Isaia 42:1-25
42 KITIALA, haku a fekafekau to taofi e au a ia; ko ia ne fifili e au kua fiafia ai haku loto; kua tuku atu e au haku Agaga ki luga hana; to ta atu ai e ia e fakafiliaga ma e tau motu kehe.
2 Nakai hea a ia, to nakai leo lahi a ia, to nakai logona foki hana leo ke he puhala.
3 Nakai papaki e ia e kaho ne maihiihi; to nakai tamate e ia e vavae kua puho tote; ko e fakamoli ke tamai ai e ia e fakafiliaga.
4 Nakai puho tote a ia, to nakai maihiihi foki a ia, ato tuku ai e ia e fakafiliaga ke he lalolagi, to amaamanaki ai foki e tau motu ne takai he tahi ke he hana tau fakatufono.
5 Ti vagahau mai pehe e Atua ko Iehova, ko ia ne eke e lagi, mo e fofola ai; ko ia ne fofola ai e lalolagi mo e tau mena ne tutupu mai ai; ko ia ne foaki mai e fafagu ke he tau tagata ha ha i ai, mo e agaga kia lautolu ne o ai.
6 Ko au ko Iehova, kua ui ai au a koe ke he mahani tututonu; to toto e au hau a lima, mo e leveki ai e au a koe, to ta atu foki e au a koe ke eke mo maveheaga ke he tau motu, ko e maama ke he tau motu kehe.
7 Ke fakamaama ai e tau mata he tau tagata matapouli, ke tamai ki fafo he fale puipui a lautolu ne lili ai, ke tamai foki a lautolu ne nonofo ke he pouli mai he fale kua puipui ai a lautolu.
8 Ko au ko Iehova, ko e haku a higoa haia; ko e haku a lilifu foki nakai ta atu e au ke he taha, mo e haku a fakahekeaga nakai ta atu ai e au ke he tupua kua ta.
9 Ko e tau mena fakamua, kitiala, kua hoko mai ia; ko e tau mena fou foki kua talahau atu e au; kua fakailoa atu e au kia mutolu e tau mena nakaila tutupu mai.
10 Kia lologo atu kia Iehova ke he lologo fou, ko e hana fakahekeaga mai he motuaga he lalolagi, ko mutolu ne o hifo ke he tahi, katoa mo e tau mena ne puke ai; ko mutolu ko e tau motu ne takai he tahi mo lautolu ne nonofo ai.
11 To leo lahi mai he tutakale mo e hana tau maga, ko e tau maga ikiiki kua nofo ai a Kitara; to kalaga a lautolu ne nonofo ke he kaumaka; to tauhea a lautolu mai he tau tapunu mouga.
12 To tuku atu e lautolu e lilifu kia Iehova, mo e talahau atu e lautolu hana fakahekeaga ke he tau motu ne takai he tahi.
13 To haele atu a Iehova tuga ne toa, to fakatupu ai e ia hana manako lahi; to kalaga a ia, to hea ni a ia, to fakamalolo a ia kia lautolu ne fai fi kia ia.
14 Kua leva haku a fakamate; nakai vagahau e au, to fakauka au; kua fakatutu au tuga ne fifine kua fanau; kua oti haku manava mo e faguhe fakalataha.
15 To moumou e au e tau mouga mo e tau mena matiketike; ti mago ai ia au ha lautolu a tau akau ikiiki oti kana; to liliu e au e tau vailele mo tau motu tu taha; to fakapakupaku e au e tau vai namo.
16 To takitaki e au e tau tagata matapouli ke he puhala nakai iloa e lautolu; to ta mai e au a lautolu ke he tau puhala loto nakai iloa e lautolu; to liliu e au e pouli ke he maama ki mua ha lautolu, ko e tau puhala keukeu to eke ia mo tau puhala hakohako; ko e tau mena ia ni kua eke e au kia lautolu, ti nakai tiaki e au a lautolu.
17 Kua liliu ki tua a lautolu, kua ma lahi a lautolu kua tua ke he tau tupua kua ta, ko lautolu ne pehe age ke he tau tupua lapatoa, Ko e ha mautolu a tau atua a mutolu.
18 Ko mutolu ko e tau tagata teliga tuli, kia fanogonogo mai a; mo mutolu ko e tau tagata matapouli kia kitekite ā mutolu ke kitia.
19 Ko hai kia kua matapouli, po ke fekafekau haku? po ke teligatuli tuga ne fekau ne fakafano atu e au? ko hai kia kua matapouli tuga a ia kua katoatoa hana mitaki? po ke matapouli tuga ne fekafekau a Iehova?
20 Kua kitia e koe e tau mena loga, ka e nakai omaoma a koe ki ai; ko ia ke fakamaagi e tau teliga ka e nakai fanogonogo a ia.
21 Kua finagalo ai a Iehova ha ko e hana tututonu; to talahau mitaki ai e ia e fakatufono mo e fakalilifu ki ai.
22 Ka ko lautolu nai ko e motu kua fofo mo e holataki ha lautolu a tau mena; kua tauhele ai a lautolu oti ke he tau luo, ti galo ai a lautolu ke he tau fale puipui; ti eke a lautolu mo tau tagata ne fofo he tau, ka e nakai ha i ai taha ke laveaki a lautolu, kua eke foki a lautolu mo mena kua kaiha, ka e nakai pehe age taha Kia liu aki mai a.
23 Ko hai ia mutolu ke fakateliga mai ke he tau mena nai? ke haga mai a ia, mo e fanogonogo mai ke he tau mena a mui?
24 Ko hai ne tuku atu a Iakopo kia lautolu ne kaiha hana tau mena, ko Isaraela foki kia lautolu ne fofo mena ke he tau? Nakai kia ko Iehova? ko ia ne hala a tautolu ki ai; ka e nakai mafai a lautolu ke o ke he hana tau puhala; ti nakai fanogonogo a lautolu ke he hana tau fakatufono.
25 Ti liligi mai e ia kia ia hana ita lahi, mo e mamafa he tau; ne huhunu takai ai a ia, ka e nakai iloa e ia; ne huhunu a ia ka e nakai manamanatu ai a ia.