Isaia 40:1-31
40 KUA pehe mai ha mutolu a Atua, Kia fakamafana ā mutolu, kia fakamafana atu ā mutolu ke he haku a motu.
2 Kia vagahau ā mutolu ke mafanatia a Ierusalema, mo e ui atu a mutolu kia ia, kua hiku tuai hana vaha matematekelea, kua taui hana mahani kelea; ha kua moua lagaua mai he lima a Iehova e taui he hana tau hala oti.
3 Ko e leo he taha tagata kua ui ke he tutakale, Kia tauteute a e mutolu e puhala a Iehova; kia fakahako e mutolu e puhala tu ke he vao talue ma e Atua ha tautolu.
4 To ta hake ki luga e tau pahua oti; ko e tau mouga mo e tau matiketike oti, to fakatokolalo ia; ko e tau mena tokoluga to eke ia mo kelekele tatai, mo e tau mena tule to eke ia mo tau mena molemole.
5 Ti fakakite mai ai e lilifu a Iehova, ti kitekite fakalataha ai e tau tagata oti kana; ha kua vagahau mai ai he fofoga a Iehova.
6 Ne pehe mai e leo, Kia ui age la. Ti pehe atu a ia, Ko e heigoa kia e kupu ke ui ai e au? Ko e tau tagata oti ko e motietie a lautolu, mo e ha lautolu a mitaki oti, kua tuga ne fiti he vao ia;
7 Kua fifigo e motietie, kua mokulu foki hana fiti; ha kua agi mai ki ai e fafagu a Iehova; ko e moli ko e motietie e tau tagata.
8 Kua fifigo e motietie, kua mokulu e fiti; ka ko e kupu he Atua ha tautolu, kua tumau ia tukulagi ni.
9 Hake a ke he mouga tokoluga, ko koe na ne tamai e tala mitaki ki Siona; kia leo lahi a mo e fakamalolo ko koe na, ne tamai e tala mitaki ki Ierusalema; kia leo lahi a, aua neke matakutaku a koe, kia pehe atu ke he tau maga a Iuta, Kitiala, ke he ha mutolu a Atua.
10 Kitiala, to haele mai e Iki ko Iehova mo e malolo, to pule hana lima māna; kitiala, kua ha ia ia hana taui, ti ha i mua hana e palepale he hana gahua.
11 To leveki e ia hana fuifui ke tuga ne leveki mamoe; to hapai e ia e tau punua mamoe ke he hana tau lima, mo e uta e ia a lautolu ke he hana fatafata; to takitaki fakatekiteki e ia e tau mamoe kua fai punua.
12 Ko hai kia kua fafati ai e tahi ke he hana aloalolima, mo e fafati e lagi ke he hagatike, mo e fafati e kelekele ke he fua ke fafati aki e tau mena puke; kua fafati foki e tau mouga ke he fua hahamo, mo e tau matiketike ke he fuatautau?
13 Ko hai kia kua fafati e agaga a Iehova? ko hai foki e tagata kua pulega fakalataha mo ia, kua fakaako ai a ia?
14 Ko hai kia ne pulega fakalataha mo ia, ti pulotu ai a ia, mo e fakaako ai a ia ke he puhala he fakafiliaga, mo e fakaako a ia ke iloilo ai, mo e fakailoa atu kia ia e puhala ke manamanatu ai?
15 Kitiala, kua tatai e tau motu mo e maga vai tote kua hihina hifo he pakete; kua totou a lautolu tuga ne efuefu ke he fua hahamo; kitiala, kua toto ai e ia e tau motu ne takai he tahi tuga ne tau valavala mena ikiiki.
16 Nakai ni lata a Lepanona ke huhunu ai ke he afi, mo e tau manu ha ha i ai, nakai ni lata ia ke eke mo poa huhunu.
17 Ko e tau motu oti kua tuga e mena noa maka ki mua hana; kua homo he tote a lautolu ke he mena noa maka ke he hana manatu, mo e teao ni a lautolu.
18 Hanai, to fakatai atu e mutolu e Atua kia hai? ko e heigoa foki e fakatai ke fakatai e mutolu a ia ki ai?
19 Kua taute he tufuga e tupua lapatoa, mo e tufuga eke mena auro to ufiufi aki ia ke he auro; ti taute ai e ia e tau filifili ario.
20 Ko ia kua nofogati ke he tau poa pihia kua fifili e ia e akau nakai popo, ti kumi e ia hana tufuga iloilo ke eke aki e tupua nakai fagahuatia.
21 Nakai kia iloa e mutolu? Nakai kia logona e mutolu? Kua nakai kia tala atu ai kia mutolu tali mai he kamataaga? Kua nakai kia logona ai e mutolu mai he tau fakaveaga he lalolagi?
22 Ko ia ne haele ki luga he mena ne takai aki e lalolagi, ka ko lautolu ne nonofo ai kua tuga ne tau hē a lautolu, ko ia ne fofola ai e lagi ke tuga ne ie aleale; ti fofola ai e ia tuga ne fale ie ke nofo ai.
23 Ko ia ne eke e tau iki ke nakai ha ha i ai, ti eke ai e ia e tau fakafili he lalolagi ke tatai mo e mena noa maka.
24 Kua nakai ni to a lautolu, kua nakai ni gana ha lautolu a tau fua, kua nakai ni totolo ke he kelekele e tau vaka he ha lautolu a patu akau; ti ulo noa a ia kia lautolu, ti fifigo ai a lautolu, ti uta kehe a lautolu he afā tuga ne tau gutugutu saito.
25 Kua pehe mai a ia ne Tapu, Hanai, to fakatai e mutolu au kia hai? po ko hai foki ke tatai mo au?
26 Hahaga hake a ki luga mo e kitekite ā mutolu, po ko hai ne eke e tau mena nai? Kua takitaki mai ha lautolu a tau kau kua totou, ti ui e ia a lautolu oti ke he tau higoa ha lautolu, ko e hana malolo lahi mo e hana mana lahi; nakai ni galo taha ia lautolu.
27 Iakopo na e, ko e ha ne pehe a koe? Isaraela na e, ko e ha ne vagahau e koe pehe? Kua galo haku a puhala kia Iehova, kua toka kehe mo e haku a Atua haku a fakafiliaga?
28 Nakai kia iloa e koe? Nakai kia logona e koe? Ko e Atua tukulagi, ko Iehova ko ia ne eke e tau motuaga he lalolagi, nakai lolelole a ia, to nakai mategugu foki a ia; ti nakai maeke ke kumikumi hana pulotu.
29 To foaki atu e ia e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu.
30 To lolelole mo e mategugu e tau fuata; ko e tau taulekaleka foki to veveli ni a lautolu;
31 Ka ko lautolu kua tatali kia Iehova, to fakafou ai ha lautolu a malolo; to o hake a lautolu ke he tau tapakau po ke tau aeto; to tafepoi a lautolu ka e nakai mategugu; to o a lautolu, ka e nakai lolelole ai a lautolu.