Isaia 4:1-6
4 KO e aho ia to toto atu ai he tau fifine ne tokofitu ke he tane ne tokotaha, ti pehe atu ai a lautolu, To kai e mautolu ha mautolu a tau mena kai, ti tapulu ai a mautolu ke he ha mautolu a tau tapulu, ko e mena nai hokoia ke ui ai a mautolu ke he higoa hāu ke uta kehe ai ha mautolu a mā.
2 Ko e aho ia to eke ai e La akau a Iehova mo mena fulufuluola mo e lilifu; ko e tau fua foki he kelekele to eke ia mo mena ke fiafia ai mo e mena fulufuluola ma lautolu kua hao i Isaraela.
3 To talahaua foki kua tapu a lautolu kua toe i Siona, mo lautolu kua toe i Ierusalema; ko lautolu oti kua tohi fakalataha mo e tau tagata momoui i Ierusalema.
4 Ka oti he holoholo kehe he Iki e tau otaota he tama fifine a Siona, ka oti foki he fakameā a Ierusalema he toto ki loto ia ia ke he agaga ke fakafili ai, mo e agaga ke huhunu ai;
5 Ti eke ai e Iehova ki luga he tau mena oti ke he mouga ko Siona, ha ha i luga foki he tau mena ke fakapotopoto ai, ko e aolagi mo e ahua ka aho, mo e kikila mai he afi puhopuho ka po; ha ko e mena ha ha i luga he lilifu oti e mena ke ufiufiaki.
6 To ha i ai foki e fale api mo fakamalu ka aho ha ko e vevela, to eke foki mo mena ke malu ai, mo e fakamumuliaga ha ko e afā kua to mo e uha.