Isaia 58:1-14
58 KIA ui fakalahi a, aua neke leo tote, kia leo lahi a koe tuga ne pu kua ulo; mo e fakakite atu e koe ke he motu hau ha lautolu a tau holifono, mo e fakakite atu ke he magafaoa a Iakopo ha lautolu a tau hala.
2 Ka kua kumi e lautolu au ke he taha aho mo e taha aho, ti fiafia a lautolu ke iloa haku a tau puhala; ke tuga ne motu kua eke e mahani tututonu, mo e nakai tiaki e lautolu e fakafiliaga he ha lautolu a Atua; kua huhu mai a lautolu kia au ke he tau fakafiliaga tonu, kua fakatata atu a lautolu ke he Atua mo e fiafia.
3 Kua fakakanopogi he ha a mautolu ka e nakai kitia e koe? ko e ha ne fakamamahi e mautolu a mautolu, ka e nakai iloa e koe? Kitiala, ko e aho kua fakakanopogi ai a mutolu kua moua ai e mutolu e fiafia, ti fakamakamaka atu a mutolu ke he tau fekafekau ha mutolu ke eke ai ha mutolu a tau gahua oti.
4 Kitiala, kua fakakanopogi a mutolu ke taufetoko ai, mo e miha, mo e moto ai he lima ke eke ai e mahani kelea; aua neke fakakanopogi a mutolu ke he aho nai ke logona ai ha mutolu a leo ke he mena tokoluga.
5 Ko e fakakanopogi pehenei kia kua loto au ki ai? ko e aho ke fakamamahi ai he tagata kia ia ni; ke haga hifo ai a ia hana ulu tuga ne kaho? ke faliki ai e ie talatala mo e efuefu afi ke eke mo moheaga hana? To ui kia e mena na ko e fakakanopogi mo e aho ke fiafia ai a Iehova?
6 Nakai kia ko e fakakanopogi nai kua loto au ki ai? kia vevete e tau liliaga ne eke ai ke he mahani kelea, ke vevete e tau pipi he lakau hahamo, ke fakafano atu ke toka noa ai a lautolu ne pehia he favale, mo e fatifati e mutolu e tau lakau hahamo oti.
7 Nakai kia ko e mena nai? kia tofitofi ai e koe hau a tau mena kai kia lautolu ne fia kai, kia ta mai ai e koe ke he fale hau a lautolu ne matematekelea kua nakai fai fale; ka kitia e koe a ia kua nakai fai felevehi ti fakatapulu e koe a ia, ti aua neke fakamumuli a koe mai he magafaoa hau?
8 Ti ea mai ai hau a maama tuga ne matafatafa ata he aho, ti tupu vave ai foki e mena ke fakamalolo aki a koe; ti fina atu foki hau a tututonu ki mua hau, ti eke ai e lilifu a Iehova mo muiaki kau hau.
9 Ti ui atu a koe, ti tali mai ai e Iehova; to tagi atu a koe ti pehe mai a ia, Ko au hanai. Kaeke ke tuku kehe ia mutolu e lakau hahamo, ko e tuhi ke he matalima, mo e tau kupu kelea;
10 Kaeke foki ke fakaalofa atu a koe kia lautolu ne fia kai, mo e fagai e koe ke makona ai a lautolu ne matematekelea; ti hake ai hau a maama ke he pouli, mo e hau a pouli ke tuga ne tupoula ia.
11 Ti takitaki mau e Iehova a koe; ti fakamakona ai e ia a koe ke he vaha nakai fai vai, mo e fakamalolo ai e ia hau a tau huimotua; to eke a koe ke tuga ne fonua kua fakamalū aki he magavai, ke tuga foki e vaipuna nakai oti hana vai.
12 Ko lautolu ke tutupu mai ia koe to ati hake e lautolu e tau mena ne malŏlŏ ne aho mua; to ati hake e koe e tau fakaveaga he taha hau mo e taha hau; to ui ai a koe Ko ia ne ati hake e mena ne malŏlŏ, Ko ia ne liu taute e tau puhala ke nonofo ai e tau tagata.
13 Kaeke ke liliu kehe hau a tau hui mai he sapati, ke nakai eke ai e koe hau a loto ke he aho tapu haku; mo e talahau ai e koe e sapati, ko e aho fiafia, ko e aho kua tapu kia Iehova, kua lilifu; ti fakalilifu atu a koe ki ai, kua nakai eke ai e koe hau a tau mahani, kua nakai moua ai e koe hau a fiafia, mo e nakai vagahau ai e koe hau a tau kupu;
14 Ti fiafia ai a koe kia Iehova, ti fakaheke ai e au a koe ki luga he tau mena tokoluga he lalolagi, ti fagai aki e au a koe ke he tufaaga he hau a matua tane ko Iakopo; ha kua pihia mai ai e fofoga a Iehova.