a mutolu; ato toe a mutolu tuga ne fanā ke he tapunu mouga, ke tuga ne matini foki ke he mena tokoluga.
18 Ko e mena ia to tatali a Iehova ke fakaalofa noa mai kia mutolu; ko e mena ia to matike a ia ke fakaalofa mai kia mutolu; ha ko Iehova, ko e Atua kua fakafili mena a ia; uhoaki a lautolu oti kua tatali atu kia ia.
19 Ha ko e mena to nonofo e tau tagata i Siona i Ierusalema; nakai tuai tagi a koe; to fakaalofa hofihofi noa a ia kia koe ka tagi atu a koe, ka logona ai e ia, to tali mai e ia kia koe.
20 To foaki mai he Iki kia mutolu ke kai ai e tau mena mo e matematekelea, mo e vai kua moua ai mo e mamahi; nakai liliu fakamumuli ai ha mutolu a tau akoako, ka e kitekite atu ha mutolu a tau mata ke he tau akoako ha mutolu.
21 To logona foki he tau teliga ha mutolu e kupu ki tua ha mutolu, ka afe age a mutolu ke he fahi matau po ke afe age a mutolu ke he fahi hema, kua pehe mai, Ko e puhala hanai ke o ai a mutolu.
22 To fakakelea e ia e ufiufi ario he ha mutolu a tau tupua kua ta, mo e ufiufi auro he tupua lapatoa ha mutolu, to tiaki ni tuga ne ie he tagata gagao; to pehe atu foki ki ai, Fano a.
23 Ti foaki mai e ia e uha ke he hau a saito ke gana ai e koe ke he kelekele; mo e tau mena kai ke tutupu mai he kelekele, kua tupu lahi ti mitaki, ko e aho ia to totolo ai e tau manu hau ke he fonua laulahi.
24 Ko e tau povi foki mo e tau asini kua gahua ai ke he kelekele to kai e lautolu e tau mena kai kua fakamasima, ko e tau mena kua havilia ai ke he aku mo e iliili.
25 Ko e tau atu mouga tokoluga oti mo e tau mouga tokoluga, oti, to ha i ai e tau vai tafe mo e tau vailele ke he aho he keliaga lahi, ka malŏlŏ ai e tau kolo.
26 To eke foki e maama he mahina ke tuga e maama he la; ko e maama he la to takifitu ia tuga e maama he tau aho ne fitu, ke he aho ke pipi ai e mena mafatifati he hana motu, mo e fakamaulu ai e ia e tau kafokia ha lautolu ne ta ai a lautolu.
27 Kitiala, kua haele mai e higoa a Iehova mai he mena mamao; kua huhunu hana ita, ti lahi e huhunu; kua puke hana tau laugutu ke he ita; ko e hana alelo foki, kua kai lahi ia tuga e afi.
28 Ko e hana fafagu foki kua tuga ne vailele kua puā, to hoko ke he ua, to lulululu ai e tau motu kehe, ke he mena ke lulululu aki e tau mena ke mamate ai; to ha ha i ai foki ke he gutu he motu e fakagau gutu ke fakahehē ai.
29 To eke e lologo kia mutolu, tuga ne eke ke he po ne eke ai e galue tapu; to fiafia foki e tau loto tuga ne fiafia hana ne fano mo e fakatagi kofe ke hoko atu ke he mouga a Iehova, ko e Maka tumau a Isaraela.
30 To fakafanogonogo ai e Iehova e tau tagata ke he lilifu he hana leo, to fakakite foki e ia e fakato hifo he hana lima, mo e hana ita lahi, mo e puho he afi kua kai lahi, ko e fakapuke, mo e afā, mo e uha tuli.
31 Ha ko e leo a Iehova ke malipilipi ai a Asuria, to ta aki e ia a ia ke he tokotoko.
32 Ko e tau mena oti foki ke fina age ki ai e akau kua kotofa, ke tuku ai e Iehova ki luga ha lautolu, to eke ia mo e topa mo e kitara; to fakahoko atu e ia e tau kia lautolu, ko e tau ke talue ai.
33 Ha kua taute tuai a Tofeta tali mai ne aho mua, kua taute ni e mena ia ma e patuiki; kua eke fakahokulo mo e fakalaulahi ai e ia; ko e hana tumutumu afi ia mo e tau gaafi loga; ko e fafagu a Iehova tuga ne taio kua tafe, kua huhunu ai a ia.