Isaia 33:1-24
33 OI te fakaalofa kia koe ne moumou, ka e na kai moumou e lautolu a koe; kua fakavai e koe, ka e nakai fakavai e lautolu a koe; ka fakahiku e koe hau a moumou atu, ti moumou ai e lautolu a koe; ka oti hau a fakavai ti fakavai e lautolu a koe.
2 Iehova na e, kia fakaalofa mai a koe kia mautolu, kua tatali atu a mautolu kia koe; kia eke a koe mo lima ha lautolu ke he tau pogipogi oti, ko e ha mautolu a fakamoui foki ke he tau vaha matematekelea.
3 Ko e go he motu o tagata ne fehola ai he tau motu; ko e hau a tu ki luga ne fakamavehevehe ai e tau motu kehe.
4 To okooko ai ha mutolu a tau mena ne fofo he tau, tuga ne aau taha ai e tau mena he tau hē kasili; tuga ne teletele fano e tau hē akerise, to pihia foki he tafepoi fano ai e tau tagata.
5 Kua mua ue atu a Iehova; ha kua haele a ia i luga; kua fakapuke e ia a Siona ke he fakafiliaga mo e mahani tututonu.
6 Ko ia ke tumau ai hau a tau tau, ko e fakamouiaga lahi, ko e pulotu mo e iloilo; ko e matakutaku kia Iehova, ko e hana koloa haia.
7 Kitiala, ne tagi i fafo ha lautolu a tau tagata toa, ti tagi lahi ni e tau fekau ne o ke fakafeilo ai.
8 Kua tiaki e tau puhala tu, nakai tuai o ai e tau fenoga; kua holi e ia e maveheaga, kua fakavihia e ia e tau maga, nakai manatu ai e ia ke he taha tagata.
9 Kua mānu e fuga kelekele, kua fifigo; kua fakama ai a Lepanona, kua fifigo; kua eke a Sarona mo motu talue; kua mokulo ai e tau lau akau a Vasana mo Karamelu.
10 Kua pehe mai a Iehova, To matike atu au ainei, to fakatokoluga au ainei; to eke au ainei ke mua ue atu.
11 To fatu a mutolu ke he motie tavaki, to fanau mai e mutolu e tau gutugutu saito; ko e ha mutolu a fafagu ko e afi haia ke fakaoti ai a mutolu.
12 To eke foki e tau motu ke tuga ne huhunu he tau umu puga; ke tuga ne tau akau talatala kua hahala ke huhunu ai a lautolu ke he afi.
13 Ko mutolu ne mamao, kia fanogonogo mai a mutolu ke he tau mena ne eke ai e au; ko mutolu foki ne tata mai, kia iloa ai e mutolu haku a tau mana.
14 Kua matakutaku e tau tagata hala i Siona; kua moua e tau tagata kolokolovao he vivivivi. Ko hai ia tautolu kua maeke ke nofo ke he afi puho lahi? Ko hai ia tautolu kua maeke ke nofo ke he afi tukulagi?
15 Ko ia kua fano mo e mahani tututonu, mo e vagahau ai e ia ke he tau kupu tonu; ko ia kua vihiatia e koloa kua moua ai he favale, kua lulululu ai e ia hana tau lima neke toto ai e mena fakaalofa, kua ponoti e ia hana tau teliga neke fanogonogo atu a ia ke he tau pulega ke fakamaligi e toto, kua mohe foki hana tau mata neke kitekite atu a ia ke he tau mena kelea.
16 To nofo ai a ia ke he tau mena tokoluga, ko e taue ke he tau maka ko e hana mena ke malu ai haia; to foaki kia ia hana tau mena kai, ti fai magavai mau a ia ke inu ai.
17 To kitekite atu hau a tau mata ke he patuiki mo e hana fulufuluola; to kitia e lautolu e tau motu mamao.
18 To manamanatu hau a loto ke he tau mena ne matakutaku ai. Ko fe kia e tagata tohikupu? Ko fe e tagata ke fafati e poa? Ko fe e tagata ke totou e tau kolo?
19 Nakai tuai kitia e koe e motu favale, ko e motu ne uka e vagahau nakai maeke ke logona ai; kua kehe e vagahau ha lautolu nakai ni iloa e taha.
20 Kitekite atu a mutolu ki Siona ko e maga he tau fakapotopotoaga ha tautolu; to kitia he tau mata hau a Ierusalema ko e mena ke nofo fakatekiteki ai, ko e fale ie nakai vevete, nakai tuai aki hana tau fao, to nakai motuhia taha he hana tau toua.
21 Ha ko e mena ha ha ia tautolu ke he mena ia a Iehova ko ia ne mua ue atu, to eke a ia mo tau vailele mo e tau la vailele lau lalahi; nakai fano ai ha vaka kua alo aki he tau fohe, to nakai fina age ai foki he foulua lahi.
22 Ha ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki, to fakamoui e ia a tautolu.
23 Kua molu hau a tau toua, nakai tuai fakamau ai e lautolu e fu fanā, nakai maeke kia lautolu ke fofola ai e tau la; ti tufatufa ai e koloa lahi ne fofo he tau; ti fofo ai he tau tagata kulikuli.
24 To nakai pehe mai foki taha kua nofo ai, Kua gagao au; to fakamagalo ai e tau hala he tau tagata kua nonofo ai.