Isaia 49:1-26
49 KIA fanogonogo mai ā mutolu kia au, ko mutolu ko e tau motu ne takai he tahi; kia hahaga mai a mutolu ko e tau motu mamao; kua ui e Iehova au tali haku a fanau mai; kua tokutoku ai e ia haku a higoa mai he manava he haku a matua fifine.
2 Kua eke haku gutu ke tuga ne pelu matila; kua fufu e ia au ke he malu he hana lima; kua eke e ia au mo fana ne fakakikila, ti fufu e ia au ke he hana tagafana.
3 Ti pehe mai a ia kia au, Ko e haku a fekafekau a koe; Isaraela na e, to fakalilifu ai au ha ko koe.
4 Ti pehe atu au, Kua fakafitā teao au; kua, fakaoti ai haku a malolo ke he tau mena noa, mo e tau mena nakai aoga; ka e ha ha ia Iehova haku a fakafiliaga, mo e haku a taui ha ha he Atua haku haia.
5 Hanai, kua pehe mai a Iehova, ko ia ne eke au tali he fanau mai ke eke mo fekafekau hana; ke liuaki mai a Iakopo kia ia, pete he nakai fakapotopoto ai a Isaraela, ka e lilifu au ki mua a Iehova; to eke foki haku Atua mo malolo haku.
6 Kua pehe mai foki a ia, Ko e mena māmā kia eke a koe mo fekafekau kia au, ke fakatutu hake ai e tau magafaoa a Iakopo, mo e liuaki mai ai a lautolu kua laveaki i Isaraela; kua ta atu foki e au a koe ke eke mo maama he tau motu kehe, ke eke mo fakamouiaga haku ke hoko ke he motuaga he lalolagi.
7 Kua vagahau mai pehe a Iehova, ko e Laveaki a Isaraela, ko e hana Iki Tapu, kia ia kua vihia he tau tagata, mo ia kua vihiatia he motu, ko e fekafekau he tau pule; to fioia he tau patuiki ti tutu ai a lautolu; ko e tau iki foki ti fakaveveli fakafohifo ai a lautolu; ha ko Iehova, ko ia kua fakamoli, ko ia ne Tapu i Isaraela, ne fifili e ia a koe.
8 Kua vagahau mai pehe a Iehova; Ko e vaha ke fakaalofa ai kua tali atu ai au kia koe; ko e aho ke fakamoui ai kua lagomatai ai e au kia koe; to leveki foki e au a koe, mo e ta atu e au a koe ke eke mo maveheaga ke he tau motu; ke fakatu hake ai e lalolagi, ke eke ai e tau motu kua tiaki mo tufaaga ha lautolu;
9 Ke pehe age kia lautolu kua lili, O mai a ki fafo; ke pehe atu foki kia lautolu ha ha he pouli, Kia fakakite mai ā mutolu; to kai ai e lautolu ke he tau puhala; ko e tau mouga oti nakai tupu ai ha akau ke moua ai e lautolu ha lautolu a tau mena kai.
10 Nakai fia kai a lautolu, ti nakai fia inu a lautolu; nakai kai he vevela a lautolu po ke kai he lā a lautolu; ha ko ia kua fakaalofa kia lautolu to uta e ia a lautolu, to takitaki foki e ia a lautolu ke he tapa he tau vaipuna.
11 To eke foki e au haku a tau mouga oti mo puhala, to tokoluga foki haku a tau puhala tu.
12 Kitiala, to o mai a lautolu nai he mena mamao; kitiala, ko lautolu nai foki mai he fahi tokelau mo e fahi lalo, mo lautolu mai he motu ko Sinima.
13 Ko e lagi na e, kia kalaga ā koe, ko e lalolagi na e, kia olioli a koe, kia leo lalahi a he tau mouga, mo e kalaga fiafia ā lautolu; ha kua fakamafana e Iehova hana motu, kua fakaalofa foki a ia ke he hana tau tagata ne matematekelea.
14 Ka kua pehe mai a Siona, Kua tiaki e Iehova au; kua nimo au he Iki.
15 To nimo kia he fifine hana tama kai huhu, ke nakai fakaalofa a ia ke he tama ne fanau ai e ia? mena nimo foki ia lautolu na, ka e nakai ni nimo ia au a koe.
16 Kitiala, kua ta e au hau a fakatai ke he haku a tau aloalolima; kua toka mau ki mua haku hau a tau kaupa.
17 To alumaki mai hau a fanau; ko lautolu ne ulu ki lalo a koe, mo lautolu ne moumou a koe, to o kehe ia koe a lautolu.
18 Kia haga hake a koe hau a tau mata mo e kitekite ai a koe ke he tau fahi oti; kua fakapotopoto mai a lautolu oti, kua o mai a lautolu kia koe. Kua pehe mai a Iehova, Kua moui au, to tapulu ai a koe kia lautolu oti ke tuga ne tau mena ke taute aki, mo e pipi aki a koe tuga ne fifine kito fai tane.
19 Ha ko e hau a tau mena malŏlŏ, mo e hau a tau mena toka noa, mo e hau a fonua kua maona, kua lautote a koe ainei kia lautolu kua nonofo ai; to mamao foki a lautolu kua fakaoti a koe.
20 Ko e tau tama tane hau, ko e tagata nakai fai tama a koe, to pehe age mau a lautolu ke he tau teliga hau, Kua lautote e mena nai kia au; unuunu atu ā, ke nofo ai au.
21 To pehe hifo foki a koe ke he hau a loto, Ko hai kia ne fanau māku a lautolu nai? ha ko e tagata nakai fai tama au mo e tagata tufua, ko e tagata ne fofo he tau mo e tagata ne vega kehe au; ko hai foki ne leveki a lautolu nai? Kitiala, ne toe au tokotaha ni, ko lautolu nai, he ha i fe a lautolu?
22 Kua vagahau mai pehe e Iki ko Iehova, Kitiala, kua nikiti atu e au haku lima ke he tau motu kehe, mo e fakatu ki luga e au haku a fakamailoga ke he tau motu; to tamai e lautolu hau a tau tama tane ke he ha lautolu a tau fatafata, mo e hau a tau tama fifine ke he tau fulima ha lautolu.
23 To eke foki e tau patuiki mo tau leveki tama hau, mo e ha lautolu a tau faoa fifine to eke a lautolu mo tau fifine fakahuhu tama māu; to fakaveveli fakafohifo a lautolu kia koe; ti epoepo ai e lautolu e efuefu he hana tau hui; ti iloa e koe ko au ni ko Iehova, to nakai mā a lautolu kua tatali mai kia au.
24 To uta kia e mena ne fofo he tau mai he tagata malolo? po ke laveaki mai kia e tau tagata fofo he tau ia lautolu ne mahani tututonu?
25 Ha kua vagahau mai pehe a Iehova, To uta ni e tau tagata ne fofo he tau ia lautolu ne malolo, to laveaki mai foki e tau mena ne fofo he tau ia lautolu ne favale; to fetoko atu e au kia lautolu kua fetoko mai kia koe, to fakamoui foki e au hau a tau tama tane.
26 To fagai aki foki e au a lautolu ne favale kia koe ke he tau tino ni ha lautolu; to konahia foki a lautolu ke he toto ha lautolu tuga ne huhua vine; to iloa ai he tau tagata oti kana, ko au ni ko Iehova, ko e hau a Fakamoui, mo e hau a Laveaki, ko e Malolo a Iakopo.