Isaia 55:1-13
55 OE! Ko mutolu oti kua fia inu, o mai ā ke he vai, katoa mo mutolu kua nakai fai tupe, kia o mai a kia fakafua mai ā mutolu mo e kai; kia o mai ā mutolu mo e fakafua e uaina mo e puke huhu, ka e nakai tamai ha tupe, ti nakai tamai ha mena ke fakafuaaki.
2 Ko e ha ne uta ai e mutolu e tau tupe ke he tau mena nakai ko e tau mena kai, mo e uta e tau mena ne gahua ai a mutolu ke he tau mena ke nakai makona ai? Kia fanogonogo fakamitaki mai a mutolu kia au, mo e kai e mutolu e tau mena mitaki, ti fiafia ha mutolu a tau loto ke he tau mena lolo.
3 Kia haga mai ā ha mutolu a tau teliga, ti o mai a mutolu kia au, kia fanogonogo mai a ke momoui ai ha mutolu a tau agaga; to eke foki e au mo mutolu e maveheaga tukulagi, ko e tau mena fakaalofa ia ne talahaua mai kia Tavita kua fakamoli.
4 Kitiala, kua ta age e au a ia mo tagata fakamoli mena ke he tau motu, ko e takitaki mo e pule ke he tau motu.
5 Kitiala, to ui e koe e motu kehe kua nakai iloa e koe; ko e motu kehe foki nakai iloa e lautolu a koe, to tafepoi mai a lautolu kia koe ha ko Iehova hau a Atua, mo ia kua Tapu i Isaraela; ha kua fakalilifu atu e ia a koe.
6 Kia kumi e mutolu a Iehova ka kua maeke he moua e mutolu a ia; kia tauui atu ā mutolu kia ia ka kua tata mai a ia;
7 Kia tiaki e ia ne mahani kelea hana mahani, mo e tagata mahani hepehepe kia tiaki e ia hana tau manatu; ti liu atu a ia kia Iehova, ti fakaalofa mai a ia kia ia; kia liu atu a ia ke he Atua ha tautolu, ha ko e mena to fakamagalo fakalahi mai e ia.
8 Ha ko e haku tau manatu nakai ko e tau manatu ha mutolu, ko e haku a mahani nakai ko e mahani ha mutolu, ne talahau mai pihia a Iehova.
9 Ko e mena tuga ne mua he tokoluga e lagi ke he lalolagi, kua mua he tokoluga pihia haku a mahani ke he mahani ha mutolu, mo e haku tau manatu kua mua ke he tau manatu ha mutolu.
10 Ko e mena tuga ne to hifo e uha mo e kiona mai he lagi, ka e nakai liu atu ki ai, ka e fakamalūaki e kelekele, ti fua mai ai, mo e gotogoto mai ai, kua tutupu mai ai e tau saito mo ia ne gana saito mo e tau mena kai mo ia ka kai;
11 To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.
12 Ha ko e mena to o atu a mutolu mo e fiafia, to takitaki ai foki a mutolu mo e monuina; to leo lalahi ai mo e kalaga fiafia he tau mouga mo e tau matiketike ki mua ha mutolu, to pati lima foki he tau akau oti he vao.
13 To tupu hake e perosi ke totogi aki e akau fotofoto; to tupu hake e maile ke totogi aki e akau magiiho; to eke foki ia mo higoa ke talahaua ai a Iehova, ke eke foki mo fakamailoga tukulagi nakai ni mole atu.