Isaia 61:1-11
61 HA ha i luga ia au e Agaga he Iki ko Iehova; ha kua fakauku e Iehova au ke fakamatala e vagahau mitaki kia lautolu kua matematekelea; kua fakafano mai e ia au ke pipi e tau loto ne malipilipi, ke fakamatala ai e tokanoaaga ke he kau mahala, mo e vetevete ai a lautolu ne lili.
2 Ke ogoogo ai e tau ke fakaalofa mai ai a Iehova, mo e aho ke lalago ai he Atua ha tautolu; ke fakamafana ai a lautolu oti kua tagi;
3 Ke tuku atu ai e fiafia kia lautolu kua tagi i Siona, ke foaki atu kia lautolu e foufou ke totogi aki e tau efuefuafi, mo e puke lolo he fiafia ke totogi aki e tagi, ko e tapulu ke eke aki e fakahekeaga ke totogi aki e loto lolelole; ke ui ai a lautolu ko e tau akau he tututonu, ne to e Iehova, ke eke mo fakahekeaga kia ia.
4 To ati hake foki e lautolu e tau mena maona mai i tuai; to fakatu e lautolu e tau mena ne malolo ne aho mua; to liu eke e lautolu e tau maga ne maona, ko e tau mena ne malŏlŏ ke he taha hau mo e taha hau.
5 To tutu e tau tagata kehe mo e leveki e lautolu ha mutolu a tau fuifui mamoe, ti eke e tau tagata he tau motu kehe mo tau gahua fonua ha mutolu, mo e tau gahua vine ha mutolu.
6 Ka ko mutolu to ui a mutolu, Ko e tau ekepoa a Iehova, to talahaua a mutolu, Ko e tau fekafekau he Atua ha tautolu; to kai e mutolu e tau mena mitaki he tau motu kehe, to eke foki ma mutolu ha lautolu a tau koloa.
7 To totogi aki ha mutolu a mā ke he tau mena kua takiua; to olioli foki a lautolu ke he ha lautolu a veveheaga ke totogi aki e tukimakaefu; ha ko e mena to eke ma lautolu e tufaaga kua takiua ke he ha lautolu a motu; ti ha ha ia lautolu e fiafia tukulagi.
8 Ha ko au ko Iehova, kua fiafia au ke he fakafiliaga, kua fakavihia e au e tau mena kua fofo mo e mahani hepehepe; to ta atu e au ha lautolu a taui mo e fakamoli; ti eke e au mo lautolu e maveheaga tukulagi.
9 To iloa ai ha lautolu a fanau ke he tau motu kehe, to iloa foki a lautolu ke tutupu mai ia lautolu ki loto he tau motu; to talahau ai a lautolu e lautolu oti kua kitekite atu kia lautolu, ko lautolu nai ko e fanau kua fakamonuina e Iehova.
10 To fiafia lahi au kia Iehova, to olioli haku loto ke he haku Atua; he fakatapulu e ia au ke he tau tapulu he fakamouiaga, ne fakatapulu e ia au ke he tapulu he tututonu; ke tuga ne kitofaihoana kua potiki ai a ia po ke ekepoa; tuga foki e kito faitane kua taute a ia ke he hana tau mena ke taute aki.
11 Ha ko e mena tuga ne kelekele kua fakatupu ai hana tau fua, tuga e kaina foki kua fakatupu mai e tau mena ne to ai, to fakatupu ai pihia he Iki ko Iehova e mahani tututonu mo e fakahekeaga ki mua he tau motu oti kana.