Isaia 57:1-21
57 KUA mate a tagata tututonu, ka e nakai manamanatu ai e taha; kua uta kehe foki e tau tagata totonu ka e nakai ha i ai taha kua manamanatu ai kua uta kehe e tagata tututonu mai he kelea.
2 To hu atu a ia ke he monuina, to okioki ai a lautolu ke he ha lautolu a tau mohega, ko lautolu kua o mai mo e mahani hakohako.
3 Ka ko mutolu, kia unuunu mai ā ki hinei, ko mutolu ko e tau tama he fifine kua talahau mena he kitekite ke he tau aolagi, ko e fanau he tagata faivao, mo e fifine fakataka.
4 Kua vā a mutolu kia hai? kua fakamaga a mutolu ha mutolu a tau gutu kia hai? kua fakatele mai e mutolu ha mautolu a tau alelo kia hai? Nakai kia ko e fanau fakafualoto a mutolu? ko e fanau pikopiko?
5 Ko mutolu ne fakatupu ai ha mutolu a tau manako ke he tau atua ki lalo he tau akau lau uhiuhi oti; ko mutolu ne kelipopo ai e fanau ke he tau pahua ki lalo he tau maihi he tau kaumaka.
6 Ko e tau maka molemole he pahua ko e hau a veveheaga haia, ko ia ni ke eke mo tufaaga hau, kua liligi atu ai e koe e poa inu, kua uta foki e koe ki ai e poa mena kai, Ke lotomafola ai au ha ko e tau mena ia?
7 Ne tuku e koe hau a mohega ki luga he mouga tokoluga mo e lahi; ne hake foki a koe ki ai ke eke ai e poa.
8 Ne tuku e koe hau a fakamanatuaga ki tua he gutuhala mo e pou he gutuhala; ha kua fakakite e koe a koe ke he taha ka e nakai ko au, ti hake ai a koe; ne fakalaulahi e koe hau a mohega; ne eke e koe e maveheaga mo lautolu; ti manako a koe ke he mohega ha lautolu ke he mena ne kitia ai e koe.
9 Ne fina atu a koe ke he patuiki mo e magalolo, ti fakaloga e koe hau a tau lolo manogi, ne fakafano atu e koe hau a tau fekau ke he tau mena mamao, ti eke fakakelea e koe a koe ke hoko hifo ki seoli.
10 Kua nakai fahia a koe he mamao e hala ne fano ai a koe; ti nakai pehe a koe, Kua nakai aoga; ne moua e koe e malolo he hau a lima, ko e mena ia nakai lolelole ai a koe.
11 Ne hopo e ate hau ia hai, mo e matakutaku ai a koe, ke pikopiko ai a koe, mo e nakai manatu e koe au, ti nakai manamanatu ai a koe? nakai kia fakamate au tali mai i tuai? ti nakai matakutaku a koe ia au?
12 To talahau atu e au hau e tututonu mo e hau a tau gahua; nakai aoga foki e tau mena ia kia koe.
13 Ka tagi a koe, kia laveaki he tau mena hau ne tatanaki a koe; to havilia a lautolu oti, to uta kehe a lautolu ke he fafagu; ka ko ia kua tua kia au to moua ai e ia e motu, to eke mo tufaaga hana haku a mouga tapu.
14 Ti pehe age a ia, Kia fakamolemole, fakamolemole ā, kia tauteute a e puhala, kia uta kehe e mutolu e mena ke tupetupe ai mai he puhala he haku a motu.
15 Ha kua vagahau mai a ia kua Tokoluga mo ia kua Mua ue atu, ko ia ne haele tukulagi, kua tapu hana higoa, To nofo ai au ke he mena tokoluga mo e tapu, to nofo foki mo ia kua loto malipilipi mo ia kua loto holoilalo, ke fakamafana a lautolu ne loto holoilalo, mo e fakamafana ai e tau loto ha lautolu ne loto malipilipi.
16 Ha ko e mena nakai taufetoko tukulagi au, ti nakai ita mau au; ha kua lolelole ai e tau loto ki mua haku, ko e tau agaga foki ne eke e au.
17 Ko e hala he hana velevelemena ne ita ai au, ti ta e au a ia; ne fakamumuli au, mo e ita au, ha kua fano ai a ia mo e matauka ke he puhala he hana loto.
18 Kua kitia e au hana tau puhala, to fakamalolo foki e au a ia; to takitaki e au a ia, to liuaki foki e au kia ia e tau mena ke mafanatia ai a ia, katoa foki mo lautolu ne tagi fakalataha mo ia.
19 Ko au kua eke e tau fua he tau laugutu, Ko e monuina, ko e monuina kia ia ne mamao katoa mo ia ne tata mai, kua pihia mai a Iehova; to fakamalolo foki e au a ia.
20 Ka ko e tau tagata mahani kelea kua tatai a lautolu mo e tahi loka; nakai maeke ke okioki; ka e aku hake he tahi e kelekele mo e pelapela.
21 Kua pehe mai e Atua, nakai fai monuina e tau tagata mahani kelea.