Isaia 63:1-19
63 KO hai kia aenai kua haele mai i Etoma, kua haele mai i Posara mo e tau tapulu kula; ko ia kua fulufuluola hana tau tapulu, ko ia kua haele mai mo e hana malolo lahi? Ko au haia, kua vagahau atu ke he tututonu, kua malolo ke fakamoui.
2 Ko e heigoa e mena ne kula ai hau a tau tapulu, mo e hau a tau tapulu tuga a ia kua taholi ke he holiaga vine?
3 Ne taholi tokotaha e au e holiaga vine, ka ko e tau motu nakai ha i ai mo au ha tagata ia lautolu, ne taholi ni e au a lautolu ke he haku a ita, mo e taholi e au a lautolu ke he haku a ita lahi; ne pihikia haku a tau tapulu oti ke he toto ha lautolu, kua toitoia haku a tau tapulu oti.
4 Ha ko e mena ha ha he loto haku e aho ke lalago ai; kua hoko foki ke he tau ha lautolu ne laveaki mai ai e au.
5 Ne kitekite au, ka kua nakai ha i ai taha ke lagomatai; ti ofo au he nakai ha i ai taha ke tokotu mai kia au; ti eke ai ke he haku lima e fakamouiaga maku; ti tokotu ai au ke he haku a ita lahi.
6 Ne taholi e au e tau motu ke he haku a ita, ne fakainu e au a lautolu ke konahia ke he haku a ita lahi; ti liligi ai e au ha lautolu a toto ke he kelekele.
7 To tokutoku e au e fakaalofa a Iehova, ko e tau fakahekeaga a Iehova, ke lata mo e tau mena oti kua foaki mai e Iehova kia tautolu, mo e hana totonu lahi ke he magafaoa, a Isaraela, kua foaki mai ai e ia kia lautolu ke lata mo e hana fakaalofa hofihofi, ke lata foki mo e hana fakaalofa lahi.
8 Ha kua pehe a ia, Ko e haku a motu a lautolu; ko e fanau nakai pikopiko a lautolu; ti eke a ia mo Fakamoui ha lautolu.
9 Nakai fai fi a ia kia lautolu ke he ha lautolu a tau matematekelea oti; ko e agelu foki mai mua hana ne fakamoui e ia a lautolu; ne laveaki mai e ia a lautolu ke he hana fakaalofa mo e hana totonu; ne toto e ia a lautolu mo e uta e ia a lautolu ke he tau aho oti ke he vaha i tuai.
10 Ka ko lautolu, ne fakafualoto, a lautolu ti fakahukia e lautolu hana Agaga Tapu; ti liliu ai a ia ke fai fi kia lautolu ti tau a ia kia lautolu.
11 Ti manatu ai e ia ke he tau aho i tuai, kia Mose mo e hana motu. Ko fe a ia ne ta hake a lautolu mai he tahi, fakalataha mo e leveki he hana fuifui mamoe? Ko fe a ia ne tuku hana Agaga Tapu ki loto ia ia?
12 Ko ia ne takitaki a lautolu ke he lima matau a Mose, mo e hana lima lilifu, ti ihi ai e ia e tahi ki mua ha lautolu, kia eke e ia māna e higoa tukulagi?
13 Ko ia ne takitaki a lautolu ke he moana, tuga ne solofanua ke he tutakale nakai tupetupe ai a lautolu.
14 Tuga ne fuifui manu kua hifo ke he pahua, ne uta he Agaga a Iehova a lautolu ke he okiokiaga; ne takitaki pihia e koe hau a motu ke eke ai māu e higoa lilifu.
15 Kia kitekite ā koe mai he lagi, mo e fioia mai e koe mai he haeleaga tapu mo e fulufuluola hāu. Ko fe kia hau a fakamakutu mo e hāu a malolo? ko e tagi he hāu a manava mo e hāu a fakaalofa kia au kua taofi ia.
16 Ha ko koe ni ko e ha mautolu a Matua; pete he nakai iloa e Aperahamo a mautolu ti nakai kitekite mai a Isaraela kia mautolu, ko koe Iehova na e, ko e ha mautolu a Matua a koe Iehova na e, ko e ha mautolu a Matua a koe, ko e ha mautolu a Laveaki; mai i tuai hau a higoa.
17 Iehova na e, ko e ha ne fakaheke e koe a mautolu mai he tau puhala hau? mo e fakamao ai ha mautolu a tau loto ke nakai matakutaku a mautolu kia koe? Kia liu mai a koe ha ko e hau a tau fekafekau, ko e tau magafaoa he hau a tufaaga.
18 Ko e tau aho gahoa ne eke ai he hau a motu tapu ma lautolu; kua taholi ai e lautolu ne fai fi kia mautolu hau a faituga.
19 Kua eke a mautolu ke tuga a lautolu nakai pule a koe ki ai tali mai i tuai; nakai ui ai hau a higoa ki luga ha lautolu.