Isaia 50:1-11
50 KUA vagahau mai pehe a Iehova, Ko fe kia e tohi vega he ha mutolu a matua fifine ne fakafano kehe ai e au a ia? po ko hai e tagata ne uta noa ai e au hana tau mena ke totogi, ne fakafua atu e au a mutolu kia ia? Kitiala, ko e ha mutolu a tau mahani kelea ne fakafua ai a mutolu; ko e ha mutolu a tau holifono ne fakafano kehe ai ha mutolu a matua fifine.
2 Ne hau au ka ko e ha nakai ha ha i ai ha tagata? Ne ui e au, ko e ha nakai tali mai ai taha? Kua fakaku kia haku lima ke nakai maeke kia au ke fakamoui ai? ti nakai kia fai malolo au ke laveaki ai? Kitiala, to fakapakupaku ai e au e tahi ke he haku a akonaki atu, to eke foki e au e tau vailele mo tutakale; to elo ai ha lautolu a tau ika he nakai fai vai, ti mamate ai he fia inu.
3 To fakatapulu e au e lagi ke he mena uli; to eke foki e au e ie talatala mo mena ke ufiufi aki a ia.
4 Kua foaki mai he Iki ko Iehova kia au e alelo ha lautolu ne fakaako, ke iloa ai e au ke fakamafana ke he kupu a ia ne matematekelea; to fafagu e ia au ke he pogipogi, ko e pogipogi to fafagu ai e ia haku a tau teliga, ke fanogonogo ai au tuga na lautolu kua fakaako.
5 Kua vevete he Iki ko Iehova haku a tau teliga, ti nakai totoko atu e au, ti nakai tukumuli au.
6 Ne tuku atu e au haku tua kia lautolu ne fahi, mo e haku a tau kauvehe kia lautolu ne futi e hafe; ti nakai ufiufi e au haku mata he mā mo e tauanu.
7 Ha ko e Iki ko Iehova to lagomatai mai e ia kia au; ko e mena ia nakai ma ai au; ko e mena ia kua eke e au haku mata ke tuga ne maka uli; ti iloa e au nakai fakama ai au.
8 Kua tata mai a ia kua talahaua tututonu ai au; ko hai kia ke taufetoko mo au? kia tutu ai fakalataha a maua; ko hai kia ke fetoko mai? kia fakatata mai a ia kia au.
9 Kitiala, to lagomatai mai he Iki ko Iehova kia au; ko hai kia taha ke fakahala mai? Kitiala, to popo a lautolu oti tuga ne tapulu; to kai ai he moko.
10 Ko hai kia ia mutolu kua matakutaku kia Iehova kua fanogonogo ke he kupu he hana fekafekau, kua fano ke he pouli ka e nakai fai maama a ia? kia tua a ia ke he higoa a Iehova, mo e falanaki a ia ke he hana Atua.
11 Kitiala, ko mutolu oti kua tolo e afi; kua takai ai e mutolu a mutolu ke he tau lemu afi; kia o ā mutolu ke he maama he afi ha mutolu, mo e tau lemuafi he afi ha mutolu; to hoko kia mutolu e mena nai mai he lima haku, to tatakoto ai a mutolu mo e matematekelea.