Isaia 54:1-17
54 KIA lologo ā koe ko e fifine tufua kua nakai fanau; kia leo lahi a, mo e kalaga fiafia ā koe kua nakai mamahi fanau; ha kua pehe mai a Iehova kua mua he tokologa e fanau he fifine nofo noa, ke he fanau he fifine ne fai tane.
2 Kia fakalaulahi a e mena kua tu ai hau a fale ie; kia toho e mutolu e tau ie puipui he tau mena kua nonofo ai a mutolu; aua neke fakatote ia; kia fakaloloa e koe hau a tau toua, mo e fakamau e koe hau a tau fao.
3 Ha ko e mena to tolonaki a koe ke he fahi matau mo e fahi hema; ko e fanau hau foki to eke e lautolu e tau motu kehe ma lautolu, ti nonofo ai a lautolu ke he tau maga toka noa.
4 Aua neke matakutaku a koe, ha ko e mena nakai mā a koe, aua foki neke fakahahaku a koe, ha ko e mena nakai fakamā a koe; ha ko e mena to nimo ia koe e mā he hau a vaha tamafine; to nakai liu manatu foki e koe ke he mā he hau a nofo takape.
5 Ha ko ia ne eke a koe, ko e tane hau haia, ko Iehova Sapaota ko e hana higoa haia; ko e hau a Laveaki foki, ko ia ne Tapu i Isaraela; to ui a ia ko e Atua he lalolagi oti.
6 Ha kua ui e Iehova a koe, tuga ne hoana kua tiaki mo e mamahi ai hana loto, ko e hoana kua tamāfine agaia, ka kua tiaki a ia, ne talahau mai he Atua hau.
7 Ko e magaaho kiliiku ne tiaki ai e au a koe, ka ko e fakaalofa lahi ni to fakapotopoto mai ai e au a koe.
8 Kua pehe mai hau a Laveaki ko Iehova, ko e liligi atu ai he haku a ita kia koe; ne ufiufi ai e au haku mata ia koe ke he magaaho kiliiku; ka ko e fakaalofa tukulagi to fakaalofa atu ai au kia koe.
9 Ha kua tuga ne fakapuke ke he vaha ia Noa e tau mena nai kia au, ne omonuo ai e au ke nakai tuai lofia foki e lalolagi ke he fakapuke tuga he vaha ia Noa; kua omonuo pihia e au ke nakai ita au kia koe, ke nakai akonaki foki e au a koe.
10 Ha ko e mena to mole atu e tau mouga, to luelue ai foki e tau matiketike; ka ko e haku a fakaalofa nakai mole atu ia ia koe, mo e haku a maveheaga ke monuina ai nakai luelue ia, kua talahau mai e Iehova ko ia kua fakaalofa atu kia koe.
11 Ko koe na, kua matematekelea, kua tokia he afa, kua nakai mafanatia, kitiala, to ati hake ai e au hau a tau maka ke he mena ke vali aki e tau mata, mo e fakave ai e au a koe ke he tau maka safaira.
12 To eke ai e au hau a tau fuga taue ke he tau maka kula, mo e hau a tau gutuhala ke he tau maka kikila, mo e hau a tau katofia oti ke he tau maka fulufuluola.
13 To fakaako e Iehova hau a fanau oti, ti lahi e monuina he fanau hau.
14 To fakamau ai a koe ke he mahani tututonu; to mamao mo koe e favale, ha ko e mena nakai matakutaku a koe; to mamao foki a koe mo e moumou ha ko e mena nakai fakatata mai ia kia koe.
15 Kitiala, to fakapotopoto ni a lautolu, ka e nakai fakapotopoto ai a lautolu ha ko au; ko lautolu oti ke fakapotopoto atu ke tau kia koe, to o atu a lautolu kia koe.
16 Kitiala, ko au ne eke e tagata kua eke e tau mena lapatoa, kua uloulo e ia ke he tau malala kaka, mo e taute ai e kanavaakau ma e hana gahua; ko au foki ne eke a ia ne moumou ke fakaoti ai.
17 Ko e tau kanavaakau oti kua taute ke tau kia koe, nakai monuina ia; ko e tau alelo oti ke taufetoko mo koe ke he fakafiliaga to fakahala ai e koe; ko e tufaaga hanā he tau fekafekau a Iehova, ko e ha lautolu a tututonu foki mai ia au haia, kua talahau mai ai e Iehova.