Isaia 45:1-25
45 KUA vagahau mai pehe a Iehova kia ia ne fakauku ai e ia, ko Kuresa, ne taofi ai e au hana lima matau, kia fakatokolalo ai e tau motu oti ki mua hana, to vevete foki e au e tau tokupu he tau patuiki; ke hafagi ki mua hana e tau puhala lau ua; to nakai pa foki e tau gutuhala.
2 Ko au ni, to fina atu au ki mua hau, ti fakamolemole ai e au e tau mena nakai tatai; ti lipilipi e au e tau gutuhala apa kula; to hehele motu foki e au e tau fakamau lapatoa.
3 To foaki atu foki e au kia koe e tau koloa ha ha he pouli, mo e tau koloa ne fufu ai ke he tau mena galo; kia iloa e koe ko au ko Iehova, ko au ne ui ai a koe ke he hau a higoa, ko e Atua a Isaraela.
4 Ha ko e haku a fekafekau ko Iakopo, mo Isaraela ne fifili e au, ko e mena ia kua ui ai e au a koe ke he hāu a higoa, kua talahau e au hau a higoa, ka e nakai iloa e koe au.
5 Ko au ko Iehova, ka e nakai ha i ai taha; nakai fai atua ka ko au ni; kua pipi e au a koe, ka e nakai iloa e koe au;
6 Kia iloa ai e lautolu ke kamata mai he mena ne hake ai e la ke hoko ke he mena ne hifo ai a ia, nakai ha i ai taha ka ko au ni; ko au ni ko Iehova, ka e nakai ha ha i ai taha;
7 Ko au ne eke ai e maama, mo e fakatupu ai e pouli; ko au ne eke ai e monuina mo e fakatupu ai e malaia; ko au ko Iehova, ne eke ai e tau mena oti ia.
8 Ko e lagi na e, kia fakahihina hifo a mai luga; ko e tau aolagi foki kia liligi mai a e mahani tututonu; kia fakamaga e kelekele mo e fua mai ai e fakamouiaga mo e mahani tututonu, kia fakatutupu ai fakalataha; ko au ko Iehova kua eke ai e tau mena ia.
9 Oi te fakaalofa kia ia kua fetoko mo ia ne eke ai a ia, ko e kapa kapiniu mo e tau kapa kapiniu he kelekele. Po ke pehe kia e kelekele kia ia ne taute mena ai, ko e heigoa hau ne eke? po ke pehe atu kia hau a gahua, Nakai fai lima a ia?
10 Oi te fakaalofa kia ia kua pehe atu ke he hana matua tane, Ko e heigoa kia ke fanau ai e koe? po ke pehe atu ke he fifine, Ko e heigoa kia ke fanau mai e koe?
11 Kua vagahau mai pehe a Iehova, ko ia ne Tapu i Isaraela, mo ia ne eke a ia, Huhu mai a kia au ke he tau mena ke tutupu mai, kia poaki mai a kia au ke he haku a tau tama tane, mo e gahua he haku a tau lima;
12 Ko au ni, ne eke e au e lalolagi, ti eke ai e au e tau tagata ha ha i ai; ko au, ko e haku a tau lima ni ne fofola ai e lagi, mo e pule au ke he tau kau oti ha ha i ai.
13 Ko au ni, kua fakaohooho e au a ia ke he tututonu; to fakahakohako foki e au hana tau puhala oti; to ati e ia haku a maga, mo e tuku mai e ia haku a tau tagata ne fofo he tau ke o a lautolu; nakai eke ai e ia ha ko e palepale, po ke tau mena fakaalofa, kua pihia mai a Iehova Sapaota.
14 Kua talahau mai pehe a Iehova, Ko e koloa a Aikupito, mo e tau mena fakafua a Aitiope katoa mo Sipa, ko e tau tagata tino kehe, to o atu a lautolu kia koe, to eke foki a lautolu mo tau tagata hau; to mumui atu a lautolu kia koe, to o age a lautolu mo tau liliaga lapatoa, to fakaveveli fakafohifo atu a lautolu kia koe, mo e ole a lautolu kia koe, kua pehe atu, Ha ha ia koe e Atua, ka e nakai ha ha ia taha, ti nakai ha ha i ai taha Atua.
15 Ko e moli, ko koe ni ko e Atua, kua ufiufi ai e koe a koe, ko e Atua a Isaraela, ko e Fakamoui.
16 Kua mā a lautolu, kua fakahahaku ni a lautolu oti; kua o fakalataha a lautolu ha kua fakahahaku a lautolu, ko e tau tufuga ne eke e tau tupua.
17 Ka e fakamomoui a Isaraela ia Iehova ko e fakamouiaga tukulagi ni; to nakai mā a mutolu ti nakai fakahahaku ai a mutolu tukulagi tukumuitea.
18 Ha kua vagahau mai pehe a Iehova, ko ia ne eke e lagi; ko ia ni ko e Atua; ko ia ne tufugatia e lalolagi mo e eke ai; ko ia ne fakamau ai a ia; nakai eke noa ai e ia, ne eke e ia ke nonofo ai e tau tagata; ko au ko Iehova ti nakai ha ha i ai taha.
19 Nakai vagahau fakagalo e au ke he tau mena pouli he lalolagi; nakai pehe atu au ke he fanau a Iakopo, Kia kumi noa mai a mutolu kia au; ko au ko Iehova, kua vagahau mo e fakamoli, kua fakakite atu e tau mena tonu.
20 Kia fakapotopoto a mutolu ti o mai ā mutolu, kia fakatata mai fakalataha a mutolu, ko mutolu kua hao mai he tau motu kehe. Nakai iloa e lautolu ko lautolu kua uta fano e tau akau ko e ha lautolu a tau tupua kua ta, mo lautolu kua liogi ke he atua nakai maeke ke fakamoui.
21 Fakakite mai ā, mo e fakatata mai ā mutolu; kia pulega fakalataha a lautolu. Ko hai kia ne fakakite mai i tuai e tau mena nai, kua fakakite mai tali mai ne aho mua? Nakai kia ko au, ko Iehova? ti nakai ha ha i ai taha atua, ka ko au ni; ko e Atua tututonu mo e Atua kua fakamoui; ti nakai ha ha i ai taha ka noa mo au.
22 Ati hahaga mai a kia au, ke momoui ai a mutolu, ko mutolu ko e tau kala oti he lalolagi; ha ko au ko e Atua, ka e nakai ni ha ha i ai taha.
23 Kua omonuo ai au kia au ni, kua fina atu ai e kupu he haku gutu tututonu, ti nakai liu mai ai kia au, To fakatokotui mai kia au e tau tulihui oti kana, to omonuo mai he tau alelo oti ni;
24 Kua pehe taha, Ko Iehova hokoia kua moua ai e au e mahani tututonu mo e malolo; to hau a ia kia ia; ka e mā a lautolu oti ne ita kia ia.
25 Ko Iehova ke talahaua tututonu ai mo e hula ai e fanau oti a Isaraela.