Isaia 47:1-15
47 KIA hifo ā koe, ti nofo a ke he efuefu, ko koe ko e tamafine tote ko e tama fifine a Papelonia na e, kia nofo a koe ke he kelekele, nakai fai nofoaiki a koe, ko e tama fifine a Kaletaia na e; ha ko e mena nakai tuai talahaua a koe, Ko e tagata tino lolelole, mo e fakahelehele.
2 Kia uta ā e tau maka holo mo e holo falaoa; kia aki e koe hau a ie ufimata, ti toto hake e koe e kala tapulu hau, kia fakakite a hau a tau hui ti laka atu a koe e tau vailele.
3 Kia fakakite hau a kakano, kia kitia foki hau a ma; to lalago e au, to nakai maeke foki ha tagata ke tu mai kia au.
4 Ko e Laveaki ha lautolu ko Iehova Sapaota ko e hana higoa haia ko ia ne Tapu i Isaraela.
5 Nofo fakalogologo a, ti fano a koe ke he pouli, ko koe ko e tama fifine a Kaletaia, he nakai tuai ui a koe ,Ko e iki fifine kua pule ke he tau kautu.
6 Ne ita au ke he haku a motu, ti fakakelea e au haku a tufaaga; ne tuku atu e au a lautolu ke he hau a lima, ti nakai fakaalofa a koe kia lautolu, ne fakamamafa fakalahi e koe hau a lakau hahamo ki luga he tau tagata motua.
7 Ne pehe age foki a koe, To eke au mo iki fifine tukulagi; ti nakai manatu hifo a koe ke he tau mena nai, nakai manamanatu a koe ke he fakahikuaga he tau mena ia.
8 Hanai, Fanogonogo mai a ke he tau mena nai, ko koe kua loto ke he tau mena he tino, kua nofo fakahanoa, ko ia ne pehe hifo ke he hana loto, Ko au ni ka e nakai ha ha i ai taha; nakai nofo takape au, to nakai iloa e au e mānu ha ko e fanau oti ne mamate.
9 To hoko fakalutukia mai ke he aho taha, e tau mena ua nai, ke mamate ai hau a fanau mo e mate ai hau a tane; to hohoko katoatoa ai ni kia koe, ha ko e loga he hau a tau lagatau taulaatua, mo e malolo he hau a tau lagatau fakavai gata.
10 Kua tua foki a koe ke he hau a mahani kelea; kua pehe a koe, Nakai kitia a au; ko e hau a pulotu mo e hau a iloilo, ko e mena ia kua fakaliu kehe ai a koe; ti pehe hifo a koe ke he hau a loto, Ko au ni, ka e nakai ha ha i ai taha.
11 Ko e mena ia ke hoko mai ai e kelea kia koe, o nakai iloa e koe hana matafatafa aho; to to ki luga hau e malaia ti nakai maeke kia koe ke tuku kehe a ia; to hoki mai fakalutukia foki e malaia kia koe; to nakai iloa e koe.
12 Kia eke taha a koe ke he hau a tau lagatau fakavai gata, mo e hau a tau lagatau taulaatua, kua fakafita ai a koe tali mai hau a vaha tote; po ke aoga nakai ia kia koe po ke maeke nakai ke fakamatakutaku mai e koe?
13 Kua oti e manava hau ke he hau a tau pulega loga; kia tutu mai ā lautolu kua vevehe e lagi, ko lautolu kua kitekite ke he tau fetu, ko lautolu kua talahau mena ke he po ne pula fou ai e mahina, ti fakamoui e lautolu a koe mai he tau mena ke hoko mai kia koe.
14 Kitiala, to eke a lautolu ke tuga ne tau gutugutu saito; to huhunu ai a lautolu ke he afi; nakai laveaki mai e lautolu a lautolu he malolo he afi puhopuho; nakai ko e malala kaka ke mumu ai, po ke afi ke nofo atu ai ki mua hana.
15 To pihia ni kia koe a lautolu ne fakafita ai a koe; ko lautolu ne fakafua mena mo koe tali mai hau a vaha tote; to takitaha a lautolu mo e fano ke he hana ni a puhala; ti nakai ha ha i ai taha ke fakamoui a koe.