Isaia 41:1-29
41 KIA fakanono ā ki mua haku ko mutolu ko e tau motu ne takai he tahi; ko e tau motu foki kia fakafou ai ha lautolu a malolo; kia unuunu mai a lautolu, ti vagahau ai a lautolu; kia fakatata atu fakalataha a tautolu ke he fakafiliaga.
2 Ko hai kia ne fakaohooho ai a ia ne mahani tututonu mai he fahi uta? to ui atu a ia kia ia ke mui atu kia ia; to tuku atu e ia kia ia e tau motu kehe, ti fakatokolalo ai e tau patuiki; to tuku atu ai a lautolu ke tuga ne efuefu ke he hana pelu, to tuku atu ai a lautolu ke he hana kaufana ke tuga ne tau gutugutu saito kua havilia.
3 To tutuli e ia a lautolu, to fina atu a ia mo e nakai haofia ke he puhala nakaila fina atu ai hana tau hui.
4 Ko hai a ia kua taute mo e eke ai, kua ui atu ke he tau hau tali mai he kamataaga? Ko au ko Iehova, ko e fakamua kua fakalataha foki mo e fakamui, ko au ni a ia.
5 Kua kitia he tau motu ne takai he tahi ti matakutaku ai a lautolu; kua vivivivi ai e tau motuaga he lalolagi; kua fakatata mai ti o mai a lautolu.
6 To felagomataiaki a lautolu ko e taha ke he taha; ti pehe atu e taha ke he taha, Fakamalolo ā.
7 Ne fakamalolo he tufuga a ia ne eke e tau mena auro; ko ia kua fakamolemole aki ke he hamala, kua fakamalolo aki e ia a ia kua tukituki mena ke he mena ne tukituki ai e tau lapatoa; kua pehe age, Kua mitaki e pili; ti fakamau ai ke he tau fao, nakai fagahuatia a ia.
8 Ka ko koe Isaraela na e ko e haku a fekafekau, ko koe Iakopo na e, ne fifili ai e au, ko e fanau a Aperahamo haku a kapitiga;
9 Ko koe ne tamai e au he motuaga he lalolagi, ne ui foki e au a koe mai hana fahi mamao; ti pehe atu au kia koe, Ko e haku fekafekau a koe, kua fifili e au a koe, ti nakai tiaki e au a koe.
10 Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.
11 Kitiala, to mā mo e fakahakuhaku a lautolu oti ne ita kia koe; to eke a lautolu ke tuga ne mena noa maka; to mahaikava foki a lautolu kua taufetoko mo koe.
12 To kumi e koe a lautolu ka e nakai moua ai a lautolu ko lautolu ne fai fi kia koe; to eke a lautolu ke tuga ne mena noa maka, ke tuga he nakai ha i ai a lautolu ne tau kia koe.
13 Ha ko au ko Iehova ko e Atua hau, ko ia kua taofi hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.
14 Aua neke matakutaku a koe, ko e kelemutu na e, ko Iakopo, mo mutolu ko e tau tagata Isaraela; kua lagomatai au kia koe, kua vagahau mai e Iehova, ne fakafua mai a koe, ko ia ne Tapu i Isaraela.
15 Kitiala, to eke e au a koe mo mena ke holi aki e saito, ne matila, to fou, to fai nifo; to taholi ai e koe e tau mouga, mo e tuki malipilipi ai e koe, ti eke e koe e tau matiketike ke tuga ne tau otaota saito.
16 To fakahavili e koe a lautolu, to havilia foki a lautolu ke he matagi; ti fakamavehevehe ai a lautolu ke he afā; ka ko koe to olioli a koe kia Iehova, to hula foki a koe kia ia ne Tapu i Isaraela.
17 Ko e tau tagata ne matematekelea mo e tau tagata nonofogati kua kumi e lautolu e magavai, ka e nakai ha ha i ai; kua magomago ha lautolu a tau alelo he fia inu; ko au ko Iehova to fanogonogo atu au kia lautolu, ko au ko e Atua a Isaraela nakai tiaki e au a lautolu.
18 To hafagi ai e au e tau vailele ki luga he tau mouga nakai tupu ai ha akau, mo e tau vaipuna ke he tau pahua; to eke e au e tutakale mo vai namo, to eke foki e au e fonua pakepake mo tau vaipuna.
19 To to e au ke he tutakale talue e arasi, ko e sitima, mo e maile, mo e akau ke moua ai e puke lolo; to tuku ai foki e au ke he motu nakai fai vai, ko e perosi, ko e titara, fakalataha mo e tasura;
20 Kia kitekite a lautolu, mo e iloa ai e lautolu, ti manamanatu, mo e maama ai a lautolu fakalataha, ko e lima ni a Iehova ne eke ai e mena ia, ko ia ne Tapu i Isaraela kua eke ai ni.
21 Kua pehe mai a Iehova, Kia tamai ā ha mutolu a taufetoko; kua pehe mai e patuiki a Iakopo, Talatala mai ā ha mutolu a tau kupu ne taufetoko ai fakamalolo ai a mutolu.
22 Kia talatala mai e lautolu, mo e fakakite mai e lautolu kia tautolu e tau mena ke tutupu; kia fakakite mai e lautolu e tau mena fakamua, po ke heigoa e tau mena ia; ti manamanatu ai e tautolu, mo e iloa ai e tautolu e fakahikuaga he tau mena ia; po ke fakailoa mai e lautolu e tau mena ke hohoko mai.
23 Kia fakakite mai e mutolu e tau mena ke tutupu mai a mui, ti iloa ai e mautolu ko e tau atua a mutolu; kia eke la e mutolu e tau mena mitaki, po ke eke e tau mena kelea, ti kitekite fano a mautolu, mo e kitia fakalataha ai e tautolu.
24 Kitiala, kua homo atu he tote a mutolu ke he mena noa maka, ti homo atu he tote ke he mena noa maka ha mutolu a tau gahua; ti vihiatia a lautolu ne fifili a mutolu.
25 Kua fakaohooho e au taha mai he fahi tokelau, ti hau ai a ia; to ui mai a ia ke he haku a higoa mai he mena ne hake ai e la; to hau a ia ke he tau iki ke tuga ne hau ke he hemeri, ke tuga ne tagata eke kapiniu kelekele kua taholi ai e kelekele.
26 Ko hai kia kua fakakite mai e tau mena tali mai he kamataaga ti iloa ai e tautolu? mai he vaha fakamua foki, ti pehe age a tautolu, Kua tonu. Ko e moli, nakai ni fakakite mai he taha, nakai ni fakailoa mai he taha; nakai ni logona he taha ha mutolu a tau kupu.
27 Ko au ne pehe atu fakamua ki Siona, Kitiala, kitiala a lautolu; ti foaki atu e au ki Ierusalema a lautolu ne tamai e tala mitaki.
28 Ti kitekite au ka e nakai fai tagata; ko lautolu nai ni ka e nakai fakakite mai he taha; to huhu age au kia lautolu, ka e nakai maeke kia lautolu ke tali mai ha kupu.
29 Kitiala, ko e tau mena nakai aoga a lautolu oti kana; ko e ha lautolu a tau mena ne eke kua noa maka ia; ko e matagi mo e mena noa ha lautolu a tau tupua lapatoa.