Isaia 35:1-10
35 TO fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.
2 To fiti lahi mai ni a ia, to olioli foki mo e olioli lahi, mo e kalaga fiafia; to ta age kia ia e lilifu a Lepanona, mo e fulufuluola a Karamelu mo Sarona, to kitekite atu a lautolu ke he lilifu a Iehova, ko e fulufuluola he Atua ha tautolu.
3 Kia fakamalolo a mutolu e tau lima kua piki, ti fakamalolo foki e tau tulihui kua tagatagatō.
4 Kia pehe atu a mutolu kia lautolu ne loto lolelole, Kia fakamalolo ā mutolu aua neke matakutaku a mutolu; kitiala, ko e ha mutolu a Atua; ko e lalago ha ne hoko mai, ko e taui ni mai he Atua; to haele mai a ia mo e fakamomoui a mutolu.
5 Ti fakaala ai e tau mata he tau tagata mata pouli, to logona foki he tau teliga ha tau tagata teliga tuli;
6 Ti hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu; ha kua tafe mai e vai ke he tutakale, mo e tau vailele ke he motu talue;
7 To eke foki e ata noa mo vai namo, ti eke e motu nakai fai vai mo tau vaipuna; ko e mena kua nonofo ai e tau luko, kua tatakoto ai a lautolu, to eke ia mo mena ke tutupu ai e tau kaho mo e tau kome.
8 To ha i ai foki e puhala kua tanu, mo e puhala, to ui foki ia ko e puhala tapu; nakai fina atu ai taha kua kelea, ka e eke ma lautolu ni; ko lautolu ne o fenoga ai katoa mo e tau tagata goagoa nakai hehe ai a lautolu.
9 To nakai ha i ai ha leona, to nakai hake ki ai ha manu favale; to nakai moua ai ni, ka e o ai ni a lautolu kua laveaki.
10 To liliu mai a lautolu ne laveaki e Iehova, to o mai foki a lautolu ki Siona mo e kalaga mo e fiafia tukulagi ki luga he tau ulu ha lautolu; to moua e lautolu e olioli mo e fiafia, ti fehola kehe ai e mānu mo e oi.