Isaia 38:1-22
38 KO e tau aho ia ne gagao ai a Hesekia kua teitei mate a ia. Ti fina atu kia ia e perofeta ko Isaia ko e tama a Amota, kua pehe atu kia ia, Kua vagahau mai pehe a Iehova, Kia mavehe a koe mo e hau a magafaoa, ha ko e matulei ha ne fai a koe, nakai ni moui a koe.
2 Ti haga atu a Hesekia hana fofoga ke he kau fale, ti liogi atu a ia kia Iehova,
3 Kua pehe atu, Iehova na e, kua ole atu au, kia manatu mai e koe ke he haku a fano ki mua hau mo e fakamoli, mo e loto katoa, ne eke foki e au e tau mena ne finagalo ai e koe. Ti tagi lahi ai a Hesekia.
4 Ti hoko mai ai e kupu a Iehova kia Isaia, kua pehe mai,
5 Kia fano a koe, ti pehe atu a koe kia Hesekia, Kua talahau mai pehe a Iehova ko e Atua a Tavita hau a matua, Kua fanogonogo atu au ke he hau a liogi, kua kitia e au hau a tau hihina mata; kitiala, to lafilafi atu e au ke he tau aho he moui hau hogofulu ma lima e tau.
6 To laveaki foki e au a koe mo e maga nai mai he lima he patuiki a Asuria; to fakamalu foki e au e maga nai.
7 Ko e fakamailoga mai ia Iehova ke iloa ai e koe, to eke e Iehova e mena kua vagahau mai ai e ia, hanai;
8 Kitiala, to fakaliu atu e au e ata ke he tau veveheaga kua oti hana a hifo ai ke he mena a Ahasa ne vevehe aki e tau magalā, kia liu atu ke he tau veveheaga ne hogofulu. Ti liu atu ai e lā ke he tau veveheaga ne hogofulu, ko e tau veveheaga ni kua oti hana a hifo ai.
9 Ko e tohi he patuiki a Iuta ko Hesekia, he gagao a ia, kua moui mai a ia he hana gagao.
10 Ne pehe au, Ko e lotoga he haku a moui ke hu atu ai au ke he tau gutuhala he tukuaga, kua uta kehe ai haku a tau aho ne toe.
11 Ne pehe au, Nakai tuai kitia e au a Ioha, ko Ioha, ke he motu he tau tagata momoui; nakai liu kitekite atu au ke he tau tagata, fakalataha mo lautolu kua nonofo ke he lalolagi.
12 Kua lagaaki haku a fale, ti uta kehe ia au tuga ne fale ie he leveki mamoe; kua vakai e au haku a moui tuga e tagata lalaga ie; kua helehele kehe au mai he tau mata potu manoa; to fakahiku ai e koe au ke he aho taha.
13 Ne nofo fakatekiteki au ato aho, kua lipilipi ai e ia haku tau hui motua oti tuga ne leona; ko e aho taha to fakaoti ai e koe au.
14 Tuga ne pekapeka, po ke akuru, ne tagi pihia ni au; kua tagi au po ke lupe, kua mamahi haku tau mata he haku a haga hake; Iehova na e, kua matematekelea au, kia eke a koe mo lagomatai haku.
15 Po ke vagahau e au ha ha? ne tala mai e ia kia au, ko ia foki ne eke ai; to fano au mo e fakatokolalo ke he tau tau oti haku, ha ko e mamahi he haku loto.
16 Ko e Iki na e, ko e tau mena ia kua momoui ai e tau tagata; ko e tau mena oti ia kua moui ai haku agaga; to fakamalolo e koe au, ti fakamoui e koe au.
17 Kitiala, kua totogi aki haku a mamahi lahi ke he monuina; kua fakaalofa mai a koe ti laveaki mai e koe au he luo ke fakaoti ai; ha kua liti e koe haku a tau hala oti ki tua hau.
18 Ha ko e mena nakai fakaaue atu e tukuaga kia koe; ti nakai fakaheke atu e mate kia koe; ti nakai amaamanaki ke he hau a fakamoli a lautolu kua o hifo ke he luo.
19 Ko ia kua moui, ko ia kua moui, ko ia ni ke fakaaue atu kia koe, tuga na au ke he aho nai, to fakailoa ai he matua hau a fakamoli ke he hana fanau.
20 Kua fakamoui e Iehova au, to ta ai e mautolu haku a tau nekina ke he fale a Iehova, ke he tau aho oti he ha mautolu a moui.
21 Ha kua pehe atu a Isaia, Kia uta e lautolu e lafiaga fua mati, mo e tuku ai ke he mena ne fufula ti malolo ai a ia.
22 Ne pehe atu foki a Hesekia, Ko e heigoa kia e mena ke iloa ai e au, to hake au ke he fale a Iehova?