Isaia 64:1-12
64 MITAKI ke ihi e koe e lagi, mo e haele hifo a koe, kia tafe hifo ai e tau mouga ki mua hau.
2 Tuga ne afi kua huhunu aki e tau akau ikiiki, ko e afi kua vela ai e maga vai, ke fakailoa hau a higoa kia lautolu kua fai fi kia koe; ke vivivivi ai e tau motu kehe ki mua hau.
3 Ne eke e koe e tau mena ke matakutaku ai nakai leo a mautolu ki ai; ne haele hifo a koe, ti tafe hifo ai e tau mouga ki mua hau.
4 Tali mai i tuai nakai fanogonogo ai a lautolu, nakai logona he tau teliga, ti nakai kitia he tau mata taha atua, ka ko koe ni, kua eke e tau mena mitaki ma lautolu kua tatali atu kia ia.
5 Kua feleveia a mua mo ia kua fiafia, mo e eke ai e mahani tututonu; to manatu ai e lautolu a koe ke he hau a mahani; kitiala, ne ita a koe, ha kua hala a mautolu, ha ha i ai tukulagi hau a mahani, ti fakamoui ai a mautolu.
6 Ko mautolu nai, ko mautolu oti kua tuga ne taha kua kelea; ko e ha mautolu a tututonu oti kua tatai ia mo e ie he tagata gagao; kua fifigo ai a mautolu oti tuga ne lau akau; ko e ha mautolu a tau mahani kelea kua tuga ne matagi ti havilia ai a mautolu.
7 Ti nakai ui atu taha ke he hau a higoa, nakai ala taha ke toto atu kia koe; ha kua haga kehe a koe hau a fofoga ia mautolu, ti liu puke vai ai a mautolu ha ko e ha mautolu a tau mahani kelea.
8 Ka ko e hanai, Iehova na e, ko koe ni ko e ha mautolu a Matua; ko mautolu nai ko e kelekele, ka ko koe ko e Tufuga; ko e gahua he hau a tau lima a mautolu oti kana.
9 Iehova na e, aua neke fakahomo atu e koe hau a ita, ti ua manatu e koe ha mautolu a tau mahani kelea ke hoko ko he tukulagi; kitiala, kia fofoga mai a koe, ko e hau a tau tagata a mautolu oti kana.
10 Ko e hau a tau maga tapu ko e tutakale ia, ko Siona ko e tutakale ia, ko Ierusalema ko e maga toka noa ia.
11 Ko e ha mautolu a fale ne tapu mo e fulufuluola, ne fakaheke ai ha mautolu a tau matua kia koe, kua huhunu ia ke he afi; ti maona ni e tau mena fakafiafia oti ha mautolu.
12 Iehova na e, to fakauka kia a koe ha ko e tau mena ia? to fakamate kia a koe? to fakamamahi fakalahi mai kia e koe a mautolu?